នាយករដ្ឋមន្រ្ដីវៀតណាមស្នើសុំកម្ពុជាជំរុញទំហំពាណិជ្ជកម្មទ្វេភាគីរវាងប្រទេសទាំងពីរឱ្យ សម្រេចបាន៥.០០០លានដុល្លារ

65

ភ្នំពេញ ថ្ងៃទី៣០ ខែឧសភា ឆ្នាំ២០១៩ -ឯកឧត្តម ង្វៀន ស៊ុនហ្វុក (NGUYEN XUAN PHUC) នាយករដ្ឋមន្រ្តីនៃសាធារណរដ្ឋ​សង្គមនិយមវៀតណាមបានស្នើសុំសម្តេចអគ្គមហាពញាចក្រី ហេង សំរិន ប្រធានរដ្ឋសភា កម្ពុជាជំរុញទំហំពាណិជ្ជកម្មរវាងប្រទេសកម្ពុជា និងវៀតណាមឱ្យបានឈានដល់ ៥.០០០​លាន​ដុល្លារ ដូចការគ្រោងទុករបស់រដ្ឋាភិបាល នៃប្រទេសទំាងពីរថា​នឹងសម្រេចឱ្យបាន​នៅ​ឆ្នាំ២០២០ខាងមុខ។ ការលើកឡើងរបស់ឯកឧត្តមនាយករដ្ឋមន្រ្តីវៀតណាមនេះ នៅក្នុង​ជំនួប​សម្តែងការគួរសមជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា និង​គណៈ​ប្រតិភូជាន់ខ្ពស់រដ្ឋសភាកម្ពុជា នៅវិមានរដ្ឋាភិបាល  នាទីក្រុងហាណូយ ប្រទេសវៀតណាម កាលពីថ្ងៃទី២៩ ខែឧសភា ឆ្នាំ២០១៩។

ឯកឧត្តម ង្វៀន ស៊ុនហ្វុក បានចាត់ទុកដំណើរទស្សនកិច្ចរបស់សម្តេចប្រធានរដ្ឋសភា​កម្ពុជា នៅក្នុងប្រទេសវៀតណាម ជាឱកាសល្អចំពេលដែលសេដ្ឋកិច្ចប្រទេសទំាងពីរ​មានការ​រីកចម្រើនដូចគ្នា។ ជាមួយគ្នានេះ ឯកឧត្តមបានសម្តែងក្តីរីករាយ ដែលបានឃើញ​ទំនាក់ទំនង​រវាងរដ្ឋសភាប្រទេសទំាងពីរមានកិច្ចសហប្រតិបត្តិល្អ រឹងមាំរីកចម្រើនឥតឈប់ឈរ។

សម្តេចអគ្គមហាពញាចក្រី ហេង  សំរិន ប្រធានរដ្ឋសភាកម្ពុជាបានមានប្រសាសន៍ថា ដំណើរទស្សនកិច្ចមកប្រទេសវៀតណាមនាពេលនេះរបស់សម្តេច និងគណៈប្រតិភូ គឺជា ដំណើរទស្សនកិច្ចក្រៅប្រទេសលើកដំបូងរបស់រដ្ឋសភានីតិកាលទី៦ ដែលជានីតិកាលថ្មី កើត​ចេញពីការបោះឆ្នោតសកល កាលពីពាក់កណ្តាលឆ្នាំ២០១៨កន្លងមក។ ដំណើរទស្សនកិច្ច នេះគឺតបតាមការអញ្ជើញរបស់លោកជំទាវ ង្វៀន ធីគីមងិន ប្រធានរដ្ឋសភាវៀតណាម ហើយ​តាមរយៈទស្សនកិច្ចនេះគឺទទួល​បានផ្លែផ្កាជាច្រើន ក្នុងការរួមចំណែកបន្តរឹត​បន្តឹងទំនាក់​ទំនង ចំណងមិត្តភាព សាមគ្គីភាព​ជាប្រពៃណី និងកិច្ចសហប្រតិបត្តិការ គ្រប់ជ្រុងជ្រោយ រវាង​ប្រទេសទំាងពីរ កម្ពុជា-វៀតណាម ជាពិសេសសំដៅពង្រឹងពង្រីកកិច្ចសហប្រតិបត្តិការ រវាង​ស្ថាប័ននីតិប្បញ្ញត្តិទំាងពីរ ឱ្យកាន់តែ​រីកចម្រើនបន្ថែមទៀត។​ សម្តេចប្រធានបានជម្រាប​ឯកឧត្តមនាយករដ្ឋមន្រ្តីថា ក្នុងដំណើរ​ទស្សន​កិច្ចនេះ រដ្ឋសភាប្រទេសទាំងពីរ បានចុះហត្ថ​លេខា​លើអនុស្សរណៈយោគយល់គ្នា ដើម្បី​បន្តពង្រឹង ពង្រីកលើកកម្ពស់កិច្ចសហប្រតិ បត្តិ​ការក្នុងក្របខ័ណ្ឌនីតិប្បញ្ញត្តិ នៃប្រទេស​ទាំងពីរ ជាពិសេសការលើកកម្ពស់យេនឌ័រ និងសភា​វ័យក្មេង ព្រមទាំងកម្រិតបច្ចេទេស​នៃអគ្គលេខាធិការដ្ឋានរដ្ឋសភាទាំងពីរ។ ជាមួយគ្នានេះ រដ្ឋសភាទាំងពីរ ជានិច្ចជាកាលតែងបាន​សហ​ការ​ និងគាំទ្រគ្នាទៅវិញទៅមក ទាំងក្នុង​ក្រប​ខ័ណ្ឌទ្វេភាគី ពហុភាគី តំបន់ និងអន្តរជាតិ ។

សម្តេចប្រធានរដ្ឋសភាកម្ពុជា និងឯកឧត្តមនាយករដ្ឋមន្រ្តីវៀតណាមក៏​បានវាយតម្លៃ​ខ្ពស់​ចំពោះសមិទ្ធផលនៃការងារបោះបង្គោលព្រំដែន រវាងប្រទេសទំាងពីរ សម្រេចបាន​ប្រមាណ៨៤ភាគរយ ដើម្បីប្រែក្លាយជាព្រំដែន សន្តិភាព មិត្តភាព កិច្ចសហប្រតិបត្តិការ និង​ការអភិវឌ្ឍ ដើម្បីទុកជាមរតក ដល់អ្នកជំនាន់ក្រោយ៕

ដោយ ប៊ុនរិទ្ធ