សម្តេច​តេជោ ហ៊ុន សែន ជួបពិភាក្សា​ការងារ​ជាមួយ​ឧបនាយក​រដ្ឋមន្រ្តី និងជារដ្ឋមន្ត្រី​ហិរញ្ញវត្ថុឡាវ

សម្តេចអគ្គ​មហា​សេនា​បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានជួបពិភាក្សាការងារជាមួយ ឯកឧត្តម សំឌី ឌួងឌី (Somdy Douangdy) ឧបនាយករដ្ឋមន្ត្រី និងជារដ្ឋមន្រ្តីក្រសួងហិរញ្ញវត្ថុឡាវ នៅវិមានសន្តិភាព រសៀលថ្ងៃទី ២៨ ខែ កក្តដានេះ។

ឯកឧត្តម Somdy Douangdy បានសំដែងនូងការអបអរសាទរជូនចំពោះ​សម្តេចតេជោ និងគណបក្សប្រជាជនដែលបានទទួលជោគជ័យក្នុងការបោះឆ្នោតឃុំ សង្កាត់កន្លងមកនេះ ហើយក៏បាន សំដែងនូវការអបអរសាទរជូនចំពោះរដ្ឋាភិបាលកម្ពុជាដែលសេដ្ឋកិច្ចរបស់កម្ពុជានាពេលនេះ កំពុងតែ មានកំណើន។

ឯកឧត្តម Somdy Douangdy ក៏បានគោរពរាយការណ៍ជូន សម្តេចតេជោ អំពីការដែលឯកឧត្តមបានជួបជាមួយទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានធ្វើការពិភាក្សាគ្នាយ៉ាងស្អិតរមួត ហើយតាមរយៈជំនួបនោះ ក៏បានបង្កើននូវទំនាក់ទំនងដ៏ល្អ រវាងក្រសួងទាំងពីរ គឺក្រសួងហិរញ្ញវត្ថុកម្ពុជា និងក្រសួងហិរញ្ញវត្ថុឡាវ។ ទន្ទឹមនឹងនេះ គឺរិតែបង្កើននូវ ទំនាក់ទំនងសហប្រតិបត្តិការកាន់តែល្អរឹងមាំរវាងនាយកដ្ឋាននិងនាយកដ្ឋាននៃក្រសួងទាំងពីរផងដែរ។

ឯកឧត្តម Somdy Douangdy ក៏បានជំរាបជូន សម្តេចតេជោ ផងដែរថា ឯកឧត្តម បានចែករំលែក និងទទួលនូវបទពិសោធន៍ល្អៗពីគ្នាទៅវិញទៅមក ហើយក៏បានកត់សម្គាល់ឃើញថា ការគ្រប់គ្រង ហិរញ្ញវត្ថុនៅកម្ពុជាគឺបានល្អណាស់ ទាំងផ្នែកនយោបាយនិងការគ្រប់គ្រង។ ឯកឧត្តម ក៏បានទទួល នូវបទពិសោធន៍យ៉ាងច្រើន ពីកម្ពុជាដែលពាក់ព័ន្ធនឹងការគ្រប់គ្រងហិរញ្ញវត្ថុ និងនយោបាយនៃការគ្រប់ គ្រងហិរញ្ញវត្ថុនេះ។

ជាការឆ្លើយតប សម្តេចតេជោ ហ៊ុន សែន បានថ្លែងអំណរគុណចំពោះការផ្តាំផ្ញើសួរសុខទុក្ខអំពីឯកឧត្តម ថង លួនស៊ីសូលីត នាយករដ្ឋមន្ត្រីឡាវ ជូនចំពោះ សម្តេច និងបានសំដែងនូវអំណរគុណផងដែរ ដែលេឯកឧត្តមបានចូលរួមអបអរសាទរនូវលទ្ធផលនៃការបោះឆ្នោតរបស់កម្ពុជា និងការវិវត្តរីកចម្រើន ផ្នែកសេដ្ឋកិច្ចរបស់កម្ពុជា។ សម្តេចតេជោ មានសេចក្តីរីករាយយ៉ាងខ្លាំងដែលមិត្តឡាវទុកចិត្តកម្ពុជា លើការគ្រប់គ្រងហិរញ្ញវត្ថុ និងនយោបាយហិរញ្ញវត្ថុរបស់កម្ពុជា។ ក្នុងន័យនេះ សម្តេចតេជោ ក៏បានចែក រំលែកនូវបទពិសោធន៍ផ្ទាល់ក្នុងការគ្រប់គ្រងប្រទេសជាតិ ក៏ដូចជាការគ្រប់គ្រងប្រមូលពន្ឋនិងពង្រឹង ប្រាក់ចំណូលថវិកាជាតិ។ ជាមួយគ្នានេះដែរ គឺប្រទេសទាំងពីរមានកិច្ចការសហការគ្នាជាច្រើនដែលត្រូវ ពង្រឹងដើម្បីផលប្រយោជន៍រួម៕

ពត៌មានទាក់ទង

ពត៌មានផ្សេងៗ