វេទិកាស្តីពីការជំរុញការផ្សព្វផ្សាយពាណិជ្ជកម្ម និងទេសចរណ៍ កម្ពុជា-ចិន ឆ្នាំ២០១៧ បានប្រារព្វពិធីបើក ជាផ្លូវការនៅទីក្រុងប៉េកាំងសធារណរដ្ឋប្រជាមានិតចិន ដោយបានការអញ្ជើញជាអធិបតីដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ឯកឧត្តម វ៉ាង ចែរ៉ុយ អនុប្រធានព្រឹទ្ធសភា នៃ សាធារណរដ្ឋប្រជាមានិតចិន។ ពិធីដ៏មានអត្ថន័យនោះក៏មានការអញ្ជើញចូលរួមពី ឯកឧត្តម លោកជំទាវ ថ្នាក់ដឹកនាំ ជាឥស្សរជនជាន់ខ្ពស់ នៃប្រទេសទាំងពីរកម្ពុជា ចិន ពិសេសផ្នែកធុរកិច្ចនៃប្រទេសចិន កម្ពុជា ជាច្រើនរូប។
ឯកឧត្តម ប៉ាន់ សូរស័ក្ត រដ្ឋមន្រ្តីក្រសួងពាណិជ្ជកម្មកម្ពុជា មានប្រសាសន៍ថា កាលពីឆ្នាំ២០១៦កន្លងទៅ ក្រសួងពាណិជ្ជកម្មកម្ពុជា និងក្រសួងពាណិជ្ជកម្មចិន ធ្លាប់បានសហការគ្នារៀបចំវេទិការបៀបនេះម្តងរួចមកហើយ នៅទីក្រុងណាន់នីង ខេត្តក្វាងស៊ី ប្រទេសចិន ដែលទទួលបាននូវការចូលរួមគាំទ្រយ៉ាងពេញទំហឹង ពីពាណិជ្ជករ វិនិ យោគិនកម្ពុជា-ចិន ប្រមាណ៣៨០នាក់ ដោយឡែកវេទិកាលើកនេះមានការចូលរួមជាង៤០០នាក់។ ឯកឧត្តមបន្តថា ក្នុងឆ្នាំ២០១៧នេះ វេទិកាស្តីពីកិច្ចសហប្រតិបត្តិការពាណិជ្ជកម្ម និងទេសចរណ៍ កម្ពុជា-ចិន បានកើតឡើងជាថ្មី ម្តងទៀត ដែលស្តែងអំពីសក្ខីភាពបញ្ជាក់ពីកិច្ចសហប្រតិបត្តិការដ៏ល្អ និងនិរន្តរភាព រវាងក្រសួងពាណិជ្ជកម្មនៃប្រ ទេសទាំងពីរ។ សកម្មភាពទាំងនោះសំដៅលើគោលបំណងក្នុងការជំរុញសកម្មភាពពាណិជ្ជកម្ម និងទេសចរណ៍ ឲ្យ មានការកើនឡើងបន្ថែមទៀត ហើយក៏ជាយន្តការនៃការជំរុញកំណើនសេដ្ឋកិច្ចជាតិ នៃប្រទេសទាំងពីរកម្ពុជា-ចិន។
ឯកឧត្តម ថោង ខុន រដ្ឋមន្រ្តីក្រសួងទេសចរណ៍ មានប្រសាសន៍ថា នៅឆ្នាំ២០១៦កន្លងទៅ កម្ពុជាបានទទួលទេសចរអន្តរជាតិជាង៥លាននាក់ ក្នុងកំណើន៥% ក្នុងនោះទេសចរណ៍ចិនមានចំនួនជាង ៨៣ម៉ឺននាក់ ក្នុងកំណើន ២០% ហើយក្នុងរយៈពេល៣ខែដើមឆ្នាំ២០១៧នេះ កម្ពុជាទទួលបានទេសចរណ៍ចិនចំនួនជាង២៧ម៉ឺននាក់ កើនបាន ២៥,៧% ឈរលំដាប់ទី១ ហើយរំពឹងថា នៅឆ្នាំ២០១៧នេះ កម្ពុជានឹងទទួលបានទេសចរណ៍ចិនប្រមាណ ១លាននាក់ និងកើនដល់២លាននាក់នៅឆ្នាំ២០២០ ក្នុងចំណោមទេសចរណ៍អន្តរជាតិសរុប ៧លាននាក់។ ឯកឧត្តមរដ្ឋមន្រ្តីមានប្រសាសន៍បន្តថា