សារសំឡេងពិសេសរបស់ សម្តេចតេជោ ហ៊ុន សែន ណែនាំដល់អភិបាលរាជធានី-ខេត្ត រៀបចំបន្ថែមកន្លែងធ្វើចត្តាឡីស័កដល់ពលករដែលវិលត្រឡប់មកពីប្រទេសថៃ និងការដាក់ ចេញនូវវិធានការបន្ទាន់មួយចំនួន

5

CNV:

សម្ដេច ឯកឧត្តម លោកជំទាវ ពិសេស ឯកឧត្តម លោកជំទាវ អភិបាលខេត្ត រាជធានី ​

កន្លងទៅនេះ គឺយើងបានធ្វើការបិទខ្ទប់បណ្ដាខេត្តនៅតាមព្រំដែនកម្ពុជា-ថៃ ក្នុងគោលបំណងដើម្បីទប់ស្កាត់ការរីករាលដាលនៃ Covid-19 ប្រភេទ Delta បូកបន្ថែមទៅដោយការជន់ជោរនៃអ្នកធ្វើចត្តាឡីស័កនៅតាមព្រំដែនកម្ពុជា-ថៃ។ យើងបានសង្កេតឃើញអំពីវត្តមាននៃបងប្អូនជនរួមជាតិរបស់យើង ដែលវិលត្រឡប់មកពីប្រទេសថៃ ដើម្បីស្វែងរកការព្យាបាលនៅក្នុងប្រទេសរបស់ខ្លួនវិញ។ យើងក៏បានខិតខំសម្រួលឱ្យបងប្អូនដែលមានជំងឺ បានឆ្លងកាត់ព្រំដែនមកទទួលសេវាព្យាបាលនៅខាងទឹកដីរបស់យើង បូកបន្ថែមទៅដោយការបញ្ជូនស្បៀងទៅកាន់ទឹកដីថៃ ដើម្បីជួយផ្គត់ផ្គត់បងប្អូននៅទីនោះ។ ដូចបានដឹងហើយថា យើងមិនមានបំណងអូសបន្លាយពេល ដើម្បីពន្យារការបិទខ្ទប់នោះទេ ហើយលើសពីនោះទៅទៀត យើងមានបំណងបើកទល់ដែនឡើងវិញ អោយបានឆាប់តាមដែលអាចធ្វើទៅបាន។ ដើម្បីបម្រើអោយការងារនេះ មានកិច្ចការងារមួយចំនួនដែល អភិបាលរាជធានី-ខេត្តនៅខាងក្នុង ចាំបាច់ត្រូវធ្វើ៖

ទី ១ អភិបាលរាជធានី-ខេត្តដែលនៅខាងក្នុង ដែលមានពលករត្រឡប់មកវិញ ត្រូវតែរៀបចំអោយបានច្បាស់លាស់ ដោយខិតខំបញ្ជូនអ្នកដែលកំពុងធ្វើចត្តាឡីស័កនៅតាមមណ្ឌលដែលបានរៀបចំ ហើយដែលមានស្ថានភាពធូរស្រាល អោយទៅធ្វើចត្តាឡីស័កនៅតាមផ្ទះរបស់ខ្លួនវិញ។ ការធ្វើនេះ គឺក្នុងគោលដៅដើម្បីត្រៀមរៀបចំទីកន្លែងសម្រាប់បងប្អូនដែលវិលត្រឡប់មកពីប្រទេសថៃ ឬមណ្ឌលចត្តាឡីស័កនៅតាមព្រំដែនកម្ពុជា-ថៃ ដើម្បីធ្វើចត្តាឡីស័កជំនួស។

ដូច្នេះ សូមឯកឧត្តម លោកជំទាវ នៅតាមបណ្ដាខេត្ត-រាជធានី រៀបចំបន្ថែមនូវទីកន្លែងដែលត្រូវធ្វើចត្តាឡីស័ក សម្រាប់ទទួលបងប្អូនដែលវិលត្រឡប់មកពីព្រំដែនកម្ពុជា-ថៃ … ចូលទៅក្នុងមណ្ឌលចត្តាឡីស័កនៅតាមមណ្ឌលដែលបានរៀបចំ។ អញ្ចឹង គឺម្ខាងគឺត្រូវរៀបចំទីកន្លែងថ្មី និងម្ខាងទៀតគឺត្រូវរៀបចំផ្ទេរអ្នកដែលកំពុងធ្វើចត្តាឡីស័ក ទៅធ្វើចត្តាឡីស័កនៅតាមផ្ទះរបស់ខ្លួនវិញ ដើម្បីត្រៀមបម្រុងទុកទីកន្លែងនេះសម្រាប់បងប្អូនមកពីប្រទេសថៃ។

