ខ្ញុំព្រះករុណា សូមក្រាបថ្វាយបង្គំ ៖
- សម្តេចព្រះមហាសង្ឃរាជ និងជាប្រធានគណៈសង្ឃនាយក គណៈធម្មយុត្តិកនិកាយ នៃព្រះរាជាណាចក្រកម្ពុជា សម្តេចព្រះសង្ឃនាយក នៃព្រះរាជាណាចក្រកម្ពុជា សម្តេចព្រះរាជាគណៈ ព្រះតេជគុណ ព្រះមន្ត្រីសង្ឃនៃគ្រប់សាសនាគ្រប់ព្រះអង្គ និមន្តមកពីគ្រប់បណ្តាប្រទេសផ្សេងៗ ជាទីគោរពសក្ការៈ
- អ្នកឧកញ៉ា សុះ កំរី ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា
- ឯកឧត្តម បណ្ឌិត Mohammed Said Al-Majdouei អគ្គលេខាធិការរងអង្គការសម្ព័ន្ធពិភពឥស្លាម (Muslim World League “RABITAH”)
- គណៈអធិបតី ភ្ញៀវកិត្តិយសជាតិ-អន្តរជាតិ អង្គពិធីទំាងមូល ជាទីមេត្រី!
ថ្ងៃនេះ ខ្ញុំពិតជាមានសេចក្តីសោមនស្សរីករាយ ដែលបានមកជួបបងប្អូនសាសនិកឥស្លាមសាជាថ្មី ក្នុងពិធីបើកកិច្ចប្រជុំកំពូលឥស្លាម ក្រោមប្រធានបទ “ឥស្លាម និងពុទ្ធសាសនា” រៀបចំដោយអង្គការសម្ព័ន្ធពិភពឥស្លាម (Muslim World League “RABITAH”) ដែលមានវត្តមានរបស់ ឯកឧត្តមបណ្ឌិត Mohammed Said Al-Majdouei អគ្គលេខាធិការរងអង្គការសម្ព័ន្ធពិភពឥស្លាម (Muslim World League) និងប្រតិភូចំនួន ១៨០ នាក់ មកពីប្រទេសចំនួន ៣១ ។ ខ្ញុំចាំបានថា កាលពីថ្ងៃទី៧ ខែធ្នូ ឆ្នាំ២០២៤កន្លងទៅ នៅក្នុងពិធីបើកសន្និបាតលើកទី ២០ របស់អង្គការក្រុមប្រឹក្សាផ្សព្វផ្សាយឥស្លាមតំបន់អាស៊ីអាគ្នេយ៍និងប៉ាស៊ីហ្វិក (RISEAP) ខ្ញុំបានសន្យាថា នឹងមកចូលរួមក្នុងកិច្ចប្រជុំកំពូលឥស្លាមនេះ ហើយខ្ញុំសូមឆ្លៀតឱកាសនេះ សម្តែងនូវការកោតសរសើរចំពោះអង្គការសម្ព័ន្ធពិភពឥស្លាម ឯកឧត្តមបណ្ឌិត Mohammed Said Al-Majdouei អគ្គលេខាធិការរងអង្គការសម្ព័ន្ធពិភពឥស្លាម ឯកឧត្តម អ្នកឧកញ៉ា ដាតុ បណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងស្ថាប័នពាក់ព័ន្ធ ដែលបានជួយផ្ចុងផ្តើមរៀបចំកិច្ចប្រជុំកំពូលនេះ ដែលជាលើកទី១ នៅក្នុងប្រវត្តិសាស្ត្រ ដែលកម្មវិធីដ៏មានសារៈសំខាន់ និងមានអត្ថន័យជាសកល ក្នុងបរិការណ៍នៃសាសនាឥស្លាម ត្រូវបានប្រារព្ធឡើងនៅលើទឹកដីនៃព្រះរាជាណាចក្រកម្ពុជា។
ឯកឧត្តម លោកជំទាវ លោក លោកស្រី!
