សារសំឡេងពិសេសរបស់សម្តេចតេជោ ហ៊ុន សែន រំលឹក ជនរួមជាតិឱ្យអនុវត្តវិធានការសុខាភិបាលប្រឆាំងកូវីដ-១៩នៅថ្ងៃបោះឆ្នោតនិងរំលឹកអំពីគុណសម្បត្តិរបស់ក្រុមប្រឹក្សាឃុំ-សង្កាត់ក្នុងការបម្រើនិងជួយប្រជាពលរដ្ឋក្នុងយុទ្ធនាការចាក់វ៉ាក៉សាំងនិងគ្រោះមហន្តរាយនានា!

70

CNV:

ខ្ញុំព្រះករុណាខ្ញុំ​ សូមក្រាបថ្វាយបង្គំ ព្រះតេជព្រះគុណ ព្រះសង្ឃគ្រប់ព្រះអង្គ បងប្អូនជនរួមជាតិជាទីគោរពស្រឡាញ់!

ទៅបោះឆ្នោត កុំភ្លេចប្រើអាល់កុលលាងដៃ រក្សាគំលាត និងពាក់ម៉ាស

ថ្ងៃនេះ ជាថ្ងៃហែក្បូនចុងក្រោយ សម្រាប់ការឃោសនា(រកសម្លេងឆ្នោត) ជ្រើសរើស(ក្រុមប្រឹក្សា)ឃុំ/សង្កាត់ អាណត្តិទី ៥។ បន្ទាប់ទៅគឺជាថ្ងៃស្ងប់ស្ងាត់ បន្ថែមទៅដោយសារាចររបស់ខ្ញុំព្រះករុណាខ្ញុំ អំពាវនាវកុំឱ្យសេពគ្រឿងស្រវឹងនិងលក់គ្រឿងស្រវឹងនៅថ្ងៃបោះឆ្នោត។ ខ្ញុំព្រះករុណាខ្ញុំ សូមយកឱកាសនេះ ដើម្បីទូលប្រគេននិងអំពាវនាវ ចំពោះបងប្អូនជនរួមជាតិ បើទោះបីថា កូវីដ-១៩ ត្រូវបានថមថយ និងអវត្តមានពីប្រទេសរបស់យើងជិត ១ ខែ ទៅហើយក្តី នៅពេលអញ្ជើញទៅបោះឆ្នោត សូមបងប្អូនជនរួមជាតិមេត្តាកុំភ្លេចយកអាល់កុលលាងដៃទៅជាមួយ​ បើអាចធ្វើបាន(សូមកុំភ្លេច)ពាក់ម៉ាសនិងរក្សាគម្លាតឱ្យបានល្អ ដើម្បីចៀសវាងនូវហានិភ័យកើតឡើងនៅថ្ងៃបោះឆ្នោត ដែលអាចនាំទៅដល់ការឆ្លងឡើងវិញ

អាល់កុល គឺមានភាពចាំបាច់ ដើម្បីឱ្យបងប្អូនអាចលាងដៃក្រោយពេលបោះឆ្នោតរួច នៅក្រោយពេលដែលយើងកាន់ក្រដាស(សន្លឹកឆ្នោត) (ព្រោះ)យើងមិនដឹងថានៅលើក្រដាសនោះវាមានអ្វីនៅលើនោះ(ទេ)។ គណៈកម្មាធិការជាតិរៀបចំការបោះឆ្នោត ច្បាស់ជាមានវិធានការការពារសុវត្ថិភាព ក៏ប៉ុន្តែយ៉ាងណាក៏ដោយ យើងត្រូវតែគិតអំពីសុវត្ថិភាពផ្ទាល់ខ្លួន។ ពិតមែនតែកាតព្វកិច្ចពាក់ម៉ាសត្រូវបានលើកលែង ប៉ុន្តែបើសិនជាយើងពាក់ម៉ាសក៏ជាការល្អ ហើយការរក្សាគម្លាតពីចន្លោះមួយទៅចន្លោះមួយក៏គួរតែត្រូវបានធ្វើ។

