សម្រង់​សង្កថា សម្តេចតេជោ ហ៊ុន សែន ថ្លែងក្នុងពិធីសម្ពោធមហាវិថី សម្តេចតេជោ ហ៊ុន សែន ទីក្រុងរណបជើងឯក

190

មហាវិថី សម្ដេចតេជោ ហ៊ុន សែន ភ្ជាប់ទីក្រុងភ្នំពេញ និងខេត្តកណ្ដាល

ថ្ងៃនេះ ខ្ញុំព្រះករុណាខ្ញុំ ពិតជាមានការរីករាយដែលបានមកចូលរួម ដើម្បីសម្ពោធដាក់អោយប្រើប្រាស់នូវ​មហាវិថីដ៏ធំ ដែលតភ្ជាប់រវាងទីក្រុងភ្នំពេញ និងខេត្តកណ្ដាល។ នេះជាសមិទ្ធផលថ្មីមួយទៀត សម្រាប់ព្រះ រាជាណាចក្រកម្ពុជា និយាយជារួម និងនិយាយដោយឡែក សម្រាប់ប្រជាជននៅរាជធានីភ្នំពេញ និងខេត្ត​កណ្ដាលតែម្ដង។ ខ្ញុំព្រះករុណាខ្ញុំ ពិតជាមានការរីករាយ ដោយបានពិនិត្យឃើញថា តាមរយៈនៃការខិតខំ របស់អាជ្ញាធររាជធានីភ្នំពេញ និងខេត្តកណ្ដាល ព្រមទាំងក្រុមហ៊ុន ING Holdings បានខិតខំកសាងនូវ សមិទ្ធផលនេះ ដែលអាចចាត់ទុកថា ជាសមិទ្ធផលមួយក្នុងចំណោមសមិទ្ធផលដ៏ធំ នៅក្នុងព្រះរាជាណា ចក្រកម្ពុជារបស់យើង។

បើយើងពិនិត្យអំពីទំហំ​​ នៃការចំណាយសម្រាប់ការសាងសង់នូវផ្លូវមួយខ្សែនេះ ដើម្បីបញ្ចៀសចរាចរណ៍​សម្រាប់ទំនាក់ទំនងរវាងទីក្រុងភ្នំពេញ និងភាគខាងត្បូងទីក្រុងភ្នំពេញ ហើយក៏ដើម្បីអភិវឌ្ឍនូវតំបន់ជើង​ឯកនេះផង។ ថវិកាដែលត្រូវចំណាយ(មាន)រហូតដល់ ៧៦ លានដុល្លារសហរដ្ឋអាមេរិក និងនៅលើទំហំផ្ទៃ​ដី ៥៤ ហិកតា ហើយផ្ទៃដីនេះ មិនទាន់គិតជាតម្លៃនៅឡើយទេ។ បើយើងគិតក្នុងរង្វង់ត្រឹមតែ ៥០០ ដុល្លារ​សហរដ្ឋអាមេរិកក្នុងមួយម៉ែត្រការ៉េ គឺចំនួន ៥៤ ហិកតា ដែលយើងកំពុងធ្វើផ្លូវនេះ គឺច្បាស់​ជាចំនួន​ទឹក​ប្រាក់នេះធំ។ តម្រូវការរបស់ប្រទេសដែលកំពុងមានការអភិវឌ្ឍមួយ ពិតជាយ៉ាងដូច្នេះឯង។

ទីក្រុងភ្នំពេញរីកពីជាង ៣០០ គីឡូម៉ែត្រក្រឡា មកជាង ៧០០ គីឡូម៉ែត្រក្រឡា

នៅឆ្នាំ ១៩៧៩ នៅក្នុងខែ មេសា នេះឯង ជាពិសេសគឺចូលឆ្នាំខ្មែរ ពេលនោះស្ថានភាពនៅទីក្រុងភ្នំពេញ​របស់​យើងគ្មានចរាចរណ៍នោះទេ។ (មាន)តិចតួចណាស់។ សូម្បីតែនៅម្ដុំវិមានឯករាជ្យដែលខ្ញុំព្រះករុណាខ្ញុំ នៅទីនោះ ក៏នៅសល់​នូវដើមដូង ស្បូវ ហើយនិងទន្ទ្រានខែត្រនៅឡើយទេ។ ក៏ប៉ុន្តែជាបណ្ដើរៗ យើងបាន​ធ្វើ​អោយ​ទីក្រុងខ្មោចមួយនេះ ក្លាយទៅជាទីក្រុងដែលមានការរស់ឡើងវិញដ៏អស្ចារ្យ។ ឥឡូវនេះ ទីក្រុងនេះ កាន់​តែ​មានការរស់រវើក បន្ថែមទៅដោយទីក្រុងរណបដទៃទៀតដែលមានការពាក់ព័ន្ធ។ បណ្ដាទីក្រុងរណប​នោះ​ហើយ ដែលបង្កើតឡើងនូវហេដ្ឋារចនាសម្ព័ន្ធចាំបាច់នានា ដើម្បីអាចក្លាយទៅជាទីក្រុងរណបបាន។

