សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសមភាគីឡាវ ឯកឧត្តមបណ្ឌិត ថងលួន ស៊ីសូលីត នាយករដ្ឋមន្រ្តី នៃសាធារណរដ្ឋប្រជាធិបតេយ្យប្រជាមានិតឡាវ បានឯកភាពគ្នា ក្នុងការដកកងកម្លាំងទ័ពនៅតំបន់ជម្លោះព្រំដែនទឹក នៃប្រទេសទាំងពីរយ៉ាងយូរបំផុតនៅព្រឹកថ្ងៃទី១៣ សីហា ដើម្បី បញ្ចៀសការប្រើប្រាស់កម្លាំងដាក់គ្នា។ កាលពីព្រឹកថ្ងៃទី១២សីហា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើដំណើរតាមយន្តពិសេសរបស់ក្រុមហ៊ុនអាកាសចរណ៍ជាតិកម្ពុជា អង្គរអ៊ែរ ឆ្ពោះទៅកាន់ទីក្រុងវៀងច័ន្ទ ប្រទេសឡាវ ដើម្បីធ្វើការជួបប្រជុំពិសេសដោះស្រាយជាបន្ទាន់ ចំពោះភាគីកង ទ័ពឡាវ ចល័តចូលមកក្នុងទឹកដីកម្ពុជា នៃតំបន់ព្រំដែនទឹក ក្បែរអូអាឡៃ និងតំបន់អូរតាង៉ាវ ស្រុកសៀមប៉ាង ខេត្តស្ទឹងត្រែង របស់ព្រះរាជាណាចក្រកម្ពុជា ជាប់និងព្រំដែនខេត្តអាតាពើ ប្រទេសឡាវ ដែលបានកើតមានឡើងចាប់តាំង ពីខែមេសាឆ្នាំ២០១៧ រហូតមកដល់ពេលបច្ចុប្បន្ននេះ។
នៅក្នុងកិច្ចប្រជុំពិសេសដើម្បីធ្វើការដោះស្រាយនូវស្ថានការ ជាបន្ទាន់នោះ សម្តេចតេជោនាយករដ្ឋមន្រ្តី និងសមភាគីនាយករដ្ឋមន្រ្តីឡាវ បានធ្វើការជួបប្រជុំបិទទ្វារមួយ ទល់និងមួយដែលបានចំណាយពេលប្រមាណ៤០នាទី មុនឈានទៅបើកការប្រជុំពិភាក្សាពិសេស ដែលធ្វើឡើងដោយ ប្រមុខរដ្ឋាភិបាល នៃប្រទេសទាំងពីរកម្ពុជា-ឡាវ។
បន្ទាប់ពីបានចំណាយពេលពិភាក្សារួមគ្នាប្រមាណ៣០នាទី សម្តេចតេជោ នាយករដ្ឋមន្រ្តី និងឯកឧត្តម នាយករដ្ឋមន្រ្តីឡាវ បានឈានទៅធ្វើសេចក្តីថ្លែងការណ៍ផ្ទាល់មាត់រួមគ្នា ទាក់ទិន ទៅនិងលទ្ធផលនៃការប្រជុំពិភាក្សាពិសេសរបស់មេដឹកនាំ នៃប្រទេសទាំងពីរកម្ពុជា-ឡាវ ដែលមានខ្លឹមសារទាំងស្រុង
បន្ទាប់មកសម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញចូលជួប សំដែងការគួរសមជាមួយ ឯកឧត្តម ប៊ុនញ៉ាង វិរ៉ាក់ចិត្រ ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ។ សម្តេចតេជោ នាយករដ្ឋមន្រ្តីមានប្រសាសន៍ជំរាបជូន ឯកឧត្តមប្រធាន រដ្ឋឡាវ ទាក់ទិនទៅនិងលទ្ធផល នៃកិច្ចប្រជុំ បន្ទាន់រវាង សម្តេចតេជោ ជាមួយនិងឯកឧត្តម នាយករដ្ឋមន្រ្តីឡាវ ដោយក្នុងនោះមេដឹកនាំរដ្ឋាភិបាល នៃប្រទេសទាំងពីរ បានឯកភាពគ្នាក្នុងការដកកងកម្លាំងទ័ពនៅតំបន់ជម្លោះព្រំដែនទឹក នៃប្រទេសទាំងពីរយ៉ាងយូរបំផុតនៅព្រឹកថ្ងៃទី១៣ សីហា ដើម្បីបញ្ចៀសការប្រើប្រាស់កម្លាំងដាក់គ្នា។
