ភ្នំពេញ ថ្ងៃទី៣០ ខែតុលា ឆ្នាំ២០១៩ — កងយោធពលខេមរភូមិន្ទ និងកងទ័ពប្រជាជនវៀតណាម គ្រោងរៀបចំសមយុទ្ធរួមគ្នាមួយ ក្នុងការសង្គ្រោះ ពេលមានគ្រោះមហន្តរាយ ដែលនឹងប្រព្រឹត្តទៅនៅខែធ្នូខាងមុខនេះ។ នេះបើតាមការឱ្យដឹងរបស់ ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រី បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម ឧត្តមសេនីយ៍ឯកបម្រុង ផាន វ៉ាន់ហ្សាង (Phan Van Giang) អនុរដ្ឋមន្ត្រី និងជាប្រធានអគ្គសេនាធិការនៃកងទ័ពប្រជាជនវៀតណាមជួបសម្ដែងការគួរសម នារសៀលថ្ងៃទី ៣០ ខែតុលា ឆ្នាំ ២០១៩ នៅវិមានសន្តិភាព ក្នុងខណៈដែលឯកឧត្ដមដឹកនាំគណៈប្រតិភូមកបំពេញទស្សនកិច្ចនៅកម្ពុជា។
ក្នុងជំនួបនេះ ឯកឧត្តម Phan Van Giang បានពាំនាំពាក្យផ្ដាំផ្ញើសួរសុខទុក្ខពីនាយករដ្ឋមន្ត្រីវៀតណាមជូនចំពោះសម្ដេចតេជោ ហើយក៏បានគោរពរាយការណ៍ជូនសម្ដេចតេជោថា ឯកឧត្តមនឹងជួបពិភាក្សាការងារជាមួយអគ្គមេបញ្ជាការនៃកងយោធពលខេមរភូមិន្ទនៅថ្ងៃស្អែកនេះ។ ឯកឧត្ដមបានបញ្ជាក់ដែរថា កន្លងមកកិច្ចសហប្រតិបត្តិការរវាងក្រសួងការពារជាតិនៃប្រទេសទាំងពីរ គឺបានប្រព្រឹត្តទៅយ៉ាងល្អប្រសើរ ជាពិសេសលើការរៀបចំសមយុទ្ធសង្គ្រោះពេលមានគ្រោះមហន្តរាយ ដែលនឹងប្រព្រឹត្តទៅនៅខែធ្នូខាងមុខ។ ជាងនេះទៀត ការថែរក្សាសន្តិសុខនិងសណ្ដាប់ធ្នាប់តាមព្រំដែន និងការស្វែងរកអដ្ឋិធាតុកងទ័ពវៀតណាម រួមជាមួយនឹងការហ្វឹកហាត់បណ្ដុះបណ្ដាលនាយទាហាន ក៏បានប្រព្រឹត្តទៅបានយ៉ាងល្អផងដែរ។
ជាការឆ្លើយតប សម្តេចតេជោ ហ៊ុន សែន បានថ្លែងអំណរគុណ ចំពោះការផ្ដាំផ្ញើសួរសុខទុក្ខពីសំណាក់ថ្នាកដឹកនាំវៀតណាម ហើយក៏បានសម្ដែងនូវអំណរគុណចំពោះរបាយការណ៍ដែលបានលើកឡើងផងដែរ។ សម្ដេចតេជោក៏បានសម្ដែងនូវការរីករាយផងដែរ ជាមួយនឹងទំនាក់ទំនងរវាងកងទ័ពនៃប្រទេសទាំងពីរនាពេលកន្លងមក ដែលទំនាក់ទំនងទាំងនោះ បាននាំមកនូវផលប្រយោជន៍ជូនដល់ប្រជាជន ជាពិសេសប្រជាជនដែលកំពុងតែរស់នៅតាមព្រំដែន។ ចំពោះការរៀបចំសមយុទ្ធសង្គ្រោះពេលមានគ្រោះមហន្តរាយ សម្ដេចតេជោបានមានប្រសាសន៍ថា នេះជាការអនុវត្តមួយ ដែលផ្ដល់នូវផលប្រយោជន៍ដល់ប្រជាជនទាំងពីរ នៅពេលដែលមានគ្រោះមហន្តរាយ ជាពិសេសនៅពេលដែលមានភ្លើងឆេះព្រៃ និងមានទឹកជំនន់ជាដើម។ល។ សម្ដេចតេជោនាយករដ្ឋមន្ត្រីបានមានប្រសាសន៍បន្តថា ភ្លើងឆេះព្រៃ វាមិនស្គាល់ព្រំដែនទេ ដូច្នេះការអនុវត្តសមយុទ្ធនេះ ត្រូវតម្រូវឱ្យកងទ័ពកម្ពុជា ចូលទៅក្នុងទឹកដីវៀតណាម ហើយកងទ័ពវៀតណាមចូលនៅក្នុងទឹកដីកម្ពុជា។ ដូច្នេះ ដើម្បីចៀសវាងដល់ការយល់ច្រឡំ ត្រូវផ្សព្វផ្សាយមានការយល់ដឹងទូលំទូលាយដល់ប្រជាជនផងដែរ។ សម្តេចតេជោបានផ្តល់អនុសាសន៍ឱ្យមានសកម្មភាពមនុស្សធម៌ជាមួយក្នុងសមយុទ្ធនោះ គឺភាគីកម្ពុជាអាចចូលទៅព្យាបាលប្រជាជនវៀតណាម ហើយវៀតណាមចូលមកព្យាបាលប្រជាជនកម្ពុជា ដើម្បីត្រៀមនៅពេលមានគ្រោះមហន្តរាយកើតឡើង ហើយក៏អាចជំរុញឱ្យមានកម្មវិធីផ្សេងទៀត ដូចជា កីឡា សិល្បៈរួមគ្នាផងដែរ។ សំខាន់ជាងនេះទៀតធ្វើយ៉ាងណាបន្តកិច្ចសហប្រតិបត្តិការ ដែលមានស្រាប់ និងជំរុញបង្កលក្ខណៈ ធ្វើយ៉ាងណាឱ្យប្រជាជនប្រទេសទាំងពីរប្រទេសអាចប្រកបអាជីវកម្មតាមព្រំដែនបានដោយងាយស្រួល៕
ដោយ ជឹម ណារី