ថ្ងៃស្អែក គឺជាថ្ងៃប្រមូលផ្តុំប្រជាពលរដ្ឋនៅទូទាំងប្រទេសសម្រាប់អ្នកដែលគ្រប់អាយុបោះឆ្នោត។ ខ្ញុំព្រះករុណាខ្ញុំ សូមយកឱកាសនេះ អរគុណចំពោះក្រុមប្រឹក្សាឃុំ/សង្កាត់ អាណត្តិទី​ ៤ កន្លងទៅ ដែលនឹងត្រូវផុតអាណត្តិនៅប៉ុន្មានថ្ងៃខាងមុខនេះ។ យើងបានដឹងហើយថា នៅក្នុងរយៈពេលនៃការឆ្លងកាត់កូវីដ-១៩ គឺក្រុមប្រឹក្សាឃុំ/សង្កាត់ ដែលបងប្អូនបានធ្វើការបោះឆ្នោតកាលពីឆ្នាំ ២០១៧ បានបម្រើ/ការពារប្រជាជនបានល្អណាស់។ ការចាក់វ៉ាក់សាំងទៀតសោត តាមរយៈឃុំ/សង្កាត់ (ក៏ដូចជា) ភូមិនោះឯងដែលជាអ្នកជួយរៀបចំបានយ៉ាងល្អ ដើម្បីឱ្យបងប្អូនបានទទួលវ៉ាក់សាំងគ្រប់ៗគ្នា។ ខ្ញុំព្រះករុណាខ្ញុំ មិនភ្លេចថាជំនន់ជន់លិចនៅតាមបណ្តាខេត្ត រាប់ទាំងរាជធានីភ្នំពេញ (គឺមាន)ខេត្តកំពង់ស្ពឺ, ខេត្តពោធិ៍សាត់, ខេត្តបាត់ដំបង និងខេត្តបន្ទាយមានជ័យ (គឺ)ថ្នាក់ឃុំ/សង្កាត់(របស់)យើងបានប្រឹងប្រែងយ៉ាងខ្លាំង ដើម្បីបម្រើដល់ប្រជាពលរដ្ឋនៅពេលនោះ។ ការបិទខ្ទប់នៅតំបន់ខ្លះ តម្រូវឱ្យអាជ្ញាធរថ្នាក់មូលដ្ឋានឃុំនៅពេលនោះធ្វើសកម្មភាពយ៉ាងច្រើន ដើម្បីបម្រើទៅដល់ប្រជាពលរដ្ឋ។ ខ្ញុំព្រះករុណាខ្ញុំ នៅចាំមិនភ្លេចទេថា ការផ្តល់ជំនួយទាំងឡាយត្រូវធ្វើទៅតាមរយៈការរៀបចំចង្អុលបង្ហាញ និងការយកចិត្តទុកដាក់ដោយផ្ទាល់ពីឃុំ/សង្កាត់របស់យើង។ រឿងនេះ គឺមិនអាចនឹងបំភ្លេចបាននូវគុណបំណាច់ ដែលបងប្អូនបានធ្វើក្នុងរយៈពេលកន្លងទៅនេះ។

ក្រុមប្រឹក្សាឃុំ/សង្កាត់របស់យើងមួយចំនួននឹងបានជាប់ឆ្នោតឡើងវិញ និងមួយចំនួននឹងមិនបានជាប់ឆ្នោត ដោយសារកត្តាអាយុ (និង/ឬ)មិនបានឈរឈ្មោះបោះឆ្នោតទៀត។ យ៉ាងណាក៏ដោយ ក្នុងរយៈពេល ៥ ឆ្នាំ កន្លងទៅនេះ បងប្អូនពិតជាមានការនឿយហត់ ដែលខ្ញុំព្រះករុណាខ្ញុំសូមអរគុណ។ សម្រាប់បងប្អូនមួយចំនួនធំក៏អាចនឹងជាប់ឆ្នោតឡើងវិញ ដែលត្រូវបម្រើការនៅពេលខាងមុខទៀត។ ពិតមែនហើយ កំហុសឆ្គងខ្លះកើតមានចៀសមិនរួច ក៏ប៉ុន្តែ ប្រសិនបើប្រៀបធៀបជាមួយនឹងគុណសម្បត្តិ ដែលសមាជិក/ជិកាក្រុមប្រឹក្សាឃុំ/សង្កាត់បានធ្វើរយៈពេលកន្លងទៅ គឺគុណសម្បត្តិនេះមានធំធេងលើសលប់ (បើ)ប្រៀបទៅនឹងគុណវិបត្តិ ដែលកើតមានដោយអន្លើ។ ខ្ញុំព្រះករុណាខ្ញុំ សូមអរគុណ ចំពោះសមាជិក/ជិកាក្រុមប្រឹក្សាឃុំ/សង្កាត់ទាំងអស់ ដែលបានធ្វើកិច្ចការដ៏ល្អក្នុងរយៈពេលកន្លងទៅ។ ខ្ញុំព្រះករុណាខ្ញុំ ក៏នៅតែទុកចិត្តទៅលើក្រុមប្រឹក្សាឃុំ/សង្កាត់ ដែលនៅមិនទាន់អស់អាណត្តិ (សូម)បន្តការយកចិត្តទុកដាក់មើលសុខទុក្ខប្រជាពលរដ្ឋនៅក្នុងរយៈពេលនៃដំណើរការបោះឆ្នោតជិតមកដល់ ជាពិសេសការអនុវត្តន៍នូវសារាចរទាំងឡាយ ណែនាំពាក់ព័ន្ធជាមួយនឹងបញ្ហាការមិនផឹកគ្រឿងស្រវឹង ក៏ដូចជាការអនុវត្តន៍នូវវិធានការទាំងឡាយខាងវិស័យសុខាភិបាល ពាក់ព័ន្ធទៅនឹងករណី “៣កុំ ៣ការពារ”​​​”។