​ពិនិត្យពីប្រវត្តិ នៃអតីតនៃរាជធានីភ្នំពេញរបស់យើង ចាប់តាំងពីពេលកកើតរហូតមកដល់ពេល​បច្ចុ​ប្បន្ន​​។ ពី​ផ្ទៃ​ដីទំហំតូចមួយនៅតំបន់ព្រះបរមរាជវាំង និងវត្តភ្នំ និងការបន្តរីកលូតលាស់នៅជាហូរហែ ជាពិសេសក្នុង​ដំ​ណាក់កាលឆ្នាំ ១៩៥០-១៩៦០ …  ទីក្រុងភ្នំពេញ ដែលមុននេះ មានផ្ទៃដីត្រឹមតែជាង ៣០០ គីឡូម៉ែត្រ​កា​រ៉េ ឥឡូវមានទំហំផ្ទៃដីប្រមាណជិត ៧០០ គីឡូម៉ែត្រការ៉េ រួចស្រេចទៅហើយ។ ម្យ៉ាងទៀត ទន្ទឹមនឹងការ​រៀប​បើកទូលាយពីជាង ៣០០ គីឡូម៉ែត្រការ៉េ ទៅជិត ៧០០ គីឡូម៉ែត្រការ៉េ វាមានការអភិ​វឌ្ឍតាម​បែប​ស៊ី​ជម្រៅរបស់វាថែមទៀត។

អ្វីទៅដែលហៅថា ការអភិវឌ្ឍតាមបែបស៊ីជម្រៅ? (ន័យ)នៅត្រង់ ដីនៅទីក្រុងភ្នំពេញ និងជាយទីក្រុង​ភ្នំ​ពេញ​របស់យើង កាលពីមុននេះ ដីមួយហិកតា មានសំណង់ត្រឹមតែ ៥ ពាន់ ឬ ៣ ពាន់ ម៉ែត្រការ៉េ​តែ​ប៉ុណ្ណោះ ក៏ប៉ុន្តែឥឡូវនេះ វាមិនដូច្នោះទៀតទេ ដីមួយហិកតានៅទីក្រុងភ្នំពេញបច្ចុប្បន្ន អាចមានសំណង់​រហូត​ទៅ​ដល់ ៥ ម៉ឺន ឬ ១០ ម៉ឺនម៉ែត្រការ៉េ ក៏អាចថាបាន។ ពីដើម យើងមានអាគារត្រឹមតែ ៣ ជាន់ និង ៨ ជាន់ខ្ពស់ជាងគេហើយ ឥឡូវយើងមានអាគារដែលមានកម្ពស់រហូតទៅដល់ ៤០ ជាន់ ឬ ៥០ ជាន់ ហើយ​គ្រោង​ទៅពេលខាងមុខនេះ នឹងអាចមានអគាររហូតទៅដល់ ១២៥ ជាន់ ដែលអាចចាត់ទុកថា ជាអគារ​ខ្ពស់​ជាង​គេ​នៅក្នុងចំណោមអាស៊ីអាគ្នេយ៍របស់យើងនេះ ដែលមានកម្ពស់រហូតទៅដល់ ៥២០ ម៉ែត្រ។

នេះជាស្ថានភាពប្រែប្រួលមួយដ៏សំខាន់ ដែលព្រះរាជាណាចក្រកម្ពុជារបស់យើងបានអភិវឌ្ឍ ហើយក៏ត្រូវ​បំ​ផ្លិច​បំ​ផ្លាញទៅវិញ​ដោយសារសង្រ្គាមនៅឆ្នាំ ១៩៧០ និងដោយសាររបបប្រល័យពូជសាសន៍ ប៉ុល ពត។ ខ្លួន​ខ្ញុំព្រះករុណាខ្ញុំ ពិតជាមិននឹកស្មានដល់សោះថា អ្វីៗក៏បានកើតឡើងនៅក្នុងដំណាក់កាលដែ​ល​ខ្ញុំ​ព្រះ​ករុ​ណាខ្ញុំ រួមចំណែកដឹកនាំ និងកាន់តួនាទីជាអ្នកដឹកនាំ កើតឡើងនៅក្នុងដំណាក់កាលនេះនោះទេ។ ខ្ញុំ​ព្រះ​ករុណាខ្ញុំ ស្រមៃឃើញ​​នូវស្ថានភាពដើមដែលយើងបានឆ្លងកាត់ដ៏លំបាកជាមួយគ្នានៅពេលនោះ គ្រាន់​តែ​ទឹកផឹក ក៏យើង​ត្រូវទៅយកទឹកនៅទន្លេមេគង្គយកមកប្រើប្រាស់ដែរ។ ខ្ញុំព្រះករុណាខ្ញុំ និងសម្ដេច ហេង សំរិន ដែលនៅផ្ទះជិតគ្នា ព្រលឹមឡើងត្រូវទៅដងទឹក ត្រូវទៅអូសទឹកពីទន្លេមេគង្គយកមកប្រើនៅ​ត្រឹម(ផ្ទះ)​វិមាន​ឯករាជ្យនេះ។ លំបាកណាស់ ទម្រាំមានពេលដូចសព្វថ្ងៃនេះ។

