ភ្នំពេញ ថ្ងៃទី៣១ ខែឧសភា ឆ្នាំ២០១៩ –ឯកឧត្ដម Abe Shinzo នាយករដ្ឋមន្ត្រីជប៉ុនបានបញ្ជាក់ក្នុងជំនួបជាមួយសម្ដេចតេជោ ហ៊ុនសែន ថា ជប៉ុននឹងបន្តជួយដល់ប្រទេសកម្ពុជា រួមទាំងកិច្ចការប្រជាធិបតេយ្យផងដែរ។
នេះបើយោងតាមការឱ្យដឹងរបស់ ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីជំនួបរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ និង ឯកឧត្ដម Abe Shinzo នាយករដ្ឋមន្ត្រីជប៉ុន នាព្រឹកថ្ងៃទី៣១ ខែឧសភា ឆ្នាំ២០១៩ នៅទីក្រុងតូក្យូ ប្រទេសជប៉ុន ក្នុងខណៈដែលសម្ដេចតេជោ ដឹកនាំគណៈប្រតិភូទៅចូលរួមក្នុងសន្និសីទអន្តរជាតិលើកទី២៥ ស្តីពីអនាគតសម្រាប់អាស៊ី។ នៅក្នុងជំនួបនេះ សម្តេចតេជោ ហ៊ុន សែន បានថ្លែងអំណរគុណនាយករដ្ឋមន្រ្តីជប៉ុន ដែលគាំទ្រកម្ពុជា និង ឆ្លៀតឱកាសនេះ សម្តេចក៏បានថ្វាយព្រះពរដល់ព្រះចៅអធិរាជជប៉ុនថ្មី។ ឯកឧត្តមនាយករដ្ឋមន្ត្រីជប៉ុនបានស្វាគមន៍សម្តេចតេជោនាយករដ្ឋមន្ត្រី និងបានបញ្ជាក់ថា ជប៉ុននឹងបន្ត ជួយដល់ប្រទេសកម្ពុជា រួមទាំងកិច្ចការប្រជាធិបតេយ្យផងដែរ។
ឯកឧត្តម Abe Shinzo បានកោតសរសើរ ដល់ស្ត្រីខ្មែរពីររូប ដែលបានធ្វើការនៅប្រទេសជប៉ុន ដោយចាត់ទុកថាជាគំរូដែលធ្វើការបានល្អ ហើយឯកឧត្តមបានមានប្រសាសន៍ថា យើងនឹងបន្តធ្វើការពង្រឹងទំនាក់ទំនងទ្វេភាគីរវាងប្រទេសទាំងពីរ ដើម្បីមានកិច្ចសហប្រតិបត្តិការបន្ថែមទៀត ជាពិសេសពាក់ព័ន្ធទៅនិងកំពង់ផែនៅខេត្តព្រះសីហនុ ដែលជប៉ុនធ្លាប់បានធ្វើសហប្រតិបត្តិការរួចមកហើយ។ ពាក់ព័ន្ធនឹងបញ្ហាតំបន់ ឯកឧត្តមបានលើកឡើងថា ធ្វើយ៉ាងណាឲ្យតំបន់របស់យើងមានលក្ខណៈសេរីនិងបើកចំហ និងចង់ឲ្យមានកិច្ចសហប្រតិបត្តិការជាមួយប្រទេសកម្ពុជាផងដែរ។
ជាការឆ្លើយតបសម្ដេចតេជោនាយករដ្ឋមន្ត្រីបានថ្លែងអំណរគុណចំពោះឯកឧត្តមនាយករដ្ឋមន្ត្រីជប៉ុន Abe Shinzo ដែលបានលើកឡើងអំពីការគាំទ្រ និងកិច្ចសហប្រតិបត្តិការ ជាមួយកម្ពុជា។ ឆ្លៀតឱកាសនេះសម្តេចតេជោនាយករដ្ឋមន្ត្រីក៏បានថ្លែងអំណរគុណផងដែរ ដល់ប្រទេសជប៉ុន ជាពិសេសសម្រាប់ជំនួយលំហូសេដ្ឋកិច្ចទាំងឡាយ ប្រកបដោយ ប្រជាធិបតេយ្យ ហើយសន្យាថានឹងបន្តធ្វើការជាមួយគ្នាក្នុងក្របខណ្ឌ ភាពជាដៃគូ យុទ្ធសាស្ត្រ ជាមួយគ្នាជាមួយប្រទេសជប៉ុន។ រីឯគំនិតផ្ដួចផ្ដើមដែលនាយករដ្ឋមន្ត្រីជប៉ុនបានលើកឡើងអំពីលក្ខណៈសេរីនិងបើកចំហរនៅក្នុងតំបន់ សម្ដេចបាន ចាត់ទុកថាគឺពិតជាល្អណាស់ ដែលនឹងធ្វើឲ្យមានស្តង់ដារជាមួយនឹងបណ្តាប្រទេសផ្សេងទៀតនៅក្នុងតំបន់នេះ។
