សៀមរាប ថ្ងៃទី១៧ ខែកញ្ញា ឆ្នាំ២០១៩ -ក្នុងខណៈដែលកម្ពុជាទទួលធ្វើជាម្ចាស់ផ្ទះរៀបចំកិច្ចប្រជុំថ្នាក់រដ្ឋមន្ត្រីជាន់ខ្ពស់ការងារលើកទី៥ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ក្នុងពីធីបើកសន្និសីទថ្នាក់រដ្ឋមន្ត្រីការងារលើកទី៣ ស្ដីពីកិច្ចសហប្រតិបត្តិការលើវិស័យការងារ សម្រាប់ប្រទេសកម្ពុជា ឡាវ មីយ៉ាន់ម៉ា ថៃ និង ប្រទេសវៀតណាម (CLMTV) ដែលប្រព្រឹត្តទៅនាថ្ងៃអង្គារ ៤រោច ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែកញ្ញា ឆ្នាំ២០១៩ នេះនៅខេត្តសៀមរាប។
សន្និសីទថ្នាក់រដ្ឋមន្ត្រីការងារលើកទី៣ ស្ដីពីកិច្ចសហប្រតិបត្តិការលើវិស័យការងារ សម្រាប់ប្រទេសកម្ពុជា ឡាវ មីយ៉ាន់ម៉ា ថៃ និងប្រទេសវៀតណាម នឹងធ្វើឡើងក្រោមប្រធានបទ« ការឆ្ពោះទៅកាន់កិច្ចគាំពារពលករទេសន្ដរប្រវេសន៍នៅក្នុងប្រទេស CLMTV ៖ កិច្ចសហ ប្រតិបត្តិការវិស័យសន្តិសុខសង្គម »។ គោលបំណងចម្បងរបស់សន្និសីទ គឺដើម្បីពិភាក្សា ស្វែងរកក្របខ័ណ្ឌរួមមួយពាក់ព័ន្ធនឹងការធ្វើចល័តភាពរបបសន្តិសុខសង្គម សម្រាប់ពលករ ទេសន្ដរប្រវេសន៍នៅក្នុងប្រទេស CLMTV ដូចជា លើកកម្ពស់បន្ថែមទៀតនៃកិច្ចសហប្រតិបត្តិ ការលើវិស័យការងារក្នុងប្រទេស CLMTV ។ ជំរុញឱ្យមានការបន្តការចែករំលែកបទពិសោធន៍ និងការងារល្អៗ ក្នុងចំណោមប្រទេស CLMTV ពាក់ព័ន្ធនឹងការការពារ និងការលើកកម្ពស់សិទ្ធិ ពលករទេសន្ដរប្រវេសន៍ ជាពិសេសចល័តភាពនៃរបបសន្តិសុខសង្គម។ ពិភាក្សាឱ្យមានការ ឯកភាពគ្នាលើយន្តការរួមមួយ ដើម្បីឈានទៅកំណត់អំពីការអនុវត្តចល័តភាព នៃរបបសន្តិ សុខសង្គមនាពេលអនាគត។ ធ្វើការឆ្ពោះទៅកាន់ការរៀបចំក្របខ័ណ្ឌរួមមួយសម្រាប់ប្រទេស CLMTV ស្ដីពីចល័តភាពនៃរបបសន្តិសុខសង្គមសម្រាប់ពលករទេសន្ដរប្រវេសន៍។ ជាងនេះ ទៀតតាមរយៈប្រធានបទនេះ ពិតជាបានឆ្លើយតបទៅនឹងគោលនយោបាយ និងយុទ្ធសាស្ត្រ របស់រាជរដ្ឋាភិបាល ដូចជាក្របខ័ណ្ឌគោលនយោបាយជាតិគាំពារសង្គម (២០១៦-២០២៥) យុទ្ធសាស្ត្រចតុកោណដំណាក់កាលទី៤ និងគោលនយោបាយ ស្ដីពីទេសន្ដរប្រវេសន៍ការងារ សម្រាប់ប្រទេសកម្ពុជា (២០១៩-២០៣០) ដែលបានផ្ដល់ការគាំពារសិទ្ធិ និងអត្ថប្រយោជន៍ របស់ពលករទេសន្ដរប្រវេសន៍។
ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈមានប្រសាសន៍ថា ប្រមុខរដ្ឋាភិបាលនៃបណ្តាប្រទេសអាស៊ានបានប្តេជ្ញារួមគ្នាក្នុងការការពារ និងលើកកម្ពស់សិទ្ធិពលករទេសន្តរប្រវេសន៍តាមរយៈការចេញសេចក្តីថ្លែងការណ៍អាស៊ាន ស្តីពីការការពារ និងការលើកកម្ពស់សិទ្ធិពលករទេសន្តរប្រវេសន៍ នៅទីក្រុងសេប៊ូ ប្រទេសហ៊្វីលីពីន ឆ្នាំ២០០៧ និងបានចេញឯកច្ឆន្ទភាពអាស៊ាន ស្តីពីការការពារ និងការលើកកម្ពស់សិទ្ធិពលករទេសន្តរប្រវេសន៍ នៅទីក្រុងម៉ានីល ប្រទេសហ្វ៊ីលីពីននាឆ្នាំ២០១៧។ ទោះបីជាមានលិខិតូបករណ៍អាស៊ាន និងបទដ្ឋានអន្តរជាតិក៏ដោយ រដ្ឋជាសមាជិកបានដាក់ចេញនូវ គោលនយោបាយ និងបទដ្ឋានគតិយុត្ត នៅក្នុងប្រទេសរបស់ខ្លួនដើម្បីធានាថា សិទ្ធិផលប្រយោជន៍កិត្តិយស និងសេចក្តីថ្លែថ្នូររបស់ពលករទេសន្ដរប្រវេសន៍ត្រូវបានធានា ក្នុងនោះប្រទេសជាសមាជិកបានបង្កើតឱ្យមានកិច្ចសហប្រតិបត្តិការទ្វេភាគី និងពហុភាគីជាច្រើន។ ជាក់ស្តែងកិច្ចសហប្រតិបត្តិការលើ វិស័យការងារក្នុងក្របខ័ណ្ឌនៃប្រទេស CLMTV ត្រូវបានចាប់ផ្តើមឡើងក្នុងឆ្នាំ២០១៥ នៅប្រទេសថៃ ស្របតាមស្ថានភាពជាក់ស្ដែងនៃតម្រូវការប្រទេសទាំង៥នេះ។ តាមរយៈកិច្ចប្រជុំជាបន្តបន្ទាប់ក្នុងក្របខ័ណ្ឌនៃកិច្ចសហប្រតិបត្តិការនេះ យើងបានរួមគ្នាផ្តួចផ្តើមគិតគូរ ជាពិសេសលើចល័តភាពនៃរបបសន្តិសុខសង្គម សម្រាប់ពលករទេសន្តរប្រវេសន៍ នៃបណ្តាប្រទេសទាំង៥៕
ដោយ ជឹម ណារី
