ភ្នំពេញ ថ្ងៃទី១៩ ខែកញ្ញា ឆ្នាំ២០១៩ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញទៅបំពេញទស្សនកិច្ចផ្លូវការនៅសាធារណរដ្ឋកូរ៉េ និងចូលរួមកិច្ចប្រជុំកិច្ចប្រជុំកំពូលអនុស្សាវរីយ៍កូរ៉េ-អាស៊ាន និងកិច្ចប្រជុំកំពូលមេគង្គ-កូរ៉េ ដែលនឹងធ្វើឡើងនៅទីក្រុងប៊ូសាន នាខែវិច្ឆិកា ឆ្នាំ២០១៩ ខាងមុខ។
នេះបើយោងតាមការឱ្យដឹងរបស់ ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីសម្ដេចតេជោ ហ៊ុន សែន បានអនុញ្ញាតឱ្យលោកបណ្ឌិត វន់ ម៉ុកលី (Won Meok Lee)សាកលវិទ្យាធិការនៃសាកលវិទ្យាល័យ កន់ យ៉ាង និងលោកបណ្ឌិត ហ៊ី សូគីម (Hee Soo Kim)ស្ថាបនិកមូលនិធិអប់រំ កន់ យ៉ាង នៃសាធារណរដ្ឋកូរ៉េ ចូលជួបសម្ដែងការគួរសម នា ព្រឹកថ្ងៃព្រហស្បតិ៍ ៦រោច ខែភទ្របទ ឆ្នាំកុរឯកស័ក ព.ស.២៥៦៣ ត្រូវនឹងថ្ងៃទី១៩ ខែកញ្ញា ឆ្នាំ២០១៩ នៅវិមានសន្តិភាព។
នៅក្នុងជំនួបនេះលោកបណ្ឌិត Won Meok Lee បានជម្រាបជូនសម្ដេចតេជោ នាយករដ្ឋមន្ត្រីថា លោកបានធ្លាប់មកកាន់ប្រទេសកម្ពុជាម្ដងរួចមកហើយ កាលពី១០ឆ្នាំមុន ហើយក៏បានជួបសម្ដេចតេជោនាយករដ្ឋមន្ត្រីផងដែរកាលពេលនោះ។ លោកបណ្ឌិតបានអរគុណចំពោះសម្ដេចតេជោ ហ៊ុន សែន ដែលបានអនុញ្ញាតឱ្យរូបលោក និងគណៈប្រតិភូចូលជួបសម្តែងការគួរសម និងពិភាក្សាការងារនាពេលនេះ។ លោកបានជម្រាបជូនសម្តេចតេជោថា កាលពីម្សិលមិញនេះលោកបានអញ្ជើញទៅទស្សនកិច្ចនៅមន្ទីរពេទ្យព្រះអង្គឌួង ជាពិសេសនៅមជ្ឈមណ្ឌលមន្ទីរពេទ្យព្យាបាលជំងឺភ្នែក ដែលជួយដោយប្រទេសកូរ៉េតាមរយៈអង្គការKoica និងបានទៅទស្សនកិច្ចនៅសាកលវិទ្យាល័យភូមិន្ទភ្នំពេញផងដែរ ដោយសារកន្លងមកមានកិច្ចសហប្រតិបត្តិការសាកលវិទ្យាល័យរបស់គាត់ និងសាកលវិទ្យាល័យភូមិន្ទភ្នំពេញ។
លោកបណ្ឌិតក៏បានជម្រាបជូនសម្តេចតេជោថា កន្លងមក លោកបានជួយដល់ការងារផ្នែកសុខាភិបាលច្រើន ជាពិសេសការយកចិត្តទុកដាក់ និងការព្យាបាលជំងឺភ្នែកតាមរយៈមជ្ឈមណ្ឌលនៅមន្ទីពេទ្យព្រះអង្គឌួង ហើយលោកប្ដេជ្ញាថា នឹងខិតខំជួយដល់ កម្ពុជាជាបន្តបន្ទាប់ទៀតផងដែរ។
