ភ្នំពេញ ថ្ងៃទី០២ ខែកញ្ញា ឆ្នាំ២០១៩ — ឯកឧត្ដមបណ្ឌិត មហាធា មហាម៉ាត់ នាយករដ្ឋមន្ត្រីម៉ាឡេស៊ីបានអញ្ជើញធ្វើបាឋកថា ពិសេសស្តីពី «ការរក្សាតុល្យភាពទំនាក់ទំនងជាមួយប្រទេសមហាអំណាចនៅក្នុងបរិបទអា ស៊ាន» នៅសាកលវិទ្យាល័យភូមិន្ទភ្នំពេញនៅរសៀលថ្ងៃទី០២ខែកញ្ញាឆ្នាំ២០១៩។ ជាការ កត់សម្គាល់ក្នុងកម្មវិធីបាឋកថានេះ មានការលើកសំណួរឆ្លើយឆ្លងយ៉ាងច្រើនពីសំណាក់ ព្រះសង្ឃ និង និស្សិត ពាក់ព័ន្ធការវិនិយោគរបស់បរទេសនៅក្នុងប្រទេសកម្ពុជា គ្រឿងញៀន ការរស់ដោយសុខដុមរបស់ជនជាតិភាគតិច និងការឡើងកាន់អំណាចឡើងវិញរបស់ឯកឧត្តម មហាធា មហាម៉ាត់ នាយករដ្ឋមន្ត្រីម៉ាឡេស៊ី។
ក្នុងចំណោមអ្នកចូលរួមស្តាប់ប្រមាណជាង៧០០នាក់មានទាំងតំណាងរាស្ត្រ និងមន្ត្រី មកពីសា្ថប័នរដ្ឋផ្សេងៗផងនោះ មានអ្នកសួរសំណួរយ៉ាងច្រើនទៅកាន់ឯកឧត្តម នាយក រដ្ឋមន្ត្រីម៉ាឡេស៊ី និងមានការឆ្លើយឆ្លងគ្នាប្រកបដោយភាពស្និទ្ធស្នាលបំផុត។
ការធ្វើបាឋកថានេះជាកម្មវិធីទី១ក្នុងអំឡុងទស្សនកិច្ចផ្លូវការនៅព្រះរាជាណាចក្រកម្ពុជារយៈពេលបីថ្ងៃគឺចាប់ពីថ្ងៃទី០២ ដល់ថ្ងៃទី០៤ ខែកញ្ញា ឆ្នាំ២០១៩។ ក្រៅពីនេះ មានកម្មវិធី ចូលជួបសម្ដែងការគួរសម ដាច់ដោយឡែកពីគ្នាជាមួយ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទីនៃព្រះរាជាណាចក្រកម្ពុជា និងសម្តេចអគ្គមហាពញាចក្រី ហេង សំរិន ប្រធានរដ្ឋសភា។
ឯកឧត្ដម មហាធា មហាម៉ាត់ ក៏នឹងជួបប្រជុំទ្វេភាគីជាមួយសម្តេចតេជោ ហ៊ុន សែន ដែលនៅក្នុងឱកាសនោះ នាយករដ្ឋមន្រ្តីទាំងពីរ នឹងពិភាក្សាលើទិដ្ឋភាពផ្សេងៗ នៃកិច្ចសហប្រតិបត្តិការទ្វេភាគី។
ជាមួយនេះដែរ នាយករដ្ឋមន្រ្តីទាំងពីរ ក៏នឹងផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិដែលមានផលប្រយោជន៍រួមផងដែរ។ បន្ទាប់មក នាយករដ្ឋមន្រ្តីទាំងពីរ នឹងអញ្ជើញជាអធិបតីក្នុងពិធីចុះហត្ថលេខាលើឯកសារមួយចំនួន និងធ្វើការប្រកាសព័ត៌មានរួមគ្នា។ ក្នុងអំឡុងពេលស្នាក់នៅរាជធានីភ្នំពេញ ឯកឧត្ដមនាយករដ្ឋមន្រ្តីម៉ាឡេស៊ី នឹងអញ្ជើញដាក់កម្រងផ្កា នៅវិមានឯករាជ្យ និងគោរពព្រះវិញ្ញាណក្ខន្ធនៅមណ្ឌប ព្រះករុណា ព្រះបាទសម្តេចនរោត្តម សីហនុ ព្រះមហាវីរក្សត្រ “ព្រះបរមរតនកោដ្ឋ”។
ជាមួយគ្នានេះ ក្នុងដំណើរទស្សនកិច្ចផ្លូវការ របស់ឯកឧត្ដម មហាធា មហាម៉ាត់ នាយករដ្ឋមន្ត្រីនៃប្រទេសម៉ាឡេស៊ីនៅកម្ពុជា នឹងរួមចំណែកកាន់តែប្រសើរក្នុងការពង្រឹង និងធ្វើឱ្យកាន់តែស៊ីជម្រៅបន្ថែមទៀតនូវចំណងមិត្តភាព និងកិច្ចសហប្រតិបត្តិការជិតស្និទ្ធដ៏ល្អរវាងកម្ពុជា និងម៉ាឡេស៊ី ទាំងនៅក្នុងក្របខ័ណ្ឌទ្វេភាគី តំបន់ និងអន្តរជាតិ៕ ដោយ គង់ សិរីរ័ត្ន
( រូបថត៖ ឡាញ់ វិសាល)