ខ្ញុំព្រះករុណាខ្ញុំ សូមអរគុណជាថ្មីម្តងទៀត ចំពោះសមាជិក/ជិកាក្រុមប្រឹក្សាឃុំ/សង្កាត់ ដែលបានធ្វើការលះបង់យ៉ាងច្រើនដើម្បីអាយុជីវិតប្រជាជនយើងដោយគ្មានការរើសអើងគណបក្សនយោបាយ ជាពិសេសដំណាក់កាលនៃការគ្រប់គ្រងទៅលើកូវីដ-១៩ និងការចាក់វ៉ាក់សាំង ដើម្បីការពារជីវិតប្រជាជន។ ដោយសារតែមានការទទួលខុសត្រូវរបស់សមាជិក/ជិកាក្រុមប្រឹក្សាឃុំ/សង្កាត់នេះហើយ ទើបធ្វើឱ្យប្រជាពលរដ្ឋរបស់យើងកាត់បន្ថយចំនួនស្លាប់/ឆ្លង រហូតទៅដល់គ្មានកូវីដ-១៩ ក្នុងរយៈពេលជិត ១ ខែ កន្លងទៅ។ នេះជាការលះបង់ខ្ពស់ រហូតទៅដល់សមាជិក/ជិកាក្រុមប្រឹក្សាឃុំ/សង្កាត់របស់យើងមួយចំនួន មិនបានជួបប្រពន្ធ/កូនមួយរយៈ ដោយ​សារចាំបាច់ត្រូវធ្វើចត្តាឡីស័ក … បងប្អូនរស់នៅទៅតាមទីតាំងសង្កាត់ឬទីតាំងដទៃទៀត ដើម្បីធ្វើចត្តាឡីស័កខ្លួនឯង។

ក្រុមគ្រួសារនៃសមាជិក/ជិកាក្រុមប្រឹក្សាឃុំ/សង្កាត់ក៏កំពុងជួបការលំបាក ក៏ប៉ុន្តែសមាជិក/ជិកាក្រុមប្រឹក្សាឃុំ/សង្កាត់ខ្លួនឯងបានខិតខំរិះរកមធ្យោបាយ ដើម្បី(ជួយ)សង្គ្រោះប្រជាពលរដ្ឋទូទៅ។ នេះជាស្មារតីលះបង់ដ៏ខ្ពស់ ដែលខ្ញុំព្រះករុណាខ្ញុំ មិនភ្លេចនឹងថ្លែងអំណរគុណ ចំពោះសមាជិក/ជិកាក្រុមប្រឹក្សាឃុំ/សង្កាត់ ដែលជិតអស់អាណត្តិ ហើយនឹងឆ្លងចូលទៅអាណត្តិថ្មី ដែលមានមួយចំនួននឹងអាចជាប់ឆ្នោតឡើងវិញ និងមានមួយចំនួនមិនបានឈរឈ្មោះ ឬក៏មិនជាប់ឆ្នោតឡើងវិញ។ អរគុណសម្រាប់ការចូលរួមធ្វើកិច្ចការដ៏ល្អ ដើម្បីឱ្យប្រទេសជាតិរបស់យើងបានឆ្លងផុតពីវិបត្តិនេះ ក្នុងនោះមានការចូលរួមពីសមាជិក/ជិកាក្រុមប្រឹក្សាឃុំ/សង្កាត់របស់គណបក្សប្រជាជននិយាយដោយឡែក និងសមាជិក/ជិកាក្រុមប្រឹក្សាឃុំ/សង្កាត់អាណត្តិទី ៤ រយៈពេលកន្លងទៅនិយាយជារួម។