ការស្នើសុំប្រសិទ្ធនាមផ្លូវ ថា មហាវិថីសម្តេចតេជោ

តាមរយៈរបាយការណ៍របស់ឯកឧត្តម ប៉ា សុជាតិវង្ស អភិបាលរាជធានីភ្នំពេញ បានស្នើសុំប្រសិទ្ធនាម​(ផ្លូវ​នេះ)​ថា មហាវិថីសម្ដេចតេជោ ហ៊ុន សែន។ ដាក់យ៉ាងម៉េចក៏ដាក់អញ្ចុះ។ តិចគេជេរខ្ញុំទៀត? អ្នកចាំតែជេរ នៅ​តែ​ជេរ។ អានេះគេដាក់មហាវិថីសម្តេច ហ៊ុន សែន។ ប៉ុន្តែមិញគេប្រកាសថា មហាវិថីសម្តេចតេជោ សម្តេច​តេជោទទេឬ ថែម ហ៊ុន សែន សម្តេចតេជោ ហ៊ុន សែន។ តេជោ នៅអតីតកាល​ដែល​យើង​ធ្លាប់​ស្គាល់​គឺ មានតេជោយ៉ត តេជោមាស ហើយនិងមានតេជោដំឌិន និង​មានតេជោស្អីមួយទៀត? មានបឹង​តេ​ជោ​ណានោះ? ពីដើមយើងស្គាល់ ហើយតេជោដំឌិនហ្នឹងគឺ មិនប្រាកដថាមានពិតឬអត់ទៅទៀត? ព្រោះថា តេ​ជោនោះចេះជ្រែកដី។ ប៉ុន្តែ មានតេជោមាស និងតេជោយ៉ត។ ឥឡូវ តេជោសែនកំពុងតែឈរនេះ។ ព្រះ​មហា​ក្សត្រព្រះអង្គបានសព្វ​ព្រះរាជហឫទ័យប្រទានគោរមងារជាសម្តេចអគ្គមហាសេនាបតីតេជោ ដែល​មុន​​​នេះ មានតែតេជោ ឬ​ឧកញ៉ាតេជោ ប៉ុន្តែខ្ញុំព្រះករុណាខ្ញុំនេះ គឺក្នុងសតវត្សរ៍ទី ២១ ដែលមានងារជា​សម្តេច និង​មានងារជាតេជោ។

ទូលព្រះបង្គំខ្ញុំ មិនធ្វើអោយព្រះមហាក្សត្រ និងប្រជាពលរដ្ឋមានការខកព្រះទ័យ និងខកចិត្តទេ។ តេជោ​​​នេះ គឺកំពុងប្រឈមជាមួយសភាពការណ៍ទំាង​ឡាយ ហើយក៏នៅរួមសុខរួមទុក្ខជាមួយប្រជាពលរដ្ឋ ដែល​ពេល​ណា​មានការលំបាក ពេលនោះតេជោចេញមុខ។ ពេលដែលមានការសប្បាយមិនសូវជាឃើញប៉ុន្មានទេ ប៉ុន្តែ​​ពេល​ដែលលំបាកគឺច្បាស់ជាឃើញមុខ។ តែយ៉ាងណាក៏ដោយ ការរួមសុខរួមទុក្ខជាមួយគ្នា គឺជាការ​ចាំ​បាច់​ណាស់ បើមិនដូច្នោះទេ យើងនឹងបាត់បង់ត្រឡប់ទៅវិញ នូវអ្វីដែលជាសុខសន្តិភាព ដែលជាគ្រឹះ​មូល​​ដ្ឋានសម្រាប់ការអភិវឌ្ឍរបស់ប្រទេសជាតិ។ គ្មានសន្តិភាព គ្មានការអភិវឌ្ឍនោះទេ។

និយាយមកដល់ផ្លូវនេះ វាបង្កើតបាននូវភាពងាយស្រួលសម្រាប់ប្រជាជននៅរាជធានីភ្នំពេញរបស់យើង ក៏​ដូច​​ជាប្រជាជននៅក្នុង​ខេត្ត​កណ្តាល ប្រជាជនដែលរស់នៅភាគខាងត្បូងទីក្រុងភ្នំពេញ ដូចជាការធ្វើ​ដំ​ណើរ​​ទៅ​កាន់ខេត្តតាកែវ ខេត្តកំពតជាដើម។ ត្រូវចេញដំណើរតាមផ្លូវនេះ ដែលមុននេះយើងប្រើផ្លូវ​តែមួយ​ខ្សែ គឺផ្លូវជាតិលេខ ២ តភ្ជាប់ទៅផ្លូវព្រះនរាយន៍។ អញ្ចឹងផ្លូវនេះ នៅពេលដែលមានបញ្ហាចរាចរណ៍ម្តងៗ គឺ​កក​ស្ទះ​នៅទីនោះ ប៉ុន្តែតាមរយៈផ្លូវមួយខ្សែនេះ គឺអាចផ្តល់អោយប្រជាពលរដ្ឋរបស់យើង ងាយស្រួលក្នុង​ការ​ធ្វើ​ដំ​ណើរឆ្លង​កាត់​តំបន់នេះ។ ពិតណាស់ ការធ្វើដំណើរនៅទីនេះ ផ្លូវវាធំ។ ហើយផ្លូវធំនេះ ក៏មិនមែន​បាន​សេច​ក្តីថា ផ្លូវធំហើយវាលែងគ្រោះថ្នាក់ចរាចរណ៍ ដោយសារតែការបើកធ្វេសប្រហែសនោះទេ។ សូម​ប្រជា​ពល​រដ្ឋ​មេត្តាបន្ត​គោរពច្បាប់ចរាចរណ៍ផ្លូវគោក ដើម្បីធានាអាយុជីវិតខ្លួនឯងផង និងអាយុជីវិតអ្នក​ដទៃ​​ផង។

