ក្នុងពិធីសំណេះសំណាលនាឱកាសចុះពិនិត្យវឌ្ឍនភាពនៃការជំរុញអនុវត្តន៍វិធានការគន្លឹះវិស័យអប់រំ នៅសាលាបឋមសិក្សាត្រពាំងក្អែក នៅភូមិត្រពាំងក្អែក សង្កាត់វាលពង់ ក្រុងឧត្តុង្គម៉ែជ័យ ខេត្តកំពង់ស្ពឺកាលពីថ្ងៃទី២៤ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត បានណែនាំឱ្យសិស្សានុសិស្សចេះសំពះលោកគ្រូ អ្នកគ្រូ និងឪពុកម្តាយ និងជួយធ្វើការងារឪពុកម្តាយនៅផ្ទះផងដែរ។
សម្តេចធិបតី ហ៊ុន ម៉ាណែត បានគូសបញ្ជាក់ថា ឪពុកម្តាយតែងតែស្រឡាញ់និងព្រួយបារម្ភចំពោះកូនៗរបស់ខ្លួនជានិច្ច ហើយក្នុងនាមជាកូនមិនត្រូវធ្វើអ្វីមួយឱ្យឪពុកម្តាយព្រួយចិត្តនោះឡើយ។
សម្តេចធិបតី ហ៊ុន ម៉ាណែត ក៏បានណែនាំដល់សិស្សានុសិស្សឱ្យខិតខំប្រឹងប្រែងរៀនសូត្រនៅសាលារៀន និងសំពះសម្តែងការគួរសមជាមួយឪពុកម្តាយ ព្រមទាំងជួយធ្វើការងារផ្ទះដើម្បីឱ្យឪពុកម្តាយសប្បាយចិត្តផងដែរ៕
