សម្តេច​តេជោ ហ៊ុន សែន អញ្ជើញ​ជួបពិភាក្សា​ការងារ​ជាមួយ ឯកអគ្គ រដ្ឋទូតជប៉ុន

បន្ទាប់ពីបាន​ជួបពិភាក្សាការងារជាមួយឯកអគ្គរដ្ឋ​ទូតបារាំង​រួចមក នៅព្រឹកថ្ងៃទី២៦ ខែកក្តដា ឆ្នាំ ២០១៧​ ​ដដែលនេះ សម្តេចអគ្គ​មហាសេនា​បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួប​ពិភាក្សាកា​រងារប​ន្តជាមួយ ឯកឧត្តម ហូរីណូអូជិ ហ៊ីដេអ៊ីហ្សា (Horinouchi Hidehisa) ឯកអគ្គ​រដ្ឋ​ទូតជប៉ុន​ប្រចាំកម្ពុជា នៅវិមាន​សន្តិភាព រាជធានីភ្នំពេញ។

ឯកឧត្តម Horinouchi Hidehisa បានជំរាបជូន សម្តេចតេជោ ហ៊ុន សែន អំពីដំណើរទស្សនកិច្ចរបស់ សម្តេច​តេជោ ទៅកាន់ប្រទេស​ជប៉ុន​នា​ពេល​ខាងមុខ ដែលក្នុងនោះរួមមាន​ការពិភា​ក្សា​អំពី​កិច្ច​សហប្រតិបត្តិការ​ទៅ​លើវិស័យ​សេដ្ឋកិច្ច វិស័យពាណិជ្ជកម្ម ដែលភាគីទាំង​ពីរជាដៃ​គូយុទ្ធសាស្ត្រ ហើយក៏នឹង​ពិភាក្សា​ទៅលើការ​តភ្ជាប់ ការអភិវឌ្ឍវិស័យ​ធនធាន​មនុស្ស ការសម្រួល​ចរាចរណ៍នៅ​ទីក្រុង​ភ្នំពេញ កិច្ចសហ​ប្រតិបត្តិការ​លើវិ​ស័យ​វប្បធម៌ និងការផ្លាស់​ប្តូរទំនាក់​ទំនងរវាង​ប្រជាជន​កម្ពុជា និង​ប្រជាជនជប៉ុន និង ការពិភាក្សាអំពីការរៀបចំ​អោយមាន​អគ្គកុង​ស៊ុលជប៉ុន​នៅខេត្ត​សៀមរាប។ ដំណើរ​ទស្សនកិច្ចរបស់​សម្តេច​តេជោ​នាយក​រដ្ឋមន្ត្រី​ទៅកាន់​ប្រទេស​ជប៉ុន​នាពេល​ខាងមុខនេះ គឺចំពេលខួប​២៥ឆ្នាំ របស់​ជប៉ុន​ដែល​បញ្ជូន​ក្រុមរ​ក្សាសន្តិភាព​មក​កាន់​កម្ពុជា ហើយក៏ត្រូវ​នឹងខួប​៦០ឆ្នាំនៃដំណើរ​ទស្សនកិច្ចរបស់ នាយករដ្ឋមន្ត្រី​ជប៉ុន​លើកទី១ មកកាន់​ប្រទេស​កម្ពុជា កាលពីក្នុងឆ្នាំ​១៩៥៧។ នៅក្នុង​ដំណើរទស្សនកិច្ចនៅប្រទេសជប៉ុនខាងមុខនេះ សម្តេចតេជោ ហ៊ុន សែន នឹងចូលរួមសិក្ខាសាលាដែលមានការចូល​រួមពី​អ្នកវិនិយោគ​ទុនជប៉ុនជាច្រើននាក់ផងដែរ។

ជាការឆ្លើយតប សម្តេចតេជោ​នាយករដ្ឋមន្ត្រី បានឯកភាព​ជាគោលការណ៍​ចំពោះកម្មវិធី ដែលបាន​ដាក់ចេញទាំងនេះ ហើយសម្តេចតេជោ បានស្នើអោយ​ភាគីជប៉ុន មានការសម្រប​សម្រួល​បន្ថែម​ទៀត​នៅក្នុង កម្មវិធីនេះ ក្នុងករណីមានការផ្លាស់ប្តូរ។ ជាការបញ្ជាក់នូវ​ការស្វាគមន៍ លោកឯកអគ្គរដ្ឋ​ទូតជប៉ុន ប្រចាំកម្ពុជាបា​នជំរាបជូនស​ម្តេចតេជោថា នាយករដ្ឋមន្ត្រីជប៉ុន រួមនិងមន្រ្តីជាន់ខ្ពស់ និងប្រជាជនជប៉ុន នឹងរង់ចាំទទួលស្វាគមន៍ សម្តេចតេជោ ដោយកក់ក្តៅចំពោះដំណើរទស្សនកិច្ចរបស់សម្តេចទៅកាន់ប្រទេសជប៉ុនខាងមុខនេះ៕

ពត៌មានទាក់ទង

ពត៌មានផ្សេងៗ