ដាក់កម្មវិធីចុះ ដាក់កម្មវិធីឡើង អត់មានថ្ងៃសម្រាកមុនចូលឆ្នំា

ថ្ងៃនេះ​ខ្ញុំព្រះករុណាខ្ញុំ សម្ពោធដាក់អោយប្រើប្រាស់ នូវសមិទ្ធផលខាងត្បូងរាជធានីភ្នំពេញ សម្រាប់ថ្ងៃស្អែក​យើង​នឹង​សម្ពោធ​ដាក់អោយប្រើប្រាស់ នូវសមិទ្ធផលនៅខាងជើងរាជធានីភ្នំពេញម្តង គឺទាក់ទងទៅនឹង​​ហេដ្ឋា​​រចនា​សម្ព័ន្ធវិស័យកីឡា។ ដល់ថ្ងៃខានស្អែកគឺ ថ្ងៃទី ៥ នឹងសម្ពោធដាក់​អោយ​ប្រើប្រាស់​នូវ​​សមិទ្ធ​ផល​ភាគ​ខាង​ត្បូងទីក្រុងភ្នំពេញម្តងទៀត គឺរោងចក្រទឹកស្អាតនៅនិរោធ។ ដល់ថ្ងៃខានស្អែកមួយ ថ្ងៃ ៦ ទៅ​ខាង​ជើងរាជធានី​ភ្នំពេញម្តងទៀតហើយ។ អញ្ចឹងដាក់កម្មវិធីចុះ កម្មវិធីឡើង អត់កម្មវិធីសម្រាកមុន​ចូល​ឆ្នំា​ខ្មែរ។ ឥឡូវមិនដឹងថា «រំាអញ្ចេះ» បានអត់ ប៉ុន្តែអា«រំាអញ្ចេះ»ដូចជារំាស្រួលជាង«រំាញីកែងជើង»។ ឆ្នំានេះ គឺដំ​ណើរដែលនៅសេសសល់រយៈពេល ១០ ថ្ងៃទៀត ទើបចូលឆ្នំាមកដល់ ប៉ុន្តែការងារមានរាល់ថ្ងៃ​ទាំង​អស់។ អញ្ចឹង​ទេ ប៉ុន្តែចេះតែប្រឹង ដោយសារតែនេះជាកាតព្វកិច្ចរបស់ប្រមុខរាជរដ្ឋាភិបាលនៅក្នុងតំណែង គ្មាន​ជំ​រើស​​ណាផ្សេង ក្រៅពីខិតខំនោះទេ។

ត្រូវសិក្សា និងសាកល្បងចុះចតយន្តហោះលើផ្លូវនេះ

ខ្ញុំព្រះករុណាខ្ញុំ ជាថ្មីម្តងទៀត ថ្លែងនូវការកោតសរសើរចំពោះ​ក្រុមហ៊ុន ING Holdings ដែលខ្ញុំហៅកាត់​ថា អ៊ីងហូលឌីង ជាមួយនឹងការខិតខំរបស់រដ្ឋបាល​រាជធានី​ភ្នំពេញ ក៏ដូចជារដ្ឋបាលខេត្តកណ្តាល ព្រមទាំង​បង​ប្អូន​ដែលរស់នៅតាមតំបន់នេះ ដែលមានផលប៉ះពាល់។ យើងបានកសាងផ្លូវមួយខ្សែនេះ ដើម្បីជាផល​ប្រ​យោជន៍សាធារណៈរបស់ជាតិ។ ផ្ទៃដីចំនួន ៥៤ ហិកតា ដែលជាទីតំាងផ្លូវនេះ គឺជាដីសាធារណៈ​របស់​រដ្ឋ​។ ខ្ញុំស្នើថា ឯកឧត្តម ទៀ បាញ់ ក្នុងក្របខណ្ឌជារដ្ឋមន្ត្រីក្រសួងការពារជាតិ ហើយមាន​ការសិក្សាអំពី​លទ្ធភាពនៃការចុះចតយន្តហោះក្នុងគ្រាមានអាសន្ន ព្រោះថា ពេលខ្លះមានតម្រូវការរបស់វា។ ឧទាហរណ៍ ព្រ​លានយន្តហោះនៅឯពោធិចិនតុង វាមានបញ្ហាដែលមិនអាចចុះចតបាន។ យន្តហោះគេអាចធ្វើ​ដំណើរ​វិល​ត្រ​ឡប់​​​ទៅចុះចតនៅឯសៀមរាប ទៅចុះចតនៅឯទីក្រុងហូជីមិញ ឬក៏មានអ្នកខ្លះសល់សំាងច្រើន អាច​ទៅចុះ​ចត​​ដល់ទៅបាងកក។ ក៏ប៉ុន្តែ សម្រាប់យន្តហោះដែលមានសំាងតិច ដែលមិនអាចធ្វើដំណើរ​ដល់​សៀមរាប មិនអាច​ធ្វើដំណើរដល់ទីក្រុងហូជីមិញ និងបាងកក ជម្រើសដែលល្អជាងគេគឺនៅតំបន់នេះ។

