ភ្នំពេញ ថ្ងៃទី៣០ ខែឧសភា ឆ្នាំ២០១៩ -សម្តេចអគ្គមហាពញាចក្រី ហេង សំរិន បានដឹកនាំគណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជាបំពេញទស្សនកិច្ចផ្លូវការ និងមិត្តភាពនៅសាធារណរដ្ឋសង្គមនិយមវៀតណាម រយៈពេលបីថ្ងៃ ពីថ្ងៃទី២៨ ដល់ថ្ងៃទី៣០ ខែឧសភា ឆ្នាំ២០១៩។ បន្ទាប់ពីបានជួបសវនាការ និងសម្ដែងការគួរសមជាមួយថ្នាក់ដឹកនាំជាន់ខ្ពស់វៀតណាមជាបន្ដបន្ទាប់មកនោះ នៅថ្ងៃទី ២៩ ខែឧសភា ឆ្នាំ២០១៩ សម្តេចប្រធានរដ្ឋសភា និងគណៈប្រតិភូជាន់ខ្ពស់រដ្ឋសភា កម្ពុជា បានជួបសវនាការជាមួយ ឯកឧត្តម ជិន ថាញ់មិន (TRAN THANH MAN) ប្រធានគណៈ កម្មាធិការមជ្ឈិមរណសិរ្សមាតុភូមិវៀតណាម ដើម្បីបង្កើនកិច្ចសហប្រតិបត្តិរវាងអង្គការមហាជនប្រទេស ទំាងពីរកម្ពុជា-វៀតណាមឱ្យមានការរីកចម្រើន និងគ្រប់ជ្រុងបន្ថែមទៀត។
នៅក្នុងជំនួបសវនាការនេះ សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា និងឯកឧត្តម ជិន ថាញ់មិន (TRAN THANH MAN) ប្រធានគណៈកម្មាធិការមជ្ឈិមរណសិរ្សមាតុភូមិវៀតណាមបានលើកឡើងពីគម្រោង រៀបចំសន្និបាតរណសិរ្សប្រទេសកម្ពុជា វៀតណាម ឡាវ នៅក្នុងប្រទេសកម្ពុជាក្នុងឆ្នាំ២០២០ ខាងមុខនេះ ផងដែរ៕
ដោយ ប៊ុនរិទ្ធ
