ភ្នំពេញ ថ្ងៃទី២០ ខែមិថុនា ឆ្នាំ២០១៩ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានរម្លឹកថ្ងៃសម្រេច ចិត្តដោយការឈឺចាប់ យកជីវិតធ្វើដើមទុនដើម្បីតស៊ូរំដោះប្រជាជនកម្ពុជា ចេញពីរបបប្រល័យពូជសាសន៍ ប៉ុល ពត កាលពី៤២ឆ្នាំមុន (២០ មិថុនា ១៩៧៧-២០ មិថុនា ២០១៩)។
នៅលើបណ្ដាញទំនាក់ទំនងសង្គមហ្វេសប៊ុក នាថ្ងៃទី២០ ខែមិថុនា ឆ្នាំ២០១៩ សម្ដេចតេជោ ហ៊ុន សែន បានសរសេរថា ថ្ងៃ២០ មិថុនា ២០១៩ នេះ ជាខួបលើកទី៤២ឆ្នាំ នៃថ្ងៃដែលសម្ដេចសម្រេចចិត្តដោយការឈឺចាប់ យកជីវិតធ្វើដើមទុនដើម្បីតស៊ូរំដោះប្រជាជនកម្ពុជា ចេញពីរបបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០១៩)។ សម្ដេច តេជោបានបញ្ជាក់ថា “ទោះបីពេលនេះ ខ្លួនខ្ញុំ និងប្រជាជនកម្ពុជា កំពុងទទួលបាននូវសេចក្តី សុខ តែខ្ញុំមិនដែលភ្លេចនូវទឹកភ្នែករាប់ម៉ឺនរាប់សែនដំណក់ នៅពេលដែលខ្ញុំឈានជើងចេញ ពីមាតុភូមិចោលប្រជាជនកម្ពុជាដែលកំពុងរងគ្រោះ ពិសេសចាកចេញចោលភរិយាដ៏កំសត់ ដែលកំពុងមានផ្ទៃពោះ”។ សម្ដេចតេជោបានលើកឡើងថា សម្ដេចអត់មានជម្រើសឱ្យល្អជាងនេះទេ ព្រោះយើងមិនអាចសុំការអាណិតពីពួក ប៉ុល ពត បានឡើយ ហើយជម្រើសប្រកបដោយគ្រោះថ្នាក់ និងទឹកភ្នែកនោះហើយ ដែលនាំមកនូវសេចក្តីសុខ និងការរីកចម្រើនរហូតដល់សព្វថ្ងៃនេះ។ សម្ដេចតេជោបានបន្ថែមថា ដើម្បីរម្លឹកដល់ការឈឺចាប់នាពេលនោះ សម្ដេចបានរៀបចំចម្រៀងមួយបទមានចំណងជើងថា (សំបុត្រដែលពិបាកសរសេរបំផុត) ទុកសម្រាប់ការស្តាប់ និងឈ្វេងយល់របស់បងប្អូនជនរួមជាតិ។
គួរបញ្ជាក់ដែរថា កាលពីថ្ងៃទី២០ ខែមិថុនា ឆ្នាំ១៩៧៧ សម្តេចតេជោ ហ៊ុន សែន បានដឹកនាំយុទ្ធមិត្ត ៤រូបទៀត ភៀសខ្លួនទាំងគ្រោះថ្នាក់ ចាកចេញពីទឹកដីកម្ពុជា នៅទីតាំងកោះថ្ម ឃុំទន្លូង ស្រុកមេមត់ ខេត្តកំពង់ចាម (សព្វថ្ងៃខេត្តត្បូងឃ្មុំ) ឆ្ពោះទៅកាន់ទឹកដីវៀតណាម ដើម្បី រៀបចំចលនាតស៊ូ វាយផ្តួលរលំរបបប្រល័យពូជសាសន៍ ប៉ុល ពត រហូតដល់ទទួលបានជ័យជម្នះទាំងស្រុង នៅថ្ងៃទី០៧ ខែមករា ឆ្នាំ១៩៧៩។៕
ដោយ ជឹម ណារី