គួរតែ​មាន​ការ​សិក្សា អំពីការចុះចតក្នុងគ្រាមានអាសន្ន នូវប្រភេទយន្តហោះខ្លះ ជាពិសេស គឺប្រភេទយន្ត​ហោះ​កង្ហាល់​ ATR ដែលអាចចុះចតបាននាគ្រាមានអាសន្ន ព្រោះផ្លូវរបស់យើងនេះ អាចទ្រទ្រង់បាន ហើយ​ចម្ងាយដែល​វា​អាច​រត់​ក៏អាចចុះចតបាន ដើម្បីបញ្ចៀសគ្រោះថ្នាក់ជាយថាហេតុ។ ចំណុចនេះ​ទាមទារ​ឲ្យ​មានការសិក្សា ហើយរហូតទៅដល់​មានការចុះសាកល្បងនូវប្រភេទយន្តហោះយោធា មិនមែន​ជា​យន្ត​ហោះ​(ប្រភេទ)មិចទេ ក៏ប៉ុន្តែជាយន្តហោះ​ដឹកជញ្ជូនផងដែរ។ ចំណុចនេះ គ្រាន់តែជាការផ្តល់អនុសាសន៍ ដើម្បី​បញ្ចៀសជាយថាហេតុ នូវគ្រោះថា្នក់ដែលអាចកើតឡើង សម្រាប់ការចុះចតនូវយន្តហោះ។ នេះជាផ្លូវ​ដែល​គ្មានការប៉ះពាល់ បើទោះបីជាមានសំណង់នៅសងខាងមួយចំនួន ក៏នៅសេសសល់ ផ្លូវនេះទំហំធំ​ណាស់ ៦០ ម៉ែត្រ ហើយពីស្តដែលត្រូវរត់នោះ ក៏មិនធំពេកដែរ។ អញ្ចឹងទេ យើងក៏អាចកែច្នៃ។ នៅក្នុងតំ​បន់​ខ្លះ គេក៏អាចបង្កប់ភ្លើង ដែលជាចំណុចសម្រាប់មើលឃើញ ក្នុងការចុះចតនៅពេលយប់។ ពេលដែល​មាន​អាសន្នភ្លាម ភ្លើងត្រូវឆេះឡើង សម្រាប់ការចុះចតនៅពេលយប់ មិនមែនគ្រាន់តែពេលថ្ងៃប៉ុណ្ណោះទេ។

ជូនពរឆ្នាំថ្មី ទេវតាតាមថែរក្សាប្រជាពលរដ្ឋទូទាំងប្រទេស

យើងបានសមិទ្ធផលនេះបន្ថែមទៀត សម្រាប់សម្រួលដល់ប្រជាពលរដ្ឋ ហើយអរគុណណាស់សម្រាប់ការ​ចូល​រួមអភិវឌ្ឍក្នុងរយៈពេលកន្លងទៅ។ គ្មានការចូលរួម នឹងគ្មានការអភិវឌ្ឍបានទេ។ ឥឡូវ ទីក្រុងភ្នំពេញ​កាន់​តែរីកធំឡើងៗ មិនមែនគ្រាន់តែទីក្រុងភ្នំពេញមួយទេ បណ្តាខេត្ត/ក្រុងដទៃទៀតសុទ្ធតែមានការរី​ក​ចម្រើន​​ដូចគ្នា តាមរយៈហេដ្ឋារចនាសម្ព័​ន្ធ​តភ្ជាប់។ ប៉ុន្មានថ្ងៃទៀត ដល់ពេលដែលយើងចូលឆ្នាំហើយ។ ឥឡូវនេះ ជាពេលវេលាដែលមន្រ្តីរាជការ កងកម្លាំងប្រដាប់អាវុធ និងកម្មករ/ការិនី ក៏ដូចជាប្រជាជននៅ​ទូទាំង​ប្រទេសត្រៀមទទួលនូវទេវតាឆ្នាំថ្មី ឆ្នាំរកា នព្វស័ក ព.ស ២៥៦១ គឺជាទេវតាវិលជុំ ក្នុងរយៈពេល ១២ ឆ្នាំ មួយឆ្នាំផ្ទេរឲ្យកូនទេវតាម្តង ប៉ុន្តែនៅតែពូជទេវតា​ដដែលហ្នឹង។ អស់ពីព្រះនាងច្បង ដល់ព្រះនាង​បន្ទាប់ ព្រះនាងរហូត កូនទេវតាទាំងអស់ ប៉ុន្តែ យើងក៏មិនត្រូវភ្លេចទេវតា ដែលរក្សានៅទីនេះជាប់ជាប្រចាំ គឺ​ភូមិទេវតា រុក្ខទេវតា និង​អាកាសទេវតា ក៏សូមថែទាំយើងទាំងអស់គ្នា ក៏ដូចជាប្រជាជនទូទាំងប្រទេស និង​ថែទាំតំបន់អភិវឌ្ឍន៍នេះ និងផ្លូវនេះ សូមឲ្យទាំងអស់គ្នាទទួលបានសេចក្តីសុខ និងការរីកចម្រើន។