សម្ដេចតេជោក៏បានអរគុណ ឯកឧត្តមនាយករដ្ឋមន្ត្រីជប៉ុន ដែលបានសរសើរ ដល់ស្ត្រីខ្មែរដែលធ្វើការនៅប្រទេសជប៉ុន ដែលចាត់ទុកថាជាគំរូ ធ្វើការបានល្អនោះ។ សម្ដេចក៏បានរំម្លឹកអំពីការចុះហត្ថលេខាលើកិច្ចព្រមព្រៀងទាំងពីរ ដែលព័ន្ធនពាក់ព័ន្ធនឹងការអភិវឌ្ឍធនធាន មនុស្សនិងគម្រោងសាងសង់ផែនៅខេត្តព្រះសីហនុ ហើយសម្ដេចក៏បានថ្លែងអំណរគុណសារជាថ្មីម្តងទៀតចំពោះ ការអភិវឌ្ឍសេដ្ឋកិច្ច កន្លងមកនេះ ដែលបានរួមចំណែកធ្វើឲ្យកំណើនសេដ្ឋកិច្ចរបស់ប្រទេសកម្ពុជារក្សាបានក្នុងរង្វង់ជាង៧%ប្រចាំឆ្នាំ ដែលធ្វើឲ្យថវិកាជាតិមានការកើនឡើង និងមានការកែទម្រង់ជាច្រើននៅក្នុងប្រទេសកម្ពុជា។ សម្ដេចតេជោបន្តថា ទោះបីជាមានការអភិវឌ្ឍន៍រីកចម្រើន ប៉ុន្តែកម្ពុជានៅមានការប្រឈមដែលត្រូវការជំនួយបន្ថែមទៀតជាពិសេសកម្ចីសម្បទាន និងជួយធ្វើយ៉ាងណាឲ្យប្រទេសជប៉ុនលើកទឹកចិត្តឲ្យមានវិនិយោគិនមកបណ្ដាក់ទុននៅក្នុងប្រទេសកម្ពុជា។ សម្ដេចលើកឡើងថា ថ្វីត្បិត ជប៉ុនមានវិនិយោគក្នុងលំដាប់ថ្នាក់ទី ៦ នៅប្រទេសកម្ពុជា ប៉ុន្តែវិនិយោគិនជប៉ុនគឺប្រកបដោយគុណភាព ។ យ៉ាងណាមិញ ដូចជាក្រុមហ៊ុនជប៉ុនមួយចំនួនដែលបានទៅបណ្ដាក់ទុននៅក្នុងប្រទេសកម្ពុជាហើយនោះ គឺជាក្រុមហ៊ុនដែល មានគុណភាព។សម្តេចក៏បានស្នើឲ្យនាយករដ្ឋមន្រ្តីជប៉ុនបន្តជួយធ្វើយ៉ាងណា ជំរុញលើកទឹកចិត្តឲ្យវិនិយោគទុនជប៉ុនទៅ បណ្ដាក់ទុននៅក្នុងប្រទេសកម្ពុជាបន្ថែមទៀត។
ទន្ទឹមនេះសម្ដេចតេជោ ក៏បានលើកនូវសំណើមួយចំនួនទៀត ជូនឯកឧត្តមនាយករដ្ឋមន្ត្រីជប៉ុនឲ្យជួយ ដែលក្នុងនោះមាន ទី១ បន្តលើការដោះមីននៅកម្ពុជាដល់អង្គការស៊ីម៉ាក់ ដែល គម្រោង ៣ ឆ្នាំតទៅមុខទៀត ត្រូវការថវិកាប្រមាណ ២៨ លានដុល្លារអាម៉េរិក សម្រាប់ខេត្ត ៣ មានបាត់ដំបង ប៉ៃលិន ពោធិ៍សាត់។ ទី២.