ថ្ងៃទី១៥ ខែតុលា ឆ្នាំ២០១៩ — ក្នុងខណៈអញ្ជើញដល់ ទីក្រុងប៊ុយដាប៉ែស ប្រទេសហុងគ្រី នារសៀលថ្ងៃទី១៥ ខែតុលា ឆ្នាំ២០១៩ នៅសណ្ឋាគារ Kempinski ដែលជាទីកន្លែងស្នាក់អាស្រ័យបំពេញការងារ របស់សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានការធ្វើគារវកិច្ចស្វាគមន៍យ៉ាងស្និទ្ធស្នាលរាក់ទាក់បំផុតពីសំណាក់និស្សិតកម្ពុជា ដែលកំពុងសិក្សានៅប្រទេសហុងគ្រី។
ប្រភពពីអ្នកយកព័ត៌មានទូរទស្សន៍ជាតិកម្ពុជាបានឱ្យដឹងថា ក្នុងពិធីសំណេះសំណាលជាមួយសម្ដេចតេជោ និស្សិតទាំងអស់ បានសម្ដែងនូវការនឹករលឹកយ៉ាងជ្រាលជ្រៅបំផុត ជូនចំពោះសម្តេចតេជោនាយករដ្ឋមន្រ្តី ដែលបានអនុញ្ញាតឲ្យក្មួយៗបានមកជួបដោយផ្ទាល់ចំពោះសម្តេច។ សម្តេចតេជោនាយករដ្ឋមន្រ្តី មានប្រសាន៍ថា បើទោះបីជាសម្តេចមានការងារ មមាញឹកយ៉ាងណាក៏ដោយ ក៏សម្តេចតែងតែឆ្លៀតពេលវេលា ក្នុងការជួបសំណេះសំណាលជាមួយ និស្សិតកម្ពុជាយើង ដែលកំពុងសិក្សានៅក្រៅប្រទេស។ សម្តេចតេជោ មានប្រសាសន៍បន្តថា ក្មួយៗ បានឃ្លាតចាកឆ្ងាយទៅបំពេញការសិក្សានៅក្រៅប្រទេស តែងតែនឹករលឹកចំពោះមាតុភូមិ ក្រុមគ្រូសារ តែនៅពេលដែលថ្នាក់ដឹកនាំនីមួយៗ ពេលធ្វើដំណើរទៅកាន់បរទេសហើយមិនបានជួប ប្រាស្រ័យជាមួយក្មួយៗ គឺហាក់ថាយើងមិនមែនជាឈាមជាមួយគ្នា។
សម្តេចតេជោនាយករដ្ឋមន្រ្តី មានប្រសាសន៍ទៅកាន់និស្សិតដែរថា ដោយសារតែមានការរីកចម្រើនខាងសេដ្ឋកិច្ចក្នុងប្រទេសកម្ពុជា និស្សិតគ្រប់កម្រិតទាំងអស់តែងតែជ្រើសរើសចូលក្របខណ្ឌការងាររដ្ឋ ជាជាងចូលបម្រើការងារខាងផ្នែកឯកជន ព្រោះថាពីមួយឆ្នាំទៅមួយឆ្នាំប្រាក់បៀវត្យរ៍របស់មន្រ្តីរាជការ មានការកើនឡើង ជាលំដាប់។ ជាមួយនឹងការថ្លែងក្នុងជំនួបដែលបានចំណាយពេលជាងមួយម៉ោង សម្តេចតេជោនាយករដ្ឋមន្រ្តី មានប្រសាន៍ដែរថា ពួកប្រឆាំងរបស់សម្តេចគឺតែងតែប្រឆាំងជាប់ជាប្រចាំ ដោយសារតែសម្តេចគឺជា បុគ្គលមួយរូប ទី១ បានចូលរួមផ្តួលរំលំរបបប៉ុលពត ទី២ ចូលរួមបញ្ចប់សង្រ្គាមនៅកម្ពុជា និងទី៣ បានចូលរួមដឹកនាំប្រទេសកម្ពុជា មានការអភិវឌ្ឍន៍រីកចម្រើនលើគ្រប់វិស័យ។ ជាមួយនឹងការថ្លែងនោះដែរ សម្តេចតេជោនាយករដ្ឋមន្រ្តី មានប្រសាន៍ដែរថា នៅរសៀលថ្ងៃទី១៥តុលា ក្នុងជំនួបជាមួយ នឹងប្រធានាធិបតីហុងគ្រី សម្តេចនឹងស្នើសុំឲ្យប្រធានាធិបតីហុងគ្រី បន្តជួយកម្ពុជាលើការបណ្តុះបណ្តាលធនធានមនុស្សដល់កម្ពុជា ពិសេសជួយដល់និស្សិតកម្ពុជាដែលកំពុងសិក្សានៅហុងគ្រី មានលទ្ធភាពអាចបន្តការសិក្សារបស់ខ្លួន ក្រោយពីបញ្ចប់ថ្នាក់បរិញ្ញាបត្រ បរិញ្ញាបត្រជាន់ខ្ពស់ រឺថ្នាក់បណ្ឌិត ដើម្បីឲ្យពួកគេកាន់តែទទួលបាននូវការសិក្សាខ្ពង់ខ្ពស់ថែមទៀត៕
ដោយ ជឹម ណារី 
