ក្នុងពិធីបញ្ចុះបឋមសិលាសាងសង់សារៈមន្ទីរ សម្តេចព្រះព្រហ្មរតនមុនី ពិន សែម នៅខេត្តសៀមរាប នាព្រឹកថ្ងៃព្រហស្បតិ៍ទី១៨ ខែកក្កដា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា បច្ចុប្បន្ននេះមានការផ្សព្វផ្សាយព័ត៌មានក្លែងក្លាយជាច្រើន ដែលបើយើងមិនដឹងច្បាស់ពីព័ត៌មានពិតនោះទេ នោះអាចនឹងធ្វើឱ្យសង្គមយើងមានភាពចលាចលវឹកវរជាមិនខាន។
សម្តេចធិបតី ហ៊ុន ម៉ាណែត បានគូសបញ្ជាក់ថា ព័ត៌មានក្លែងក្លាយមួយចំនួនដែលបំពុលធ្វើឱ្យប្រជាពលរដ្ឋមានការព្រួយបារម្ភនោះ ភាគច្រើនគឺកើតចេញពីវិទ្យុ ដែលមាននិន្នាការប្រឆាំងរាជរដ្ឋាភិបាល។
សម្តេចធិបតី ហ៊ុន ម៉ាណែត ក៏បានគូសបញ្ជាក់ថា មានវិទ្យុមួយនោះដែលត្រូវបានក្រសួងព័ត៌មានដកអាជ្ញាបណ្ណរួចហើយ ដោយសារតែការផ្សាយព័ត៌មានមិនពិតញុះញង់បង្កចលាចល នៅតែបន្តផ្សព្វផ្សាយពីក្រៅប្រទេសប្រកបដោយចរិតញុះញង់ដដែល៕