ដោយសារឆ្នាំនេះកម្ពុជាមានកង្វះអគ្គិសនី ដោយសារបម្រែបម្រួលអាកាសធាតុ ដែលធ្វើឲ្យអគ្គិសនីកម្ពុជា ប្រើប្រាស់មិនគ្រប់គ្រាន់ ដូច្នេះសម្ដេចស្នើឲ្យភាគីជប៉ុនជួយ ពិចារណាលើសំណើនេះ ជាពិសេសការពិភាក្សាកន្លងមករវាងអង្គការចៃកា (JICA) និងក្រសួងរ៉ែនិងថាមពល ដែលបានចុះសិក្សាក្នុងការតបណ្ដាញពីព្រំដែនឡាវមកភ្នំពេញដែលមានប្រវែងជាង ៣៥០ គីឡូម៉ែត្រ ដើម្បីទិញភ្លើងចេញពីប្រទេសឡាវ។ ពាក់ព័ន្ធនឹងបញ្ហាថែរក្សាសុខសន្តិភាពក្នុងក្របខណ្ឌអង្គការសហប្រជាជាតិដែលកន្លងមកប្រទេសទាំងពីរបានបញ្ជូន កងទ័ពមួកខៀវទៅកាន់បណ្ដាប្រទេសមួយចំនួននោះ សម្ដេចក៏បានស្នើ ឲ្យកងទព័មួកខៀវនៃប្រទេសទាំងពីរ មានការផ្លាស់ប្ដូរព័ត៌មានពីគ្នាទៅវិញទៅមក សំដៅធ្វើយ៉ាងណាកាត់បន្ថយនូវការគំរាមកំហែង ដល់ទាហានមួកខៀវនេះ។ មិនត្រឹមតែប៉ុណ្ណោះទេគឺធ្វើយ៉ាងណាបញ្ចៀសកុំឲ្យមានការបាត់បង់ជីវិតដល់កងទ័ពមួកខៀវនេះ។ សម្តេចតេជោនាយករដ្ឋមន្ត្រីបានអញ្ជើញឯកឧត្តមនាយករដ្ឋមន្ត្រី shinzo abe អញ្ជើញទៅចូលរួមកិច្ចប្រជុំកំពូលអាស៊ីអឺរ៉ុបនៅរាជធានីភ្នំពេញ ក្នុងឆ្នាំ ២០២០ ខាងមុខ។
ជាការឆ្លើយតបឯកឧត្តមនាយករដ្ឋមន្ត្រីជប៉ុន Abe Shinzo បានមានប្រសាសន៍ថាពាក់ព័ន្ធនឹងការវិនិយោគពីជប៉ុនទៅកម្ពុជា ឯកឧត្តមស្វាគមន៍ចំពោះ វិធានការ ដែលសម្ដេចតេជោបានដាក់ចេញ កន្លងមកនេះ ក្នុងការកាត់បន្ថយការចំណាយរបស់ធុរកិច្ចនៅក្នុងប្រទេសកម្ពុជា នឹក្នុងប្រទេសកម្ពុជាដើម។ទន្ទឹមនេះឯកឧត្តមក៏បានស្នើឱ្យសម្ដេចតេជោនាយករដ្ឋមន្ត្រី បន្តមានវិធានការផ្សេងៗទៀត ដើម្បីធ្វើយ៉ាងណាឲ្យការ ប្រកួតប្រជែង និងស្នើសុំឲ្យមានការប្រជុំគណៈកម្មការកម្ពុជា-ជប៉ុន ដើម្បីដោះស្រាយនូវបញ្ហាប្រឈមទាំងឡាយ ហើយឯកឧត្តមបានមានប្រសាសន៍ថាអ្វីដែលជា ការចាប់អារម្មណ៍សំខាន់របស់ជប៉ុនគឺកំពង់ផែ នៅខេត្តព្រះសីហនុ ដោយជប៉ុនត្រៀមសហការជាមួយប្រទេសកម្ពុជា ជួយសិក្សាផែនការមេ សម្រាប់ផែនៅប្រទេសកម្ពុជា ហើយឧត្តមបានស្វាគមន៍ ចំពោះការពិភាក្សារវាងអង្គការចៃកានិងកំពង់ផែនៅខេត្តព្រះសីហនុ។
ចំពោះការអភិវឌ្ឍធនធានមនុស្សវិញ ឯកឧត្តមនាយករដ្ឋមន្ត្រីជប៉ុនបានមានប្រសាសន៍ថា ជប៉ុនគឺកំពុងតែយកចិត្តទុកដាក់ជួយទៅលើការបណ្តុះបណ្តាលធនធានមនុស្សនេះហើយ ដែលជានិច្ចកាលជប៉ុនតែងតែចូលរួមក្នុងការជួយបណ្តុះបណ្តាលធនធានមនុស្សដល់ប្រទេសកម្ពុជា ហើយពាក់ព័ន្ធនឹងការអភិវឌ្ឍនៅទីក្រុងភ្នំពេញជប៉ុនបានផ្ដល់ ជំនួយមួយចំនួនដូចជាកម្ចី ហិរញ្ញប្បទាន ជាពិសេសគឺសម្រាប់ការអភិវឌ្ឍហេដ្ឋារចនាសម្ព័ន្ធផ្លូវថ្នល់ ហើយពាក់ព័ន្ធនឹងពលករមកធ្វើការនៅប្រទេសជប៉ុននេះ និងប្រើប្រាស់មជ្ឈមណ្ឌលវប្បធម៌ជប៉ុន តាមរយៈការផ្លាស់ប្ដូរវប្បធម៌រវាងគ្នា។