សម្ដេចតេជោ ហ៊ុន សែន ក៏បានថ្លែងនូវការអរគុណដល់សាធារណរដ្ឋកូរ៉េ ដែលកន្លងមកធ្លាប់បានជួយដល់ប្រទេសកម្ពុជាលើវិស័យជាច្រើន ជាពិសេសដល់ផ្នែកវិស័យសុខាភិ បាលក៏ដូចជាវិស័យអប់រំ។ សម្តេចតេជោនាយករដ្ឋមន្ត្រីបានមានប្រសាសន៍ថា សម្ដេចពិតជាអរគុណទៅដល់ភាគីកូរ៉េ ដែរបានជួយក្នុងការផ្ដល់នូវការព្យាបាលជំងឺភ្នែក ដល់ប្រជាជនកម្ពុជា ដែលប្រជាជនជាច្រើនមានបញ្ហាជំងឺភ្នែកនេះ ហើយពួកគាត់ ពិតជាត្រូវការចាំបាច់នូវសេវាព្យាបាលបញ្ហានៃជំងឺភ្នែក រួមទាំងជំងឺគថ្លង់ផងដែរ។
សម្ដេចបានបន្តថា កន្លងមករាជរដ្ឋាភិបាលកម្ពុជាក៏បានយកចិត្តទុកដាក់ក្នុងការចូលរួមចំណែកជួយថែទាំ និងព្យាបាលបងប្អូនប្រជាពលរដ្ឋដែលមានជំងឺភ្នែក និងគថ្លង់ ពិការជាដើម ជាពិសេសកន្លងមកនេះក៏មានអង្គការគ្រួសារថ្មីដែលបានយកចិត្តទុកដាក់ក្នុងការជួយដល់កុមារពិការនិងគថ្លង់ ហើយថ្មីៗនេះអង្គការគ្រួសារថ្មីនេះ ត្រូវបានបញ្ចូលឱ្យស្ថិតនៅក្រោមការគ្រប់គ្រងរបស់រាជរដ្ឋាភិបាលកម្ពុជាវិញ ដូច្នេះនេះគឺជាអ្វីដែលរាជរដ្ឋាភិបាលកម្ពុជាបានយកចិត្តទុកដាក់ចំពោះបញ្ហានេះ។
សម្តេចតេជោបានមានប្រសាសន៍ទៀតថា កន្លងមកនេះរាជរដ្ឋាភិបាលក៏ទទួល បានជោគជ័យផងដែរ ទាក់ទងទៅនឹងការបង្ការទប់ស្កាត់នូវជំងឺមួយចំនួនដូចជា ជំងឺគ្រុនស្វិតដៃជើង ជំងឺកញ្ជ្រិល និងជំងឺតេតាណូសជាដើម។ បច្ចុប្បន្ននេះកម្ពុជា កំពុងតែយកចិត្តទុកដាក់ទៅលើការប្រយុទ្ធប្រឆាំងជំងឺរបេង ជំងឺលើសឈាម និងជំងឺគ្រុនចាញ់ជាដើម។
សម្ដេចតេជោក៏បានមានប្រសាសន៍ផងដែរថា បច្ចុប្បន្ននេះ រាជរដ្ឋាភិបាលកម្ពុជា ក៏បានធ្វើការវិនិយោគយ៉ាងច្រើនទៅលើវិស័យសង្គមកិច្ច ជាពិសេសក្នុងការផ្ដល់នូវថវិកាជាតិ ទៅលើវិស័យអប់រំ វិស័យសុខាភិបាល ដើម្បីផ្ដល់នូវប្រយោជន៍ ក៏ដូចជាបម្រើនូវសេវាដល់ បងប្អូនប្រជាពលរដ្ឋ។
សម្តេចតេជោក៏បានជម្រាបជូនលោកបណ្ឌិតផងដែរថា ក្នុងពេលខាងមុខនេះ ពោលគឺ នៅក្នុងអំឡុងខែវិច្ឆិកា សម្ដេចតេជោនឹងអញ្ជើញទៅបំពេញទស្សនកិច្ចផ្លូវការនៅសាធារណរដ្ឋ កូរ៉េ ដើម្បីចូលរួមកិច្ចប្រជុំ២ ដែលទី១គឺកិច្ចប្រជុំអាស៊ាន-កូរ៉េ និងទី២ កិច្ចប្រជុំកំពូលមេគង្គ-កូរ៉េ ដែលគ្រោងនឹងធ្វើនៅទីក្រុងប៊ូសាននាពេលខាងមុខនេះ។ តបតាមការអញ្ជើញ របស់លោកបណ្ឌិតសាកលវិទ្យាធិការនៃសាកលវិទ្យាល័យកន់យ៉ាង សម្ដេចតេជោនឹងរក ពេលវេលាសមស្រប ដើម្បីទៅទស្សនកិច្ចនៅសាកលវិទ្យាល័យកន់យ៉ាង នៃប្រទេសកូរ៉េ។ ក្នុងឱកាសនោះផងដែរ សម្តេចតេជោនាយករដ្ឋមន្ត្រី ក៏មានគម្រោងជួបជាមួយពលករ ខ្មែរដែលបម្រើការងារនៅឯប្រទេសកូរ៉េនោះផងដែរ៕
ដោយ ជឹម ណារី 