“ជាតិ សាសនា ព្រះមហាក្សត្រ” គឺជាបាវចនាជាតិរបស់កម្ពុជា ហើយរដ្ឋធម្មនុញកំណត់យកសាសនាព្រះពុទ្ធជាសាសនារបស់រដ្ឋ ប៉ុន្តែ យើងពិតជាមានមោទនភាពក្រៃលែង ដែលអង្គការសម្ព័ន្ធពិភពឥស្លាម បានទទួលស្គាល់ពីសាមគ្គីភាព ភាពអត់ឱន ភាពមិនជ្រុលនិយម និងសុខដុមនីយកម្មជាតិសាសន៍ និងសាសនា នៅព្រះរាជាណាចក្រកម្ពុជា ដែល សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានខិតខំកសាងមកយ៉ាងលំបាក និងថែទាំយ៉ាងយកចិត្តទុកដាក់បំផុត ដោយហេតុថា កត្តាទាំងនេះ គឺជាធាតុផ្សំមិនអាចខ្វះបាននៃសន្តិភាព និងស្ថិរភាពយូរអង្វែងរបស់កម្ពុជា។ ដូចដែលខ្ញុំបានលើកកាលពីពេលកន្លងមកថា ជាតថភាពប្រវត្តិសាស្ត្រ ការជំរុញសុខដុមនីយកម្មសាសនា គឺជាឌីអេនអេ (DNA ) របស់គណបក្សប្រជាជនកម្ពុជា ហើយគ្រប់អាណត្តិនៃរដ្ឋាភិបាលរបស់គណបក្សប្រជាជនកម្ពុជា យើងតែងតែប្រកាន់ខ្ជាប់នូវគោលការណ៍នេះ ជានិច្ច។ ក្នុងនាមខ្ញុំ ជាថ្នាក់ដឹកនាំបន្តវេន ខ្ញុំសូមធានាអះអាងថា យើងនឹងនៅតែបន្តអនុវត្តគោលនយោបាយនេះ ពីព្រោះនេះ គឺជាការធានាភាពសុខសាន្ត និងសុខដុមរមនារបស់សង្គមជាតិ យើងទាំងមូល។
ប្រធានបទថ្ងៃនេះ គឺ “ឥស្លាម និងពុទ្ធសាសនា” ដែលជាជម្រើសប្រធានបទដ៏សក្តិសមបំផុត សម្រាប់ការរៀបចំកម្មវិធីនៅក្នុងប្រទេសកម្ពុជា ដែលតែងតែលើកស្ទួយកិច្ចសន្ទនា អន្តរសាសនា និងសន្តិសហវិជ្ជមានរវាងជំនឿសាសនា សមាជិករបស់អង្គការសម្ព័ន្ធពិភពឥស្លាម បណ្តារដ្ឋ ៥៧ ប្រទេស ដែលជាសមាជិកនៃអង្គការសហប្រតិបត្តិការឥស្លាម(OIC) និង ប្រទេសនានា លើសាកលលោក សុទ្ធតែបានទទួលស្គាល់ថា កម្ពុជា គឺជាប្រទេសគំរូមួយ ក្នុងការបញ្ចប់សង្គ្រាមរ៉ាំរ៉ៃទាំងស្រុង និង ទទួលបានសុខសន្តិភាពពេញលេញ និងបានលើកកម្ពស់សិទ្ធិសេរីភាពជំនឿសាសនារបស់ប្រជាពលរដ្ឋទូទៅ បូករួមទាំងបងប្អូនសាសនិកឥស្លាម។