ពាក់ព័ន្ធនឹងការស្នើសុំឲ្យជួយលើវិស័យអគ្គិសនី ឯកឧត្តមនាយករដ្ឋមន្ត្រីជប៉ុន បានឲ្យភាគីកម្ពុជាធ្វើការពិភាក្សាជាមួយឯកអគ្គរាជទូតជប៉ុនប្រចាំទីក្រុងភ្នំពេញ រីឯសំណើពីបញ្ហាការដោះមីនក៏ដូច្នោះដែរ ក៏សូមឲ្យធ្វើការពិភាក្សាជាមួយនឹងអគ្គរាជទូតជប៉ុនប្រចាំនៅទីក្រុងភ្នំពេញផងដែរ។ ឯកឧត្តមនាយករដ្ឋមន្ត្រីជប៉ុនបានស្វាគមន៍កម្ពុជាដែលនឹងរៀបចំធ្វើជាម្ចាស់ផ្ទះក្នុងកិច្ចប្រជុំកំពូលអាស៊ីអឺរ៉ុប នៅឆ្នាំ២០២០ ខាងមុខ ដែលពេលនោះយើងនឹងអាចពិភាក្សាគ្នាលើបញ្ហាមួយចំនួន។ ឯកឧត្តមបានគូសបញ្ជាក់ថាឯកឧត្តមនឹងបន្ត ទទួលយុវជនវ័យក្មេងឲ្យមកសិក្សាដកពិសោធន៍នៅប្រទេសជប៉ុនផងដែរ ហើយឯកឧត្តមសង្ឃឹមថាសូមឱ្យសម្ដេចបន្ត ការកែទម្រង់នៅក្នុងប្រទេសកម្ពុជា ជាពិសេសការពង្រឹងច្បាប់។ ពាក់ព័ន្ធនិងបញ្ហាតំបន់ ឯកឧត្តមក៏បានលើកឡើងផងដែរអំពីបញ្ហាឧបទ្វីបកូរ៉េ ដែលកូរ៉េខាងជើងមានការបាញ់កាំជ្រួចដែលចាត់ទុកជាការរំលោភ សន្ធិសញ្ញានៃក្រុមប្រឹក្សាសន្តិសុខអង្គការសហប្រជាជាតិ ហើយអ្វីដែលសំខាន់ ជាងគេទៀត ត្រូវតែអនុវត្តឲ្យបាន ហ្មត់ចត់នូវសេចក្តីសម្រេចរបស់ របស់ក្រុមប្រឹក្សាសន្តិសុខអង្គការសហប្រជាជាតិ ហើយសង្ឃឹមថាកម្ពុជានឹងចូលរួមក្នុងការអនុវត្តន៍នៅ សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិផងដែរ។ ដូច្នេះឯកឧត្តមចង់ឲ្យជប៉ុននិងកម្ពុជាមានការសហការគ្នា ដើម្បីអនុវត្តលើបញ្ហាពាក់ព័ន្ធលើបញ្ហាឧបទ្វីបកូរ៉េរួមទាំងបញ្ហានៃការចាប់ជំរិតជនជាតិជប៉ុនផងដែរ។
ឯកឧត្ដមនាយករដ្ឋមន្ត្រីជប៉ុនក៏បានលើកឡើងពីបញ្ហាសមុទ្រចិនខាងត្បូងដោយបានស្នើឲ្យសម្តេចតេជោសហការក្នុងក្របខណ្ឌអាស៊ានជំរុញការតាក់តែងនូវក្រមCOCអោយបានឆាប់ ហើយពាក់ព័ន្ធការស្នើរបស់សម្តេចឱ្យមានការផ្លាស់ប្តូរព័ត៍មានរវាងទាហានមួកខៀវនោះ ឯកឧត្ដមនាយករដ្ឋមន្ត្រីជប៉ុន ក៏បានថ្លែងគាំទ្រនៅការផ្លាស់ប្ដូរព័ត៌មានរបស់ទាហានមួកខៀវនៃប្រទេសទាំងពីរ ដែលកំពុងប្រតិបត្តិការក្រោមឆ័ត្រអង្គការសហប្រជាជាតិ។ជាមួយរាល់ការស្នើពីនាយករដ្ឋមន្ត្រីជប៉ុនខាងលើ សម្តេចក៏ឆ្លើយតបថានឹងចូលរួមសហការឱ្យបានល្អ៕
ដោយ ជឹម ណារី
