ជូនចំពោះឯកឧត្តម លោក ជំទាវ ថ្នាក់ដឹកនាំ ក្រសួងស្ថាប័ន ថ្នាក់ជាតិ,
អភិបាលរាជធានី ខេត្ត និងបណ្តាលកងកម្លាំងប្រដាប់អាវុធ,
ដោយសារទឹកជំនន់បានកើតឡើងនៅក្នុងប្រទេសរបស់យើង ហើយមានប៉ះពាល់ទៅដល់បណ្តាលខេត្តមួយចំនួន ខ្ញុំសូមឱ្យឯកឧត្តម លោកជំទាវ អភិបាលរាជធានី ខេត្ត ទាំងអស់ ក្តាប់និងតាមដានឱ្យជាប់ និងដោះស្រាយឱ្យទាន់ពេលវេលា ក្នុងករណីដែលមានទឹកជំនន់ធ្វើឱ្យមានប៉ះពាល់នៅក្នុងតំបន់ទទួលខុសត្រូវរបស់ខ្លួន ជាពិសេស សូមយកចិត្តទុកដាក់ទៅលើការជួយសង្គ្រោះប្រជាពលរដ្ឋនិងទ្រព្យសម្បត្តិរបស់ប្រជាពលរដ្ឋដែលរងផលប៉ះពាល់នៅក្នុងដំណាក់កាលនេះ។ ត្រូវត្រៀមរៀបចំកម្លាំង មធ្យោបាយសម្ភារដើម្បីការសង្គ្រោះបានទៅដល់ប្រជាពលរដ្ឋ។ ក្នុងករណីដែលមានទឹកជំនន់ប៉ះពាល់នៅក្នុងតំបន់ជាបណ្តារាជធានី ខេត្ត ខ្ញុំសូមឱ្យឯកឧត្តម ទេសរដ្ឋមន្រ្តី គន់ គីម អនុប្រធានទី១ គណៈកម្មការជាតិគ្រប់គ្រងគ្រោះមហន្តរាយ បន្តតាមដានឱ្យជាប់ និងសហការជាមួយអភិបាលរាជធានីខេត្ត ត្រៀមមធ្យោបាយធ្វើអន្តរាគមន៍ សង្គ្រោះបន្ថែមនៅក្នុងករណីដែលរាជធានីខេត្ត ត្រូវការ។
ដូចគ្នាដែរ សូមឯកឧត្តម អគ្គមេបញ្ជាការ អគ្គស្នងការ មេបញ្ជាការ កងរាជអាវុធហត្ថលើផ្ទៃប្រទេស មេបញ្ជាការកងទ័ពជើងគោក ជើងទឹក ជើងអាកាស ត្រៀមមធ្យោបាយ ត្រៀមកម្លាំង និងសម្ភារចាំបាច់នៅក្នុងការត្រៀមអន្តរាគមន៍សង្គ្រោះទៅដល់ប្រជាពលរដ្ឋនៅក្នុងតំបន់ ដែលអាចរងផលប៉ះពាល់ដោយសារទឹកជំនន់។ ជាមួយគ្នានេះ សូមឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ក៏ដូចជាស្ថាប័នពាក់ព័ន្ធ ត្រៀមស្បៀង សម្ភារ បរិក្ខារ ចាំបាច់ក្នុងករណីដែលត្រូវបញ្ចេញទៅឱ្យប្រជាពលរដ្ឋដែលត្រូវរងគ្រោះដោយទឹកជំនន់ ក្នុងករណីមានការស្នើសុំពីរាជធានី ខេត្ត។ ជាមួយគ្នានេះ ក្រសួងកសិកម្ម និងស្ថាប័នដែលពាក់ព័ន្ធបានត្រៀមរួចជាស្រេចនូវស្រូវពូជ និងសម្ភារចាំបាច់នានា ក្នុងករណីដែលមានផលប៉ះពាល់ធំ ហើយអាចឈានទៅដល់ការស្តារឡើងវិញ ដូចដែលយើងធ្លាប់មានហេតុការណ៍ពីមុនមក។
សូមគិតគូពីការត្រៀមផែនការស្រោចស្រង់ឡើងវិញ នៅក្នុងករណីដែលមានការចាំបាច់ ក្នុងករណីដែលមានការខូចខាតដំណាំ ដូចកាលពីដែលយើងរងផលប៉ះពាល់ធំដោយសារទឹកជំនន់ប៉ុន្មានឆ្នាំមុន។ សូម គិតគូរនិងត្រៀមលក្ខណៈជាមុន ត្រៀមដោះស្រាយបញ្ហាជាយថាហេតុដែលអាចកើតមាន។ សូមឯកឧត្តម លោកជំទាវទទួលគោលការណ៍នេះ ហើយចាត់តាំងអនុវត្តឱ្យបានទាន់ពេលវេលា និងដោយប្រសិទ្ធភាព សូមអរគុណ៕