គ្មានសាសនាណាមួយ ដែលបង្រៀនប្រជាជន ឱ្យប្រព្រឹត្តអំពើបាបនោះទេ។ គ្រប់សាសនាទាំងអស់ សុទ្ធតែបានតម្រង់ទិស សាសនិករបស់ខ្លួន ទៅរកផ្លូវល្អ ប្រកបដោយសីលធម៌ គុណធម៌ មេត្តាធម៌ ភាពស្មោះត្រង់ និង សេចក្តីប្រោសប្រណី ចំពោះមនុស្សជាតិ និងរាល់ជីវិតទាំងអស់នៅលើលោក។ គ្រប់សាសនា សុទ្ធតែបានពន្យល់ បង្ហាត់បង្ហាញ ដោយយកចិត្តទុកដាក់ជាប្រចាំ នៅក្នុងការជំរុញអំពើជាផលកុសល ដើម្បីសេចក្តីសុខផ្លូវចិត្ត និងដំណើរឆ្ពោះទៅកាន់ឋានសួគ៌ ហើយអប់រំទូន្មានឱ្យដើរប្រាសចាកឆ្ងាយ ពីការធ្វើទុក្ខបុកម្នេញទៅលើមនុស្ស សត្វ និងជីវិតដទៃ និងរាល់អំពើបាបកម្ម ដែលជាដំណើរឆ្ពោះទៅកាន់ឋាននរក។
លើកម្រិតគោលនយោបាយដឹកនាំប្រទេស ការយកចិត្តទុកដាក់ទៅលើបងប្អូនខ្មែរឥស្លាម និងបងប្អូនប្រកាន់យកសាសនាផ្សេងៗ គឺមានតាំងពីថ្នាក់ដឹកនាំកំពូល ដែលកាន់ព្រះពុទ្ធសាសនា រហូតដល់ថ្នាក់មូលដ្ឋានជាក់ស្តែង ដូចជាព្រះមហាក្សត្រខ្មែរ គ្រប់ជំនាន់ បានផ្តល់ការសណ្តោសប្រណីដល់សហគមន៍ចាម ដែលជាជនភៀសខ្លួនដោយសារសង្គ្រាម បានមករស់នៅលើទឹកដីកម្ពុជា បានរាជានុញ្ញាតដល់ជនជាតិចាម ចូលរួមប្រយុទ្ធការពារទឹកដីកម្ពុជា ក្នុងសម័យអាណានិគមនិយមបារាំង និងបានប្រទាននាមដល់បងប្អូនជនជាតិភាគតិចចាមថាជា “ខ្មែរឥស្លាម” នៅក្រោយទទួលបានឯករាជ្យពីបារាំងនាឆ្នាំ១៩៥៣ ដោយព្រះរាជតម្រិះ សព្វព្រះរាជហឫទ័យរបស់ព្រះករុណាព្រះបាទសម្តេចព្រះ នរោត្តម សីហនុ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ក្នុងគោលបំណងចង់ឱ្យក្រុមជាតិភាគតិចចាម បានក្លាយជាពលរដ្ឋខ្មែរ កាន់សាសនាឥស្លាមដោយស្របច្បាប់ និងក្លាយជាខ្មែរតែមួយ ព្រមទាំងបានបន្សល់ទុកនូវអត្តសញ្ញាណដើមរបស់ពួគគេផងដែរ។
ជាអកុសល សហគមន៍ខ្មែរឥស្លាមបានរងគ្រោះដូចសហគមន៍ខ្មែរដទៃទៀត នៅក្នុងអំឡុងពេលដែលកម្ពុជាធ្លាក់ចូលក្នុងភ្លើងសង្គ្រាមនៃរបបសាធារណរដ្ឋខ្មែររបស់លោកសេនាប្រមុខ លន់ នល់ និងរបបកម្ពុជាប្រជាធិបតេយ្យ ប៉ុល ពត ដែលនៅពេលនោះ ប្រជាជនខ្មែរគ្រប់រូប បានបាត់បង់សិទ្ធិគ្រប់យ៉ាង រួមទាំងសិទ្ធិរស់រានមានជីវិតផងដែរ។