មកដល់បច្ចុប្បន្ននេះមានក្រុមហ៊ុនអាកាសចរណ៍ចំនួន១២ហើយ ដែលបានធ្វើប្រតិបត្តិការហោះហើរ ប្រមាណ១២០ជើងក្នុងមួយសប្តាហ៍ ពីចិនមកកម្ពុជា និងពីកម្ពុជាទៅចិន ទាំងនៅខេត្តសៀមរាបអង្គរ រាជធានីភ្នំពេញ និងខេត្តព្រះសីហនុ។ ឯកឧត្តមបន្តថា ជាយុទ្ធសាស្រ្តរបស់យើង គឺបន្តអភិវឌ្ឍវិស័យទេសចរណ៍កម្ពុជា ជាគោលដៅទេសចរណ៍ស្អាត និងបៃតង ផ្តល់សេវាប្រកបដោយគុណភាព និងភាពកក់ក្តៅដល់ភ្ញៀវទេសចរ ដោយឈរលើគោលការណ៍នៃការអភិវឌ្ឍប្រកបដោយនិរន្តរភាព ការទទួលខុសត្រូវ និងបរិយាប័ន្ន លើមូលដ្ឋាននៃអច្ឆរិយៈភាពប្រាសាទ អង្គរ ប្រាសាទព្រះវិហារ សម្បត្តិបេតិកភណ្ឌទាំងរូបី និងអរូបី សម្បត្តធនធានធម្មជាតិ ឆ្នេរសមុទ្រដ៏ស្រស់ស្អាត សម្រាប់ទន្លេមេគង្គ ម្ហូបអាហារ ប្រពៃណីរស់នៅប្រកបដោយភាពញញឹមរួសរាយរាក់ទាក់ពីធម្មជាតិ របស់ប្រជាជនកម្ពុជា ស្របនិងការប្រសិទ្ធនាម កម្ពុជា ព្រះរាជាណាចក្រអច្ឆរិយះ ប្រកបដោយភាពកក់លក្តៅ។
ឯកឧត្តម វ៉ាង ចែរ៉ុយ អនុប្រធានព្រឹទ្ធសភា នៃសាធារណរដ្ឋប្រជាមានិតចិន មានប្រសាសន៍សំដែងនូវការវាយ តម្លៃខ្ពស់និងកោតសរសើរដល់គណះកម្មាធិការចម្រុះ នៃប្រទេសទាំងពីរកម្ពុជា ចិន ដែលបានខិតខំប្រឹងប្រែងយ៉ាង អស់ពីសមត្ថភាព ក្នុងការអនុវត្តនូវស្មារតីនៃការណែនាំរបស់មេដឹកនាំទាំងពីរ លើការអនុវត្តយុទ្ធសាស្រ្តគ្រប់ជ្រុងជ្រោយ ឲ្យកាន់តែមានប្រសិទ្ធភាពខ្ពស់ថែមទៀត ពិសេសការស្វែងរកនូវចំណុចវិជ្ជាមាននានា ដើម្បីឈានទៅសម្រេច បាននូវភាពជោគជ័យថែមទៀត លើការអនុវត្តយុទ្ធសាស្រ្តគ្រប់ជ្រុងជ្រោយ ឲ្យកាន់តែមានប្រសិទ្ធភាពទ្វេឡើងថែមទៀត។ ឯកឧត្តមអនុប្រធានព្រឹទ្ធសភាក៏បានគូសបញ្ជាក់ពីការខិតខំប្រឹងប្រែង របស់ឯកឧត្តមប្រធានាធិបតីចិន ស៊ី ជិនពីង ក៏ដូចជាថ្នាក់ដឹកនាំចិន ក្នុងការដាក់ចេញនូវយុទ្ធសាស្រ្តខ្សែក្រវ៉ាត់មួយ និងផ្លូវមួយ ដែលជាក្របខណ្ឌនយោបាយ ឈ្នះ ឈ្នះ របស់រដ្ឋាភិបាលចិន គ្រប់ដណ្តប់លើកិច្ចសហប្រតិបត្តិការសេដ្ឋកិច្ចផ្លូវសូត្រ និងកិច្ចសហប្រតិបត្តិការ ផ្លូវសូត្រសមុទ្រសតវត្សទី២១ ដែលនឹងជួយជំរុញដល់ការអភិវឌ្ឍវិស័យទេសចរណ៍ នៅតាមបណ្តាប្រទេសបណ្តោយ ផ្លូវសូត្ររួមទាំងអាស៊ាន និងព្រះរាជាណាចក្រកម្ពុជាផងដែរ។