ខែ មេសា ប្រាក់បៀវត្សរ៍ចាប់ផ្តើមឡើង បូកប្រាក់ឧបត្ថម្ភ

ខែ ៣ ទើបបានកន្លងផុត ជាមួយនឹងប្រាក់បៀវត្សរ៍បានបើករួចស្រេចទៅហើយ។ ឥឡូវ ប្រា​ក់បៀវត្សរ៍ត្រូវ​បាន​ឡើង ចាប់ពីថ្ងៃ ១ ខែ មេសា នេះ ហើយនឹងបើកឲ្យបានមុនថ្ងៃ ១០ ​ដើម្បីធានាថា​នឹងបានប្រាក់នេះ​សម្រាប់​​ការចូលឆ្នាំជាមួយនឹងការបន្ថែមប្រាក់ឧបត្ថម្ភសម្រាប់ការចូលឆ្នាំ ម្នាក់ៗ ៥ ម៉ឺនរៀល ដែលរដ្ឋត្រូវ​ការ​ប្រាក់​​ប្រមាណជាង ៧ លានដុល្លារសហរដ្ឋអាមេរិកដើម្បីជួយឧបត្ថម្ភ។ ឆ្នាំទៅបានម្នាក់ ៤ ម៉ឺនរៀល ឆ្នាំ​នេះ​ឡើងបាន ៥ ម៉ឺនរៀល។ សាច់ប្រាក់ពិតជាចេញច្រើន តែតម្លៃប្រាក់រៀលរបស់យើង​មិនទាន់ឃើញ​សញ្ញានៃការចុះថ្លៃនោះទេ។ សង្ឃឹមថា ឆ្នាំនេះ ចូលឆ្នាំជាមួយនឹងធាតុអាកាសល្អ មិនក្តៅពេក ហើយក៏មិន​ត្រ​ជាក់ពេក តែយ៉ាងណាក៏ដោយ ត្រូវស្តាប់នូវការជូនដំណឹងជាបន្តបន្ទាប់ពីក្រសួងធនធានទឹក និងឧតុនិ​យម ហើយជាពិសេសគេថា ថ្ងៃស្អែកនេះ និងថ្ងៃខានស្អែក គឺជាថ្ងៃភ្លៀង​។ អញ្ចឹងឥឡូវនេះ ឆ្នាំទៅ គឺឆ្នាំអត់​ទឹក រហូតដល់យើងប្រកាសអាសន្នអំពីបញ្ហាទឹក ឆ្នាំនេះទឹកជ្រុល សំបូរទឹកទៅវិញ។ ប៉ុន្តែ រវាងអត់ និងសំ​បូរ​ទឹក យកសំបូរទឹកហើយ ពិបាកណាស់អត់ទឹកនេះ។ ម្សិលម្ង៉ៃនេះ ខ្ញុំព្រះករុណាខ្ញុំទៅវាយកូនគោល វាយ​អី​កើត ភ្លៀងរហូត។ អត់វាយបានតទៅទៀត មកដេកផ្ទះ។ មួយអាទិត្យ បានតែមួយព្រឹកហ្នឹង មួយព្រឹក​ហ្នឹង​​វា​​អត់បានទៀត​។

ប្រុងប្រយ័ត្ន ការធ្វើចរាចរ អគ្គីភ័យ ការលេងល្បែងដែលគ្រោះថា្នក់/កុំតម្លើងថ្លៃហួសហេតុរថយន្តឈ្នួល

យ៉ាងណាក៏ដោយ ​ខ្ញុំព្រះករុណាខ្ញុំយកវេទិកានេះ អំពាវនាវចំពោះប្រជាពលរដ្ឋ អាជ្ញាធរគ្រប់លំដាប់ថ្នាក់ កម្លាំង​​ប្រដាប់អាវុធគ្រប់ប្រភេទ ត្រូវមានការប្រុងប្រយ័ត្នទាំងអស់គ្នា ក្នុងនោះកម្លាំងប្រដាប់អាវុធ និងអាជ្ញា​ធរ​​នៅទូទាំងប្រទេស ត្រូវរៀបចំការពារប្រជាជនឲ្យបានល្អនៅក្នុងឱកាសចូលឆ្នាំខាងមុខនេះ។ សម្រាប់ប្រ​ជា​​ពលរដ្ឋរបស់យើង អ្វីដែលជាសំណូមពររបស់ខ្ញុំព្រះករុណាខ្ញុំ គឺការបើកបរដោយមានការប្រុងប្រយ័ត្ន ចៀស​វាងការលេងនូវល្បែងណាដែលនាំទៅដល់គ្រោះថ្នាក់ ជាពិសេសការប៉ាតម្សៅ គប់ទឹកដាក់​អ្នកដែលកំ​ពុង​បើកបរ ដូចជា ឡាន ឬម៉ូតូ ពេលដែលមានការគប់ទឹក​ទៅ នាំទៅដល់ការគ្រោះថ្នាក់នៃការ​ធ្វើចរាចរ​តាម​ផ្លូវ។ ប្រជាពលរដ្ឋក៏ត្រូវតែមានការប្រុងប្រយ័ត្នជាមួយនឹង​អគ្គីភ័យ ដែលអាចកើតមានជាយថាហេតុ ដោយ​សារតែការធ្វើបុណ្យទានរបស់យើង​ ភ្លើងធូប ភ្លើងទៀន ត្រូវតែមានការប្រុងប្រយ័ត្ន កុំឲ្យថ្ងៃចូលឆ្នាំ ក្លាយ​ទៅជាថ្ងៃនៃសោកនាដកម្ម ការគ្រោះថ្នាក់ដល់ជីវិត ដោយសារគ្រោះថ្នាក់ចរាចរណ៍ ការគ្រោះថ្នាក់​ដល់ជីវិត ឬបាត់បង់ទ្រព្យសម្បត្តិដោយសារតែអគ្គីភ័យ និងគ្រោះថា្នក់ផ្សេងៗ។