ក្រោយ ថ្ងៃរំដោះ ៧ មករា ឆ្នាំ ១៩៧៩ ទើបសេរីភាពនៃជំនឿសាសនានៅកម្ពុជា ត្រូវបានស្ដារ និងសង្គ្រោះឡើងវិញ។ ក្រោមការដឹកនាំរបស់ សម្តេចតេជោ ហ៊ុន សែន សហគមន៍ខ្មែរឥស្លាមមានការរីកចម្រើន និងមានសេរីភាពជំនឿសាសនាយ៉ាងពេញលេញ និងរាជរដ្ឋាភិបាលបានរៀបចំឱ្យមានស្ថាប័នកំពូលឥស្លាមឡើងវិញ គឺគណៈដឹកនាំជាន់ខ្ពស់នៃសាសនាឥស្លាមកម្ពុជា និងបានផ្តល់តួនាទីដល់ថ្នាក់ដឹកនាំសហគមន៍ខ្មែរឥស្លាមជាច្រើនរូប នៅក្នុងស្ថាប័នកំពូលរបស់ជាតិ និងនៅថ្នាក់ក្រោមជាតិ ។
រាជរដ្ឋាភិបាលក៏បានផ្តល់ជូនសហគមន៍ខ្មែរឥស្លាម ដូចជា៖ ការរៀបចំអាហារស្រាយបួសរ៉ាម៉ាឌនប្រចាំឆ្នាំ តាំងពីឆ្នាំ ២០១៤ មក ដែលមានអ្នកចូលរួមទាំងភ្ញៀវជាតិ និងអន្តរជាតិជាមធ្យម ប្រមាណ ៥០០០ នាក់ ក្នុងមួយឆ្នាំ ។ នៅថ្ងៃទី២៤ ខែមីនា ឆ្នាំ២០២៥ ខាងមុខនេះ ខ្ញុំនិងភរិយា នឹងចូលរួមជាលើកទី ២ ក្នុងពិធីពិសា-អាហារស្រាយបួសខែរ៉ាម៉ាឌន នៃសាសនាឥស្លាមកម្ពុជាលើកទី៩ ឆ្នាំ២០២៥ នេះ ដែលមានការចូលរួមសរុបចំនួន ៦ ២០០នាក់ ។ ខ្ញុំក៏សូមអញ្ជើញមិត្តភក្តិបរទេស ចូលរួមជាមួយខ្ញុំផងដែរ។
លើសពីនេះ សេរីភាពនៃការគោរពប្រណិប័តន៍សាសនាឥស្លាម ក៏ត្រូវបានរាជរដ្ឋាភិបាលបើកទូលាយ ជាក់ស្តែង សិស្ស-និស្សិតខ្មែរឥស្លាម អាចស្លៀកសម្លៀកបំពាក់ប្រពៃណីឥស្លាម នៅតាមគ្រឹះស្ថានសិក្សាគ្រប់កម្រិត ហើយបងប្អូនជាស្ត្រីអាចទទូរក្បាល ហើយបុរសក៏អាចពាក់មួកកាតឹបថតរូប សម្រាប់ប្រើប្រាស់លើឯកសាររដ្ឋបាល ដូចជា លិខិតឆ្លងដែន និងអត្តសញ្ញាណបណ្ណ ។ល។ យើងក៏មានកន្លែងថ្វាយបង្គំ នៅតាមព្រលានយន្តហោះ មន្ទីរពេទ្យរដ្ឋ រោងចក្រ សណ្ឋាគារ និងផ្សារធំៗមួយចំនួន ជាពិសេស នៅវិមានសន្តិភាពនៃទីស្តីការគណៈរដ្ឋមន្ត្រី ក៏បានរៀបចំបន្ទប់ថ្វាយបង្គំផងដែរ។
លក្ខណៈពិសេសមួយទៀតនៅកម្ពុជា គឺនៅពេលជំងឺកូវីដ-១៩ កំពុងតែរាតត្បាតជាសាកល បណ្តាប្រទេសជាច្រើនបានតម្រូវឱ្យបូជាសព ដែលស្លាប់ដោយសារជំងឺកូវីដ-១៩ រួមទាំងសពបងប្អូនឥស្លាម។ ប៉ុន្តែ សម្រាប់កម្ពុជា ដោយសារមានសំណូមពរពីថ្នាក់ដឹកនាំសហគមន៍ខ្មែរឥស្លាម ដើម្បីអនុវត្តស្របតាមក្រឹត្យក្រមច្បាប់សាសនាឥស្លាម ប្រមុខរាជរដ្ឋាភិបាល នាពេលនោះ សម្តេចអគ្គមហាសេនាបតីតេជោ ហ៊ុន សែន បានអនុញ្ញាតលើកលែងការបូជា ហើយបានអនុវត្តតាមប្រពៃណីរបស់សាសនា។ លើសពីនេះ រាជរដ្ឋាភិបាលក៏បានផ្តល់កញ្ចប់ថវិកាជូនគ្រួសារនៃសពជាទូទៅ រួមទាំងខ្មែរឥស្លាម ដែលរងគ្រោះដោយជំងឺកូវីដ-១៩ បានផ្តល់ប្រាក់ឧបត្ថម្ភ សម្រាប់គ្រួសារដែលរងផលប៉ះពាល់ និងងាយរងគ្រោះកំឡុងពេលរាតត្បាតនៃជំងឺកូវីដ-១៩ បានបង្កភាពងាយស្រួលដល់អ្នកជំងឺកូវីដ-១៩ ជាឥស្លាម ដែលសម្រាកព្យាបាលនៅតាមមន្ទីរពេទ្យ អាចទទួលបានម្ហូបអាហារហាឡាល និងបានផ្តល់ឱកាសផ្សេងៗផងដែរ។
រាជរដ្ឋាភិបាលក៏បានបញ្ចូលគ្រូបង្រៀនខ្មែរឥស្លាមទៅក្នុងក្របខណ្ឌក្រសួងអប់រំ យុវជន និងកីឡា ចំនួន ១៥០០ នាក់ និង គ្រូជាប់កិច្ចសន្យា ១៧៨ នាក់ ក្នុងនេះ មានស្ត្រី ៣៥០ នាក់ តាំងពីឆ្នាំ ២០១៥ ដែលទទួលបៀវត្សសរុបប្រមាណ ៦,៦ លានដុល្លារអាមេរិក ក្នុង ១ ឆ្នាំ ។ ដើម្បីបង្កភាពងាយស្រួលដល់សាសនិកឥស្លាមទាំងក្នុងប្រទេស និងបរទេស ពិសេសភ្ញៀវទេសចរជាឥស្លាម ក្នុងការទទួលទានអាហារ រាជរដ្ឋាភិបាលបានបង្កើតស្ថាប័នហាឡាល តាំងពីឆ្នាំ ២០១៦ ដោយមានកិច្ចសហការជាមួយបណ្តាស្ថាប័នបរទេស ដែលមកដល់ពេលនេះ មានម្ហូបអាហារហាឡាលមួយចំនួនត្រូវបាននាំចេញទៅកាន់ពិភពលោក។
ទន្ទឹមនឹងការអនុវត្តគោលនយោបាយដែលមានភាពទន់ភ្លន់របស់រាជរដ្ឋាភិបាល យើងក៏ត្រូវកោតសរសើរចំពោះការចូលរួមដោយសកម្ម និងមានការទទួលខុសត្រូវ ពីគណៈគ្រប់គ្រងសាសនានីមួយៗ ចៀសវាងការធ្វើសកម្មភាព និងការប្រើប្រាស់រូបភាពសាសនា លើផ្លូវមិនត្រឹមត្រូវ។ ជាមួយនឹងការរីកចម្រើននៃប្រព័ន្ធឌីជីថល និង ការផ្សព្វផ្សាយតាមបណ្តាញសង្គម យើងទាំងអស់គ្នាត្រូវមានការទទួលខុសត្រូវ ចំពោះការផ្សព្វផ្សាយព័ត៌មានមិនពិត ការបណ្តុះមនោសញ្ចេតនារើសអើងស្អប់ខ្ពើម និងការលើកស្ទួយលទ្ធិជ្រុលនិយម។ ខ្ញុំសូមឆ្លៀតឱកាសនេះ ថ្លែងអំណរគុណដល់គណៈគ្រប់គ្រងសាសនា ដែលគ្រប់គ្រងបានយ៉ាងល្អនូវសមាសភាពដែលជាតំណាងនៃសាសនានីមួយៗ និងបានចូលរួមដោយសកម្ម នៅក្នុងការអនុវត្តគោលនយោបាយធានាសុខដុមរមនាជាតិសាសន៍ និងសាសនារបស់កម្ពុជា។
កិច្ចប្រជុំថ្ងៃនេះ គឺជាគំរូជាក់ស្តែងមួយ ហើយខ្ញុំពិតជាចង់ឃើញសកម្មភាពសង្គមជាច្រើនទៀត ដែលមានការចូលរួមអន្តរសាសនា ដែលអាចបង្ហាញជូនដល់សាសនិកទាំងអស់ អំពីសាមគ្គីភាព ជាសង្គមមួយ ដែលមានបរិយាប័ន្ន មានភាពអត់ឱន និងភាពនិយមកណ្តាល។