កិច្ចការទី ២ សុំអោយកងអង្គភាពដឹកជញ្ជូនរបស់កងយោធពលខេមរភូមិន្ទ … បញ្ជូនរថយន្តបន្ថែមទៅពីខាងក្រោយ ដែលបានត្រៀមរៀបចំប្រមាណជា ២០០ គ្រឿង ដឹកជញ្ជូនបងប្អូនដែលបានធ្វើចត្តាឡីស័កចំនួន ៧ ថ្ងៃរួចមកហើយនៅតាមមណ្ឌលតាមព្រំដែនកម្ពុជា-ថៃនោះ … ចូលមកកាន់ខេត្តខាងក្រោយ ប្រគល់អោយខេត្ត និងរាជធានីនៅខាងក្រោយ ដើម្បីអោយបន្តធ្វើចត្តាឡីស័កនៅខាងក្នុង។

ធ្វើយ៉ាងនេះដើម្បីអោយ … មណ្ឌលចត្តាឡីស័កតាមព្រំដែនកម្ពុជា-ថៃនោះ មានទីកន្លែងសម្រាប់អោយប្អូនដែលវិលមក (ហើយ)កំពុងស្នាក់នៅត្រើយម្ខាងព្រំដែន ចូលមកធ្វើចត្តាឡីស័កជំនួសវិញ។ នេះជាវិធីដែលត្រូវអោយផ្នែកកងទ័ពដែលទទួលបន្ទុកដឹកជញ្ជូន បង្កើនរថយន្ត ហើយរៀបចំការដឹកជញ្ជូនបងប្អូន ដែលធ្វើចត្តាឡីស័កបាន ៧ ថ្ងៃរួចមកហើយ ត្រូវបញ្ជូនរថយន្ត ដឹកបងប្អូនទាំងនេះមកកាន់ខេត្ត-រាជធានីនៅខាងក្រោយ។ ខ្ញុំសុំបញ្ជាក់ឡើងវិញ (ការដែល)ធ្វើយ៉ាងនេះ ដើម្បីយកទីកន្លែងសម្រាប់អោយបងប្អូនដែលមកពីព្រះរាជាណាចក្រថៃ បានមកធ្វើចត្តាឡីស័កនៅក្នុងមណ្ឌលចត្តាឡីស័ក(តាមព្រំដែន) ដែលបានដឹកបងប្អូនចេញនេះ។

ក្នុង ករណីដែលបងប្អូនមកលើសហួសការកំណត់ គឺត្រូវតែអនុវត្តនូវរបៀបមកដល់ ធ្វើតេស្តភ្លាម ហើយដឹកជញ្ជូនបងប្អូនទាំងនោះចូលមកកាន់ខេត្តខាងក្នុងតែម្ដង ដើម្បីយកមកធ្វើចត្តាឡីស័កនៅខាងក្នុង។ នេះក្លាយទៅជាបញ្ហា … សម្រាប់អោយមន្ត្រីរបស់យើងធ្វើកិច្ចការនេះជាបន្ទាន់ ទាំងខាងមុខនិងខាងក្រោយ។ សុំអំពាវនាវ សម្ដេច ឯកឧត្តម លោកជំទាវ អ្នកឧកញ៉ា ដែលជាមន្ត្រីទទួលចុះជួយចំពោះខេត្ត-រាជធានី ចុះជួយឧបត្ថម្ភ និងមើលការខុសត្រូវទៅលើបញ្ហានេះ រួមចំណែកជាមួយខេត្តដើម្បីគ្រប់គ្រងស្ថានភាព Covid-19 តាមរយៈអ្នកដែលមាននៅខាងក្នុងហើយស្រេច និងអ្នកដែលបានទើបនឹងវិលត្រឡប់ពីព្រះរាជាណាចក្រថៃ