ខ្ញុំព្រះករុណាខ្ញុំនៅតែបន្តអំពាវនាវចំពោះម្ចាស់រថយន្តដឹកអ្នកដំណើរទាំងឡាយ មេត្តាកុំតម្លើងថ្លៃហួសហេតុ ប្រសិនបើមានការតម្លើងណាមួយ ក៏គួរតែតម្លើងក្នុងកម្រិតសមល្មម។ ខ្ញុំព្រះករុណាខ្ញុំបានអំពាវនាវស្ទើរ​​តែ​រៀង​រាល់ឆ្នាំ ទាំងពេលភ្ជុំបិណ្ឌ ទាំងពេលចូលឆ្នាំ ក៏ប៉ុន្តែដោយសារតែតម្រូវការខ្ពស់ពេកនៃការធ្វើដំណើរ និង​ការ​​ចង់មានចង់បានពីសំណាក់អ្នកបើកបរ ឬអាចថាក្រុមហ៊ុនផង តំលៃនៃការធ្វើដំណើរ ក៏មានការកើន​ឡើង​។ ដូច្នេះ អំពាវនាវចំពោះអ្នកម្ចាស់រថយន្តខិតខំយ៉ាងណាជួយទៅដល់ប្រជាពលរដ្ឋ ដែលជាសាច់​ឈាម​របស់យើង ក្នុងការធ្វើដំណើរពីទីក្រុងភ្នំពេញ ទៅកាន់ភូមិកំណើត និងពីភូមិកំណើតមកកាន់ទីក្រុង​​ភ្នំ​ពេញវិញ។ សង្ឃឹមថាម្ចាស់រថយន្ត និងទទួលយកនូវការគិតគូរបែបនេះ ដើម្បីកាត់បន្ថយនូវការចំនាយ​របស់ប្រជាជនរបស់យើង។

សេវាល្អ ទាញទេសចរមកជាថ្មី

តំបន់ទេសចរណ៍ធំៗ ដែលលាតសន្ធឹងកាន់តែធំទៅៗ មិនមែនគ្រាន់តែសៀមរាប ដែលមានអង្គរ​​សង្រ្កាន្ត​នោះ​ទេ។ ឆ្នាំនេះ ក៏មានសង្រ្កាន្តនៅតាមខេត្តមួយចំនួនទៀត ដូចជាខេត្តព្រៃវែងជាដើម ដែលឆ្នាំទៅ ខ្ញុំព្រះ​ករុណាខ្ញុំ ក៏បានអំពាវនាវថាសង្រ្កាន្តមិនចាំបាច់ធ្វើនៅតែអង្គរនោះទេ សង្រ្កាន្តអាចរៀបនៅតាមខេត្តនានា ដើម្បី​​ផ្តល់ឱកាសឲ្យប្រជាពលរដ្ឋរបស់យើង មានការជួបជុំកំសាន្ត​សប្បាយ។ តំបន់ទេសចរណ៍ ពិតជាមាន​ច្រើន​ឥឡូវនេះ ហើយជាតំបន់ដែលប្រជាជនចូលចិត្តធ្វើដំណើរទៅ។ សូមតំបន់ទាំងនោះ ទាក់ទាញ​យក​ភ្ញៀវ​ទៅ ដើម្បីបង្កើនឡើងនូវមុខរបរក្នុងវិស័យទេសចរណ៍។ ដើម្បីធានាបានលើបញ្ហានេះ អាជ្ញាធរដែនដី​ដែល​គ្រប់គ្រងនៅតំបន់នោះ ត្រូវរៀបចំសន្តិសុខ និងសណ្តាប់ធ្នាប់ឲ្យបានល្អ អ្នកលក់ដូរទាំងឡាយ​ដែល​នៅតំបន់នោះ ត្រូវតែខិតខំរក្សានូវតំលៃ ចៀសវាងការលក់តម្លើងថ្លៃ ធ្វើឲ្យគេរាងចាល ហើយបាត់បង់នូវភាព​ប្រ​កួតប្រជែង។ ទាក់ទាញទេសចរមកសារជាថ្មី។

អ្នកដែលឆ្លាត គឺអ្នកដែលយកចំនេញតិច ក៏ប៉ុន្តែលក់បានច្រើន ឯអ្នកល្ងង់លក់បានតិច តែបានថ្លៃខ្ពស់ តែ​លក់​បានតែមួយដង ឬពីរដង គឺរាងចាល។ អាហ្នឹងគេហៅថារកស៊ីកោរគេ។ អញ្ចឹងគ្រប់តំបន់ទេសចរណ៍ ត្រូវ​មានការឈ្លាសវៃ ធានាឲ្យអតិថិជនដែលទៅកាន់តំបន់ទេសចរណ៍ ទើបបង្កើតថ្មី​ទៅលេង​ឆ្នាំនេះ​ហើយ ពេលក្រោយនឹងទៅលេងបន្តបន្ទាប់ទៀត ដើម្បីធានាថាតំបន់ទេសចរណ៍ដែលទើបបង្កើតថ្មីនោះ គឺជាទេស​ចរណ៍​ដែលមានការទាក់ទាញនៅពេលខាងមុខ។ ឆ្នាំកន្លងទៅ យើងទទួលទេសចរបរទេសជាង ៥ លាន​នាក់ ប៉ុន្តែ យើងមិនភ្លេចថាទេសចរផ្ទៃក្នុង គឺជាទេសចរដែលមិនចេះរីងស្ងួត ហើយជាទេសចរ​ដែល​ប្រជា​ជនទទួលបានប្រាក់ចំណូលនៅឯមូលដ្ឋាន។ ដូច្នេះសង្ឃឹមថាឆ្នាំនេះ ជាមួយនឹងប្រាក់ចំណូល​កើន​ឡើង​របស់ប្រជាពលរដ្ឋ ជាមួយនឹងប្រាក់ខែដែលទើបនឹងឡើងថ្មីរបស់មន្រ្តីរាជការ កងកម្លាំងប្រដាប់​អា​វុធ និង​កម្មករ/ការិនីរបស់យើង ផលប្រយោជន៍នោះវានឹងរាយប៉ាយនៅក្នុងក្របខណ្ឌទូទាំងប្រទេស​។​ នេះជាអ្វី​ដែលខ្ញុំព្រះករុណាខ្ញុំ ចង់និយាយនៅពេលព្រឹកនេះ ហើយចាប់ពីថ្ងៃស្អែកទៅ ប្រហែល​ជា​ការ​និ​យាយ​របស់​ខ្ញុំព្រះករុណាខ្ញុំ កាត់បន្ថយឲ្យនៅកាន់តែខ្លីទៅ ព្រោះវាហត់ណាស់។