ចុងក្រោយ គឺការអនុវត្តសេរីភាពសាសនាប្រកបដោយការទទួលខុសត្រូវ នៅក្នុងកម្រិតប្រជាពលរដ្ឋ។ ការប្រណិប័តន៍បានយ៉ាងខ្ជាប់ខ្ជួននូវប្រពៃណី ទំនៀមទម្លាប់សាសនា ពីសំណាក់សាសនិកនីមួយៗ ដោយគ្មានភាពជ្រុលនិយម គឺជាអត្តសញ្ញាណមួយដ៏សំខាន់នៃសង្គមកម្ពុជា។
លទ្ធិជ្រុលនិយម គឺជាសត្រូវនៃភាពសុខដុមរមនា និងសន្តិសហវិជ្ជមាន នៅក្នុងសង្គម ។ ជាក់ស្តែង, គ្មានសង្គមណាមួយ ដែលមានភាពបរិសុទ្ធឥតខ្ចោះនៃជាតិសាសន៍ និងសាសនា នោះទេ ហើយសង្គមដែលទាមទារភាពបរិសុទ្ធបែបនេះ គឺតែងតែនាំមកនូវសោកនាដកម្ម ការធ្វើទុក្ខបុកម្នេញ ការសងសឹកគ្មានទីបញ្ចប់ ហើយដែលអាក្រក់បំផុតនោះ គឺការរុញច្រានទៅរកសកម្មភាពបោសសម្អាតជាតិសាសន៍។ តាមពិត ពិភពលោកយើងពិតជាមានមេរៀនច្រើនរាប់មិនអស់ ពីសោកនាដកម្ម ដែលមានឫសគល់ចេញពីលទ្ធិជ្រុលនិយម បូករួមទាំងអ្វីដែលកម្ពុជា បានឆ្លងកាត់ ក្នុងរបបប្រល័យពូជសាសន៍ប៉ុលពត ។ ជាក់ស្តែង ក្រុមប្រឆាំងជ្រុលនិយម ព្រោះតែមហិច្ឆតានយោបាយរបស់ខ្លួន បានបរិហារដោយបំពានលើតថភាពប្រវត្តិសាស្ត្រ និងគុណតម្លៃមិនអាចកាត់ថ្លៃបាននៃ ថ្ងៃរំដោះ ៧ មករា ១៩៧៩ ដែលជាថ្ងៃកំណើតទី ២ របស់ប្រជាជនកម្ពុជាទូទាំងប្រទេស បូករួមទាំងបងប្អូនខ្មែរឥស្លាមផងដែរ ។ ដើម្បីឆ្លើយតប-ទៅនឹងការព្រួយបារម្ភកាន់តែខ្លាំងឡើង លើក្រុមធ្វើនយោបាយប្រឆាំងជ្រុលនិយមមួយចំនួន ដែលបន្តបដិសេធព្រឹត្តិការណ៍សម្លាប់រង្គាលនេះ រាជរដ្ឋាភិបាលកម្ពុជា បានចាត់វិធានការជាបន្ទាន់តាមរយៈការបង្កើតច្បាប់ ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើង ក្នុងរយៈកាលនៃរបបកម្ពុជាប្រជាធិបតេយ្យខ្មែរក្រហម ដើម្បីទប់ស្កាត់មនោគមវិជ្ជាជ្រុលនិយម, ការកើតមានឡើងសាជាថ្មីនៃអំពើប្រល័យពូជសាសន៍ ទូទាំងពិភពលោក និងការពារតថភាពប្រវត្តិសាស្ត្រ ដែលទទួលស្គាល់ជាអន្តរជាតិ តាមរយៈ អង្គជំនុំជំរះវិសាមញ្ញក្នុងតុលាការកម្ពុជា ឬ សាលាក្តីខ្មែរក្រហម ដែលជាតុលាការកូនកាត់រវាងកម្ពុជា និង អង្គការសហប្រជាជាតិ ដែលបានកាត់ទោសអតីតមេខ្លោងដឹកនាំកំពូលនៃរបបកាប់សម្លាប់ខ្មែរក្រហមទាំងឡាយ ដែលពាក់ព័ន្ធនឹងអំពើសម្លាប់រង្គាល នៅកម្ពុជាកាលពីអតីតកាល ថ្មីៗនេះ។
