ភ្នំពេញ ថ្ងៃទី០៧ ខែមេសា ឆ្នាំ២០២០ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា រាជរដ្ឋាភិបាលសម្រេចកាត់បន្ថយថវិកាចំនួន៩១៨លានដុល្លារអាម៉េរិក ពីស្ថាប័នរដ្ឋទាំងថ្នាក់ជាតិ និងថ្នាក់ក្រោមជាតិ ត្រៀមបម្រុងទុក ដើម្បីប្រយុទ្ធប្រឆាំនឹងជំងឺកូវីដ-១៩ ដែលកំពុងកើតមានឡើងនាពេលបច្ចុប្បន្ននេះ។
ក្នុងសន្និសីទសារព័ត៌មាន នាព្រឹកថ្ងៃអង្គារ ១៥កើត ខែចេត្រ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៧ ខែមេសា ឆ្នាំ២០២០នេះ នៅវិមានសន្តិភាព សម្ដេចតេជោ ហ៊ុន សែន បានមានប្រសាសន៍ថា «ខ្ញុំសុំការយោគយល់ពីស្ថាប័នជាតិគ្រប់ថ្នាក់ ទាំងថ្នាក់ជាតិ និងថ្នាក់ក្រោមជាតិ ដែលរាជរដ្ឋាភិបាលត្រូវបង្ខំចិត្តកាត់បន្ថយការចំណាយពីរដង លើកទីមួយ គឺកាត់បន្ថយការចំណាយចំនួន ៤៤៣លានដុល្លារអាម៉េរិក និងលើកទីពីរនេះកាត់បន្ថយការចំណាយចំនួន៤៧៥លានដុល្លារអាម៉េរិក។ បូកសរុបទាំងពីរលើកនេះ មានចំនួន៩១៨លានដុល្លារអាម៉េរិក ត្រៀមបម្រុងទុកដើម្បីប្រយុទ្ធប្រឆាំនិងជំងឺកូវីដ១៩»។ សម្ដេចតេជោបានថ្លែងថា មកដល់ពេលនេះ ចំពោះស្តុកបម្រុងយុទ្ធសាស្ត្ររបស់រាជរដ្ឋាភិបាល ដើម្បីប្រយុទ្ធប្រឆាំនឹង ជំងឺកូវីដ-១៩ គឺបង្កើតឱ្យមានស្តុកពីរ ទី១ ស្តុករបស់ក្រសួងសុខាភិបាល ដែលត្រូវដកយកចំណាយជាប្រចាំទៅឱ្យតាមមន្ទីរពេទ្យ ដូច្នេះត្រូវបង្កើតស្តុកមួយដោយឡែកទៀត នោះគឺស្តុក របស់រាជរដ្ឋាភិបាល។ សម្ដេចតេជោថ្លែងថា បើយោងទៅលើអ្វី ដែលបានចុះហត្ថលេខាទៅលើការព្រមព្រៀងទិញឧបករណ៍សម្ភារបរិក្ខារពីក្រុមហ៊ុននានានោះ គឺចំនួនម៉ាស់បានកើនដល់ ១១លានម៉ាស់ សម្លៀបំពាក់សម្រាប់គ្រូពេទ្យ ទិញមកបាន៥ពាន់សម្រាប់រួចហើយ។ ប៉ុន្តែសម្ដេចឱ្យទិញ៥ពាន់សម្រាប់ទៀតសម្រាប់ស្តុកបម្រុងរបស់រាជរដ្ឋាភិបាល ដោយនៅពេលដែលរបស់ក្រសួងសុខាភិបាលប្រើអស់ របស់រាជរដ្ឋាភិបាលត្រូវបញ្ចេញប្រើបន្ត។ ចំពោះម៉ាស់ N-95សម្រាប់គ្រូពេទ្យមានចំនួន៥០ម៉ឺន រីឯអាល់កុល អុកស៊ីសែន។ល។ ក៏ដូចជា ស្រូវ អង្ករ អំបិល ត្រី និងទឹកសុទ្ធ ក៏បានត្រូវត្រៀមក្នុងស្តុកបម្រុងទុកផងដែរ។
