សម្តេចតេជោ ហ៊ុន សែន អញ្ជើញជួបសំណេះសំណាលជាមួយប្រតិភូកីឡាករ កីឡាការិនី មុនចេញទៅ ប្រកួតកីឡា SEA Games លើកទី ២៩ នៅ Malaysia

508

នៅព្រឹក​ថ្ងៃទី០៣ ខែសីហា ឆ្នាំ២០១៧នេះ សម្តេចអគ្គមហាសេ​នាប​តីតេជោ ហ៊ុន សែន នាយករដ្ឋមន្ត្រី នៃព្រះរាជា​ណា​ចក្រកម្ពុជា បានអញ្ជើញ​​ជួប​សំណេះ​សំណាលជាមួយ​ប្រតិភូកីឡាករ កីឡាការិនី រួមទាំងគ្រូបង្វឹក​សរុបចំនួន ២៧៤នាក់ មុននឹង​ចេញទៅចូលរួមប្រកួតកីឡា SEA Games នៅ Malaysia។

សម្តេចតេជោ ហ៊ុន សែន បានកោតសរសើរ​ចំពោះសមត្ថភាពក្មួយៗកីឡាករ កីឡាការិនី និងគ្រូបង្វឹក ដែលបានខិតខំ​ហ្វឹកហ្វឺនដល់កីឡាករ​ទាំងអស់ទទួលបានជ័​យជំនះជាបន្តបន្ទាប់។ បច្ចុប្បន្ន​ប្រទេសជាតិ​យើង ជាពិសេសនៅ​តាមសាលារៀនគឺមាន​ទីធ្លាហាត់កីឡា និងសំភារៈសម្រាប់ក្មួយៗ សិស្សា​នុសិស្ស​ហ្វឹកហាត់ទាំងនៅក្នុងទីក្រុង និងតាមជនបទ។ ជានិច្ចជាកាល សម្តេចតេជោ តែងតែជួយ ជំរុញលើកទឹកចិត្តលើវិស័យកីឡាជាបន្តបន្ទាប់ ដូចជាតាមរយៈការកសាងហេដ្ឋារចនាសម្ព័ន្ធកីឡាតាមសាលារៀនជាដើម។

សម្តេចតេជោ ហ៊ុន សែន បានកោតសរសើរ និងអបអរសាទរចំពោះកីឡាករ កីឡាការិនីទាំងអស់ ដែលកន្លងមកបានខិតខំប្រឹងប្រែងប្រកួតប្រជែង ក្នុងកំរិតអន្តរជាតិ ដែលទទួលបាននូវមេដាយ​ជាច្រើនសម្រាប់​ប្រទេសជាតិ ។

ក្នុងឱកាសនៃការទៅ​ចូលរួមប្រកួតកីឡា SEA Games នៅម៉ាឡេស៊ីខាងមុខ សម្តេចតេជោនាយករដ្ឋមន្ត្រី បានលើកទឹកចិត្តដល់​កីឡាករ កីឡាការិនីទាំងអស់ខិតខំ​ប្រឹងប្រែងដើម្បីទទួលបានជ័យ​ជំនះបន្ថែមទៀត ។

សម្តេចតេជោ បានបញ្ជាក់ច្បាស់ណាស់ថា ជោគជ័យគឺមិនស្ថិតលើ​ប្រទេសអ្នកមាន ឬប្រទេសអ្នកក្រ ឬប្រទេសធំ ឬ តូចនោះឡើយ សំខាន់ស្ថិតនៅ​លើការតាំងចិត្តហ្វឹកហាត់ ជាពិសេសកីឡាករ កីឡាការិនីទាំងអស់កុំចាញ់ច្រាបកីឡាករគេ ឬចាញ់ច្រាប​​ប្រទេសគេអោយសោះ សំខាន់គឺសមត្ថភាព និងការតាំងចិត្តរបស់យើង។

ជាមួយគ្នានោះ សម្តេចតេជោហ៊ុន សែន បានផ្តាំផ្ញើ​ដល់កីឡាករ កីឡាការិនីទាំងអ​ស់មុនទៅចូលរួមប្រកួតកីឡា SEA Games នៅម៉ាឡេស៊ី គឺ ទី១) ហាមប្រើប្រាស់​ថ្នាំលើក​ថាមពល​កម្លាំង ឬសារ​ធាតុញៀនដាច់ខាត។ ទី២) ត្រូវគោរពបទបញ្ជារ និងវិន័យកីឡានីមួយៗ​អោយបានត្រឹមត្រូវក្នុងពេលប្រកួត ។ មុននឹងបញ្ជាប់ការ​សំណេះសំណាល សម្តេចតេជោ នាយករដ្ឋមន្ត្រី បានបង្ហាញអោយកីឡាករ កីឡារការីនី ទាំងអស់បានដឹកពីការ​ខិតខំថែរក្សាសន្តិភាព របស់រាជរដ្ឋាភិបាលកម្ពុជា ដែលបានធ្វើអោយប្រទេសជាតិរីកចម្រើន អាជីវករ ពាណិជ្ជករ មានឱកាសប្រកបរបរទទួលទានដោយគ្មានការ​ភ័យខ្លាច ហើយជាពិសេស យុវជនយុវនារី ដែលជាកីឡាករ​ទាំងអស់មាន​ឱកាស​បាន​ហ្វឹកហាត់កីឡា នឹងបានទៅចូលរួមប្រកួតនៅលើក​ឆាកអន្តរជាតិ ជាពិសេសកីឡាស៊ីហ្គេម នៅប្រទេសម៉ាឡេស៊ី ឆ្នាំ ២០១៧ នេះ ។

សម្តេចតេជោ នាយករដ្ឋមន្ត្រីបានឧបត្ថម្ភលើកទឹកចិត្តដល់កីឡាករកីឡាការិនី និងគ្រូបង្វឹកចំនួន ២៧៤នាក់ ក្នុងម្នាក់ៗទទួលបាន $500 ។ សម្តេចតេជោ ហ៊ុន សែន បានជូនពរកីឡាករកីឡារិនីទាំងអស់ ទទួលបានជោគជ័យក្នុងការប្រកួត ព្រមទាំងពុទ្ធពរទាំងប្រាំប្រការ គឺ អាយុ វណ្ណៈ សុខៈ ពលៈ និង បដិភាណៈ កុំបីឃ្លៀងឃ្លាតឡើយ៕