ដូច្នេះ ការជំរុញសុខដុមនីយកម្មជាតិសាសន៍ និងសាសនា ត្រូវមានការចូលរួមពីប្រជាជនគ្រប់ស្រទាប់ទាំងអស់ មិនមែនរាជរដ្ឋាភិបាល អាចធ្វើឡើងតែម្នាក់ឯងបានឡើយ។ ការរៀបចំរចនាសម្ព័ន្ធគ្រប់គ្រងបានត្រឹមត្រូវ និងការចូលរួមសហការ ជំរុញកិច្ចសន្ទនាអន្តរសាសនា ដោយគ្មានរើសអើង ដោយគ្មានលទ្ធិជ្រុលនិយម គឺជាកត្តាគាំទ្រដ៏សំខាន់ សម្រាប់ការអនុវត្តគោលនយោបាយរបស់រាជរដ្ឋាភិបាល ដែលធានាភាពសុខដុមរមនា និងសន្តិសហវិជ្ជមានរបស់សង្គមដែលមានភាពចម្រុះ។
ឯកឧត្តម លោកជំទាវ លោក លោកស្រី!
ជាថ្មីម្តងទៀត ខ្ញុំសូមចូលរួមអបអរសាទរការរៀបចំកិច្ចប្រជុំកំពូលឥស្លាម នៅព្រះរាជាណាចក្រកម្ពុជា និងសូមថ្លែងអំណរគុណ ចំពោះអង្គការសម្ព័ន្ធពិភពឥស្លាម ក៏ដូចជា ស្ថាប័នសាសនាដទៃទៀត ដែលបានផ្តល់ទំនុកចិត្តចំពោះព្រះរាជាណាចក្រកម្ពុជា និងបានទទួលស្គាល់ភាពជាគំរូរបស់កម្ពុជា នៅក្នុងការជំរុញកិច្ចសន្ទនាអន្តរសាសនា សុខដុមនីយកម្មជាតិសាសន៍ និងសាសនា។
ជាទីបញ្ចប់ ទូលបង្គំ ខ្ញុំព្រះករុណាខ្ញុំសូមថ្វាយព្រះពរ ប្រគេនពរ សម្តេចព្រះមហាសង្ឃរាជ សម្តេចព្រះសង្ឃនាយក សម្តេចព្រះសង្ឃនាយករង សម្តេចព្រះរាជាគណៈ ព្រះថេរានុត្ថេរៈគ្រប់ព្រះអង្គ និងជូនពរ ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី មន្ត្រីរាជការ ភ្ញៀវកិត្តិយសជាតិ-អន្តរជាតិ និងអង្គពិធី សូមប្រកបដោយពុទ្ធពរ និងពរទាំង ៥ ប្រការ គឺ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាត។
ខ្ញុំសូមព្រះអល់ឡោះ ប្រទាននូវពរជ័យ សិរីសួស្ដីជូនអ្នកទាំងអស់គ្នា ដែលបានចូលរួមនៅទីនេះ។ ព្រះអល់ឡោះ នឹងផ្តល់នូវការរីកចម្រើន រុងរឿង សុភមង្គល និងសេចក្តីសុខសប្បាយ សម្រាប់គ្រប់ៗគ្នា តរៀងទៅ។
ខ្ញុំសូមប្រកាសបើក “កិច្ចប្រជុំកំពូលឥស្លាម ក្រោមប្រធានបទ “ឥស្លាម និងពុទ្ធសាសនា” រៀបចំដោយអង្គការសម្ព័ន្ធពិភពឥស្លាម” ចាប់ពីពេលនេះតទៅ!
សូមអរព្រះគុណ និងសូមអរគុណ!