សម្ដេចតេជោ ហ៊ុន សែន បានគូសបញ្ជាក់ទៀតថា កម្ពុជាកំពុងស្ថិតក្នុងដំណាក់កាលនៃសង្គ្រាមប្រឆាំងនឹងជំងឺកូវីដ-១៩ ដែលជាជំងឺរីករាលដាលជាសកល ហើយដែលមកដល់ពេលនេះ សង្គ្រាមមួយនេះស្ថិតក្នុងស្ថានភាពទប់ទល់តែប៉ុណ្ណោះ គ្មានទេពាក្យដែលហៅថាវាយលុក ព្រោះយើងមិនដឹងថាសត្រូវពិតប្រាកដវានៅទីណានោះទេ ខុសគ្នាជាមួយនឹងផ្នែក យោធា ដែលមានការវាយទប់ទល់ផង ឬការវាយលុក និងមានការដកថយ។ សម្ដេចតេជោបានបន្ដថា សម្រាប់យើងគ្មានទេពាក្យវាយលុក ហើយក៏គ្មានដែរពាក្យដែលថាឈ្នះទៅលើសង្គ្រាមមហន្តរាយបែបនេះ គ្មានទេពាក្យដែលថាចំណេញ មានតែខាត គ្រាន់តែថាខាតតិចឬខាតច្រើនតែប៉ុណ្ណោះ។ សម្ដេចតេជោបានសង្កត់ធ្ងន់ថា «នេះជាចំណុចដែលយើងត្រូវដឹងជាមុន អំពីនិយមន័យនៃសង្គ្រាមប្រឆាំងនឹងជំងឺកូវីដ-១៩នេះ។ ដូច្នេះសង្គ្រាមប្រឆាំងនឹងកូវីដ-១៩នេះ យើងត្រូវដាក់ទៅក្នុងក្របខ័ណ្ឌយុទ្ធសាស្ត្ររយៈពេលវែង ព្រោះជំងឺឆ្លងនេះមិនទាន់ឃើញសញ្ញាថមថយចុះនៅឡើយទេ ហើយក៏មិនទាន់មានថ្នាំព្យាបាលដែរ»។ សម្ដេចតេជោនាយករដ្ឋមន្ត្រីបានបន្ថែមថា ឥឡូវនេះយើងកំពុងបន្តប្រយុទ្ធនិងលើមុខព្រួញបី ក្នុងពេលតែមួយ ជាមួយនឹងសង្គ្រាមប្រឆាំងនឹងជំងឺកូវីដ-១៩ ទី១ ប្រយុទ្ធនឹងការឆ្លងចូលមកពីខាងក្រៅ ទី២ ទប់ស្កាត់អ្នកឆ្លងជំងឺទៅកាន់មនុស្សដទៃ និងទី៣ ខិតខំព្យាបាលអ្នកឆ្លងជំងឺឱ្យជាសះស្បើយ។
គួរបញ្ជាក់ដែរថា បើតាមសេចក្ដីជូនព័ត៌មានរបស់ក្រសួងសុខាភិបាលបានបង្ហាញឱ្យ ដឹងថា ស្ថានភាពជំងឺកូវីដ-១៩ នៅទូទាំងប្រទេស គិតត្រឹមម៉ោង៧ព្រឹក ថ្ងៃទី០៧ ខែមេសា ឆ្នាំ២០២០ រួមមាន៖ អ្នកព្យាបាលជាសះស្បើយសរុបកើនដល់៥៨នាក់ អ្នកកំពុងសម្រាកព្យាបាល បានថយចុះមកនៅសរុប៥៧នាក់ អ្នកមានវីរុសកូវីដ-១៩ដែលបានរកឃើញនៅទូទាំងប្រទេសមានចំនួន ១១៥នាក់៕
ដោយ ជឹម ណារី