ខ្ញុំព្រះករុណាខ្ញុំ សូមអំពាវនាវសារជាថ្មីម្តងទៀត ចំពោះព្រះតេជព្រះគុណ ព្រះសង្ឃគ្រប់ព្រះអង្គបងប្អូនជនរួមជាតិ សូមយកចិត្តទុកដាក់ទៅលើសុវត្ថិភាពផ្ទាល់ខ្លួនទៅលើការឆ្លងរាលដាល នៃកូវីដ-១៩ នៅថ្ងៃបោះឆ្នោត ហើយសូមនាំទៅជាមួយនូវដបអាល់កុលឬជេលសម្រាប់ការលាងដៃ ក្រោយពេលបងប្អូនបោះឆ្នោត(រួច)។ បើអាចធ្វើទៅរួច ទោះបីម៉ាសត្រូវបានដកចេញពីកាតព្វកិច្ច តែបើសិនពាក់ម៉ាសបាន គឺជាការប្រសើរ និងត្រូវរក្សាគម្លាត ព្រោះនៅទីនោះគឺជាការប្រមូលផ្តុំនូវមនុស្សពីទីកន្លែងផ្សេងៗមកកាន់ទីតាំងតែមួយ។

ខ្ញុំព្រះករុណាខ្ញុំ សូមអរព្រះគុណ និងអរគុណ ចំពោះបងប្អូនជនរួមជាតិដែលបានចូលរួម(ធ្វើ)កិច្ចការក្នុងរយៈពេលនៃយុទ្ធនារការ(ឃោសនា)បោះឆ្នោត ដែលធ្វើឱ្យប្រទេសយើងដំណើរការយុទ្ធនាការ(ឃោសនា)រកសម្លេងឆ្នោតប្រកបដោយភាពស្ងប់ស្ងាត់ល្អ។ ខ្ញុំព្រះករុណាខ្ញុំ ក៏សូមអរគុណចំពោះបណ្តាគណបក្សនយោបាយទាំងអស់ដែលបានចូលរួមអនុវត្តន៍ច្បាប់នៃការរៀបចំដំណើរការតាមច្បាប់បោះឆ្នោត និងតាមការណែនាំររបស់គណៈកម្មការធិការជាតិរៀបចំការបោះឆ្នោត។ សង្ឃឹមថាបណ្តាបក្សនយោបាយទាំងអស់នឹងចូលរួមជាមួយគ្នា ដើម្បីជោគជ័យនៃដំណើរការប្រជាធិបតេយ្យ សេរីពហុបក្សនៅក្នុងប្រទេសរបស់យើង នៅថ្ងៃអាទិត្យ (ទី ៥ មិថុនា ២០២២)ខាងមុខនេះ។ សង្ឃឹមថា យើងទាំងអស់គ្នានឹងទទួលយកនូវលទ្ធផលនៃការបោះឆ្នោតដែលប្រជាជននឹងផ្តល់សម្រាប់យើង

ចុងបញ្ចប់ ខ្ញុំព្រះករុណាខ្ញុំ អរគុណសារជាថ្មីម្តងទៀត ចំពោះសមាជិក/ជិកាក្រុមប្រឹក្សាឃុំ/សង្កាត់ ដែលបាននឹងកំពុងធ្វើកិច្ចការជិតបញ្ចប់នៅក្នុងអាណត្តិរបស់ខ្លួន ជាពិសេសអរគុណនៅក្នុងយុទ្ធនាការទាំងឡាយប្រ ឆាំងកូវីដ-១៩ តាមរយៈនៃការរៀបចំសម្រួលឱ្យប្រជាពលរដ្ឋរបស់យើងបានទទួលនូវការព្យាបាល (ការ)ធ្វើតេស្ត ក៏ដូចជាទទួលវ៉ាក់សាំងបានគ្រប់ៗគ្នា៕