… សុំលោកជំទាវ ឱ វណ្ណឌីន អនុវត្តនូវការចាក់វ៉ាក់សាំងដូសទី ៣ សម្រាប់បណ្តាខេត្តនៅតាមព្រំដែនកម្ពុជា-ថៃ ដោយយកអាទិត្យទី ២ សប្តាហ៍ទី ២ អាចថាខានស្អែក ឬខានស្អែកមួយ ចាប់ផ្តើមអនុវត្តការចាក់ដូសទី ៣ ឲ្យផ្នែកជួរមុខនៅតាមព្រំដែនកម្ពុជា-ថៃទាំងអស់ … ព្រោះបងប្អូនទាំងនេះនឹងទទួលហានិភ័យបន្ទាប់ពីបងប្អូនរាប់ពាន់នាក់ពីប្រទេសថៃ ឬអាចឡើងលើសពីហ្នឹងទៅទៀតនៅក្នុងប្រទេសថៃចូលមក។ បងប្អូនទាំងអស់នោះ​នឹងទទួលនូវការលំបាក។ ដូច្នេះត្រូវដឹក AstraZeneca ទៅកាន់ព្រំដែនបន្ទាន់ ដើម្បីចាក់ជូនគ្រូពេទ្យ កងទ័ព នគរបាល អាវុធហត្ថ និងមន្រ្តីរាជការនានា ដែលមានការពាក់ព័ន្ធធ្វើកិច្ចការងារនេះ …។

ត្រូវតែធ្វើឲ្យបាន ព្រោះយើងមានវ៉ាក់សាំង AstraZeneca ក្នុងដៃគ្រប់គ្រាន់ហើយសម្រាប់ចាក់នៅទីនោះ។ ខ្ញុំប៉ាន់ប្រមាណថា អង្គភាពនៅតាមព្រំដែនទាំងនោះ ដែលមានការពាក់ព័ន្ធ ដែលរួមមានទាំងអង្គភាពបណ្តាកងពលធំ កងពលតូច បណ្តាវរសេនាធំ វរសេនាតូច និងអង្គភាពដែលធ្វើកិច្ចការងារនេះ ពាក់ព័ន្ធនឹងអាវុធហត្ថ នគរបាលជាតិ ពេទ្យ និងមន្រ្តីស៊ីវិល មានប្រមាណជា ៣ ឬ ៤ ម៉ឺននាក់ប៉ុណ្ណោះ។ មិនច្រើនទេ។ សុំឲ្យក្រុមគ្រូពេទ្យនៃបណ្តាយោធភូមិភាគ កងពលធំ កងពលតូច វរសេនាធំ វរសេនាតូច ហ្វឹកហាត់ និងត្រៀមចាក់។ បងប្អូនធ្លាប់ដំណើរការរឿងនេះរួចហើយ។ ពេទ្យខេត្តណា គឺចាក់នៅខេត្តហ្នឹងតែម្តង គឺរួមចំណែកឈរជើងនៅភូមិសាស្រ្តណា ដែលវ៉ាក់សាំងត្រូវទៅដល់។ ដូច្នេះសូមលោកជំទាវ ឱ វណ្ណឌីន ពង្រាយវ៉ាក់សាំង AstaZeneca សម្រាប់ដូសទី ៣​ ដូសជំរុញ ដែលយើងបានប្រុងប្រៀបខ្លួនរួចមកហើយ។ ចាក់នៅសប្តាហ៍ទី ២ នេះ។ ពីមុនថានឹងរង់ចាំដល់ខែកញ្ញា ប៉ុន្តែ យើងមិនអាចរង់ចាំបានទេ ហានិភ័យខ្ពស់សម្រាប់មន្រ្តីជួរមុខរបស់យើងដែលត្រូវតែសម្រេចធ្វើកិច្ចការងារនេះឲ្យបាន។

ជាថ្មីម្តងទៀត ខ្ញុំសុំរំលឹកថា យើងធ្វើតាមជំហាន ដោយផ្នែកខាងក្នុងត្រូវតែប្រុងប្រៀបបន្ទាន់ ទី ១ គឺ យកចេញនូវអ្នកដែលធ្វើចត្តាឡីស័កនៅផ្នែកខាងក្រោយ ហើយមានជំងឺស្រាល យកទៅឲ្យធ្វើចត្តាឡីស័កនៅតាមផ្ទះ ហើយជាមួយនោះរៀបចំបន្ថែមនូវកន្លែងធ្វើចត្តាឡីស័កទៅទីកន្លែងសមស្រប ដើម្បីត្រៀមបម្រុងកន្លែងទាំងនេះសម្រាប់ការដឹកជញ្ជូនបងប្អូនដែលធ្វើចត្តាឡីស័កនៅតាមព្រំដែនកម្ពុជា-ថៃ ដែលមកដល់ពេលនេះមានជាង ១ ម៉ឺននាក់។ (ចំនួន)ពុំមានការថមថយចំនួនទេ គឺសល់ជាង ១ ម៉ឺននាក់បន្ថែមទៀត ដែលធ្វើចត្តាឡីស័កបាន ៧ ថ្ងៃហើយៗ ត្រូវតែដឹកជញ្ជូនមកធ្វើចត្តាឡីស័កនៅផ្នែកខាងក្នុង … ដើម្បីយកកន្លែងដែលនៅតាមព្រំដែនកម្ពុជា-ថៃ យកបងប្អូនដែលឆ្លងកាត់ពីថៃចូលមកកម្ពុជាធ្វើចត្តាឡីស័កបន្តគ្នា។