ជាមួយគ្នានេះ សម្តេចតេជោ នាយករដ្ឋមន្រ្តីក៏បានពាំនាំ នូវព្រះរាជបណ្តាំផ្ញើរសាកសួរសុខទុក្ខ និងការនឹករលឹកយ៉ាងជ្រាលជ្រៅបំផុត ពីព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការះដ៏ខ្ពង់ខ្ពស់បំផុត ជូនចំពោះឯកឧត្តមប្រធានរដ្ឋឡាវ។
ជាការឆ្លើយតបឯកឧត្តម ប្រធានរដ្ឋឡាវ មានប្រសាសន៍សំដែងនូវការវាយតម្លៃខ្ពស់ និងកោតសរសើរជូនចំពោះប្រមុខមេដឹកនាំ រដ្ឋាភិបាល នៃប្រទេសទាំងពីរកម្ពុជា-ឡាវ ដែលបានធ្វើការដោយស្មោះត្រង់ ដោះស្រាយបញ្ចប់ជម្លោះវត្តមាន កងកម្លាំងប្រដាប់អាវុធ នៅតាមតំបន់ព្រំដែន នៃប្រទេសទាំងពីរកម្ពុជា-ឡាវ។
គួរបញ្ជាក់ថា នៅក្នុងសេចក្តីប្រកាស ព័ត៌មានរបស់ក្រសួងការបរទេសបានបញ្ជាក់ថា កន្លងមកទោះបីមានការចរចាថ្នាក់បច្ចេកទេសមន្រ្តីជាន់ខ្ពស់ រហូតដលើការជួបពិភាក្សា និងចរចារវាងថ្នាក់ដឹកនាំកំពូល ព្រមទាំងមានកំណត់ទូតនិងលិខិតតវ៉ាជាច្រើន ពិសេសលិខិតចុងក្រោយបំផុត របស់សម្តេចអគ្គមហាសេនាបតីតេជោ ហ៊ុន សែន ចុះថ្ងៃទី២ ខែសីហា ផ្ញើជូនឯកឧត្តម ថងលួន ស៊ី សូលីត នាយករដ្ឋមន្រ្តី នៃសាធារណរដ្ឋប្រជាធិបតេយ្យប្រជាមានិតឡាវ ថ្មីៗនេះក៏ដោយ ក៏ភាគីឡាវនៅតែមិនឆ្លើយតប និងមិនព្រមដកកងកម្លាំងប្រដាប់អាវុធរបស់ខ្លួន ចេញពីទឹកដីកម្ពុជាឡើយ។ ដំណើរទៅជួបចរចារបស់សម្តេចអគ្គមហាសេនាបតីតេជោ នាយករដ្ឋមន្រ្តី ហ៊ុន សែន លើកនេះ គឺជាកាយវិការទន់ភ្លន់ប្រកបដោយការអត់ធ្មត់ និងសុឆន្ទៈចង់ដោះស្រាយជម្លោះដោយសន្តិវិធីជាមួយភាគីឡាវ មុននឹងឈានដល់ការប្រកាន់យកវិធានការណ៍ផ្សេងទៀត រាប់ទាំងវិធានការណ៍យោធា និងតាមផ្លូវតុលាការ ក្នុងករណីកិច្ចខិតខំចុងក្រោយនេះរបស់កម្ពុជា នឹងមិនផ្តល់លទ្ធផលជាវិជ្ជមានទេនោះ។
បន្ទាប់មកនៅវេលាថ្ងៃត្រង់ ថ្ងៃដដែលនោះដែរ ឯកឧត្តម ថងលួន ស៊ីសូលីត នាយករដ្ឋមន្រ្តី នៃសាធារណរដ្ឋប្រជាធិបតេយ្យប្រជាមានិតឡាវ បានប្រារព្វរៀបចំពិធីលៀងសាយភោជន៍ជាមហាកិត្តិយសដ៏ខ្ពង់ខ្ពស់បំផុត ជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ដែលបានអញ្ជើញទៅចូលរួមកិច្ចប្រជុំពិសេសដើម្បីដោះស្រាយបញ្ចប់ជម្លោះ នៅតំបន់ព្រំដែននៃ ប្រទេសទាំងពីរកម្ពុជា-ឡាវ។
នៅក្នុងពិធីទទួលទានអាហារថ្ងៃត្រង់នោះ មេដឹកនាំនៃប្រទេសទាំងពីរបានឯកភាពរួមគ្នាថា នឹងមិនបង្កឲ្យកើតមានឡើងនូវរឿងបែបនេះតទៅទៀតនោះទេ ពោលប្រសិនជាមានបញ្ហាអ្វីកើតឡើងនៅតាមតំបន់ព្រំដែន នៃប្រទេសទាំងពីរ សម្តេច និងឯកឧត្តម នាយករដ្ឋមន្រ្តីឡាវ នឹងចេញមុខពិភាក្សាដោះស្រាយដោយមិន ឲ្យកើតមាន នូវជម្លោះប្រដាប់អាវុធរវាងប្រទេសទាំងពីរនៅថ្ងៃអនាគតបន្តទៀតឡើយ៕