ម្សិលមិញ បើទោះបីជាថ្ងៃអាទិត្យ ក៏ត្រូវចំនាយពេល ២ ម៉ោង ​ដើម្បីនិយាយ ហើយអាទិត្យខាងមុខនេះ ក្រៅ​ពីនិយាយខាងក្រៅ នៅនិយាយខាងក្នុង អានិយាយខាងក្នុងហ្នឹង ត្រូវនិយាយហត់ លើសពីការ​ឈរ​និ​យាយ។ អញ្ចឹងបានប្រជាពលរដ្ឋអាចស្តាប់ឮសូរសម្លេងរបស់ខ្ញុំព្រះករុណាខ្ញុំ គឺបំពង់កវាមិនល្អដូចមុនទេ ដោយសារនិយាយច្រើនពេក ក៏ប៉ុន្តែ រឿងដែលត្រូវនិយាយហើយ គឺត្រូវតែនិយាយហើយ។ ឆ្នាំនេះ ព្រះ​តេជ​ព្រះ​គុណឲ្យក្មេងរាំអញ្ចេះទៅ។ ឆ្នាំទៅមានពិសោធន៍ម្តងហើយ មិនបាច់ចាំរំលឹកទេអាហ្នឹងនោះ ក្មេងខាង​ក្រោម​​ស្រែកសួរព្រះតេជព្រះគុណ ចេះច្រៀងញីកែងជើង ឬអត់? ទេ យប់មិញស្តាប់ចម្រៀងមួយបទ​មិនដឹង​ថា ចម្រៀងស្អី បទឆ្កែរត់បុកប៉ោត។ គិតថែមអាហ្នឹងមួយបទទៀត។ ល្ងាចមិញឃើញបុស្តិ៍បាយ័នទេ ចាក់​ បទហ្នឹង។ ឥឡូវ វាចង់ទៅដូចជាក្មេងបន្តិចហើយ។

ថ្ងៃនេះ ពាក់អាវហ្នឹងមក ពាក់គ្របទេ ការពិតមកពីខ្លួនមានប្រដាប់ប្រដានៅក្នុងខ្លួនច្រើនពេក ក្តៅដូចតែ​គេ​ដូច​តែគេដូចតែឯងហ្នឹង ប៉ុន្តែ ត្រូវមាន INTERNET មិញហ្នឹងក្មេងវាទៅឆ្ងាយ។ ដល់មាន  INTERNET ជាប់​នៅនឹងហោប៉ៅអញ្ចឹងទៅ គឺថាទៅដល់កន្លែងណាក៏ទាក់ទងបាន ព្រោះអានេះវាទាក់ទងនឹងផ្កាយ​រណប​ផ្ទាល់តែម្តង។ ដាច់សេវាទូរស័ព្ទក៏ដាច់ចុះ ប៉ុន្តែយើងមាន INTERNET សម្រាប់ប្រើប្រាស់បាន។ អញ្ចឹងទេ ថ្ងៃនេះការពិតចង់មកតែអាវប៉ុណ្ណេះទេ ហើយក្បាលពោះរាងចុះបន្តិច …។

នេះជាការខិតខំទាំងអស់គ្នា ហើយថ្ងៃនេះមកស្វាគមន៍ទទួលយកផ្លូវទាំងអស់គ្នា ហើយផ្លូវប្រើទាំងអស់គ្នា​ មានផ្លូវគឺមានសង្ឃឹម។ ឆ្នាំថ្មី ការសង្ឃឹមថ្មី ជូនពរ ប្រគេនពរចំពោះសម្តេចព្រះសង្ឃនាយក ព្រះតេជ​ព្រះគុណ ព្រះសង្ឃគ្រប់ព្រះអង្គ ឯកឧត្តម លោកជំទាវ អស់លោក លោកស្រី សូមប្រកប​ដោយ​ពុទ្ធពរ​ទាំង​បួន​​ប្រការ ក្នុងឱកាសសម្ពោធដាក់ឲ្យប្រើប្រាស់នូវមហាវិថីដែលធំជាងគេ តភ្ជាប់ពីទីក្រុងភ្នំពេញទៅកាន់​ខេត្ត​​កណ្តាល ហើយសូមឲ្យទេវតាឆ្នាំថ្មីនាំមកនូវសេរីសួស្តី ជ័យមង្គល ជូនប្រជាពលរដ្ឋ នៅទូទាំងព្រះរាជា​ណា​ចក្រ​កម្ពុជា ក៏ដូចជាបងប្អូនប្រជាពលរដ្ឋដែលរស់នៅក្រៅប្រទេស និងកងទ័ពរបស់យើង ដែលកំពុង​ប្រតិ​បត្តិការ តាមរយៈអង្គការសហប្រជាជាតិនៅប្រទេសនានា នៅក្រៅប្រទេស សូមប្រកបជាមួយនឹង​​ពុទ្ធ​ពរ អាយុ វណ្ណៈ សុខៈ ពលៈ កុំ បីឃ្លៀងឃ្លាតឡើយ៕