… កិច្ចការទី ១ គឺត្រូវធ្វើនៅខាងក្នុង។ កិច្ចការទី ២ កម្លាំងកងទ័ពត្រូវដឹកជញ្ជូនអ្នកដែលធ្វើចត្តាឡីស័កបាន ៧ ថ្ងៃហើយ តម្រង់ឆ្ពោះមកតាមបណ្តាខេត្តខាងក្នុង ហើយឲ្យមានកិច្ចសហការ ដើម្បីខេត្តណាត្រូវទៅទទួលយ៉ាងណា ទាក់ទងគ្នាយ៉ាងណា ដើម្បីឲ្យដឹងទីកន្លែងមកដល់ គោលដៅដែលត្រូវដឹកជញ្ជូន។ ត្រូវធ្វើកិច្ចការងារនេះបន្ទាន់ តាមរយៈនៃមធ្យោបាយដែលយើងមាន បន្ថែមដោយរថយន្តត្រូវទៅពីខាងក្រោយ។ អាចចល័តរថយន្តជាបន្ទាន់ពីខាងក្រោយឡើងទៅខាងមុខ ដើម្បីធ្វើយុទ្ធនាការដឹកជញ្ជូនបងប្អូនដែលកំពុងធ្វើចត្តាឡីស័កជាង ១ ម៉ឺននាក់ ហើយដែលបានធ្វើចត្តាឡីស័ក ៧ ថ្ងៃរួចហើយនេះ គឺពីព្រំដែនកម្ពុជា-ថៃ ចូលមកធ្វើចត្តាឡីស័កនៅមណ្ឌលចត្តាឡីស័កនៅតាមបណ្តាខេត្ត-រាជធានីនៅខាងក្នុងជំនួសវិញ។ ក្នុងករណីដែលមកលើសចំណុះនៃការទទួលបានការធ្វើចត្តាឡីស័កនៅតាមព្រំដែន គឺយើងត្រូវធ្វើតេស្ត ហើយដឹកជញ្ជូនបងប្អូនទាំងនោះទៅរកគោលដៅធ្វើចត្តាឡីស័កនៅខេត្តខាងក្រោយតែម្តង។

នេះជាបទបញ្ជាបន្ទាន់ … ហើយសូមឲ្យថ្នាក់ដឹកនាំរាជរដ្ឋាភិបាល ដែលចុះជួយខេត្តនីមួយៗ ជួយមើលការខុសត្រូវ រួមចំណែកក្នុងការផ្គត់ផ្គង់ថវិកា/សម្ភារចាំបាច់នានាជួយទៅដល់ខេត្តនានា បន្ថែមទៅលើថវិកាជាតិដែលត្រូវបានផ្តល់។ សូមរំលឹកសាជាថ្មី លោកជំទាវ ឱ វណ្ណឌីន ត្រូវតែអនុវត្តនូវការពង្រាយវ៉ាក់សាំងបន្ទាន់ភ្លាម បន្ទាប់ពីការទទួលនូវសារសម្លេងនេះ ជូនទៅតាមបណ្តាខេត្តនៅតាមព្រំដែន ដើម្បីចាក់នៅក្នុងរង្វង់ (ថ្ងៃនេះ គឺថ្ងៃសុក្រ) ថ្ងៃសៅរ៍ ថ្ងៃអាទិត្យ ឬថ្ងៃច័ន្ទ គឺត្រូវតែចាក់ឲ្យបងប្អូន ព្រោះជាចំណុចដែលទទួលហានិភ័យខ្ពស់សម្រាប់ការទទួលបងប្អូនដែលមកពីព្រះរាជាណាចក្រថៃ។ សូមអរគុណ៕