សម្តេចធិបតី ហ៊ុន ម៉ាណែត៖ មូលហេតុចម្បងនៃការបាត់បង់ទឹកដី បាត់បង់អធិបតេយ្យភាព គឺដោយសារខ្មែរចេះតែឈ្លោះគ្នា

នៅក្នុងពិធីសំណេះសំណាលជាមួយអាចារ្យ អាចារិនីទូទាំងប្រទេសលើកទី៩ចំនួនប្រមាណ១០០០នាក់នៅព្រឹកថ្ងៃទី១៥ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា មូលហេតុចម្បងនៃការបាត់បង់ទឹកដី បាត់បង់អធិបតេយ្យភាព គឺដោយសារខ្មែរចេះតែឈ្លោះគ្នា ប៉ុន្តែបើយើងនៅតែមានការរួមគ្នាឯកភាពគ្នា ចេះជជែកពិភាក្សាគ្នា នោះនឹងមិនមានអំពើហិង្សាប្រឈមដាក់គ្នាទេ។

សម្តេចធិបតី ហ៊ុន ម៉ាណែត បានគូសបញ្ជាក់ថា ការបញ្ចេញមតិនិងទស្សនៈខុសគ្នា មិនមែនជាបញ្ហានោះទេ សំខាន់ឱ្យតែខ្មែរមានការយោគយល់អធ្យាស្រ័យគ្នាទៅវិញទៅមក។

សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ការឯកភាពជាតិ ការរួមគ្នាពង្រឹងអត្តសញ្ញាណជាតិ និងថែរក្សាអ្វីដែលជាផលប្រយោជន៍ជាតិខ្មែរ គឺជាការចាំបាច់ដែលខ្មែរគ្រប់ជំនាន់ត្រូវធ្វើ៕