ភ្នំពេញ ថ្ងៃទី១៥ ខែមិថុនា ឆ្នាំ២០១៩ — ក្នុងឱកាសអញ្ជើញចូលរួមក្នុងកិច្ចប្រជុំកំពូលលើកទី៥ នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ីនៅទីក្រុងឌូសាន់បេ នៃសាធារណរដ្ឋតាជីគីស្ថាន នារសៀលថ្ងៃទី១៥ ខែមិថុនា ឆ្នាំ២០១៩ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី១៥ បានទទួលជួនពិភាក្សាការងារ ជាមួយឯកឧត្ដម Sooronbay Jeenbekov ប្រធានាធិបតីប្រទេសគៀគីស្ថាន។
ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានឱ្យដឹងក្រោយជំនួបនោះថា ឯកឧត្តមប្រធានាធិបតីកៀគីស្ថាន បានមានប្រសាសន៍ថា ឯកឧត្តមមានការរីករាយដែលបានជួបសម្ដេចតេជោក្នុងឱកាសប្រជុំCICA នៅប្រទេសតាជីគីស្ថាននេះ។ ឯកឧត្តមអរគុណចំពោះការអញ្ជើញរបស់សម្ដេច សម្រាប់ទស្សនកិច្ចនៅប្រទេសកម្ពុជា។
សម្ដេចតេជោនាយករដ្ឋមន្ត្រីបានមានប្រសាសន៍ដែរថា សម្តេចពិតជារីករាយដែលបានជួបឯកឧត្តម បើទោះបីជាមានការមមាញឹក គឺយើងមានឱកាសជួបគ្នានៅទីនេះ។ សម្ដេចតេជោបានបន្តថា ឥឡូវនេះទំនាក់ទំនងទ្វេភាគីរវាងប្រទេសយើងទាំងពីរ គឺមានរយៈពេល២៤ ឆ្នាំហើយ ក្រោយពីការចុះកិច្ចព្រមព្រៀងកាទូតនៅឆ្នាំ១៩៩៥ ដែលមកដល់ពេលនេះទំនាក់ទំនងរវាងប្រទេសយើងទាំងពីរនៅមានកម្រិតតិចតួច ដូច្នេះហើយសម្ដេចបានស្នើឱ្យមានការតែងតាំងឯកអគ្គរដ្ឋទូតទៅវិញទៅមកប្រចាំនៅប្រទេសយើងទាំងពីរ ដើម្បីធ្វើយ៉ាងណាជំរុញ ឱ្យទំនាក់ទំនងរវាប្រទេសទាំងពីរកាន់តែប្រសើរឡើង ហើយនៅពេលអនាគតយើង នឹងអាចមានស្ថានទូតប្រទេសរៀងខ្លួនទៅវិញទៅមក។ សម្តេចតេជោក៏បានមានប្រសាសន៍ ពាក់ព័ន្ធទៅនឹងធ្វើយ៉ាងណាឱ្យប្រទេសយើងទាំងពីរមានទំនាក់ទំនង និងកិច្ចសហប្រតិបត្តិការកាន់តែច្រើនជាងមុនដែលក្នុងនោះ សម្តេចបានស្នើឱ្យមានការចុះអនុស្សរណៈដើម្បីពិគ្រោះយោបល់លើផ្នែកនយោបាយ ហើយយើងអាចចុះអនុស្សរណៈរវាងក្រសួងការពារប្រទេសនៃប្រទេសទាំងពីរ ដើម្បីអាចពិភាក្សាធ្វើការជាមួយគ្នាលើទំនាក់ទំនងអន្តរជាតិ និងការផ្លាស់ប្ដូរពាណិជ្ជកម្ម ដែលកម្ពុជានឹងអាចនាំចេញក្រណាត់ និងសម្លៀកបំពាក់មកផងដែរ។ សម្តេចតេជោនាយករដ្ឋមន្ត្រីក្នុងនាមព្រះមហាក្សត្រកម្ពុជា ក៏បានគោរពអញ្ជើញឯកឧត្តមប្រធានាធិបតីគៀគីស្ថានមកបំពេញទស្សនកិច្ចផ្លូវរដ្ឋនៅកម្ពុជា ហើយសម្តេចតេជោនាយករដ្ឋមន្ត្រី ក៏បានបង្ហាញបំណងចង់អញ្ជើញទៅបំពេញទស្សនកិច្ចនៅប្រទេសគៀជីសស្ថានផងដែរ។
ជាការឆ្លើយតប ឯកឧត្តមប្រធានាធិបតីគៀគីស្ថាន មានការចាប់អារម្មណ៍ជាខ្លាំងចំពោះអ្វីដែលសម្តេចបានលើកឡើង ហើយជាគោលបំណងល្អសម្រាប់ទំនាក់ទំនងរវាងកម្ពុជា និងគៀគីស្ថាន។ ឯកឧត្តមប្រធានាធិបតី មានប្រសាសន៍ទៀតថា បច្ចុប្បន្នគៀគីស្ថានមានឯកអគ្គរដ្ឋទូតនៅប្រទេសម៉ាឡេស៊ី ដែលជួយជំរុញដល់ការពង្រឹងទំនាក់ទំនងជាមួយកម្ពុជា។ ឯកឧត្តមប្រធានាធិបតីក៏បានអញ្ជើញសម្តេចតេជោ ហ៊ុន សែន បំពេញទស្សនកិច្ចប្រទេសរបស់ឯកឧត្តម ហើយសម្តេចនាយករដ្ឋមន្ត្រី បានឯកភាពផងដែរ៕
ដោយ ជឹម ណារី
