ភ្នំពេញ ថ្ងៃទី២៣ ខែឧសភា ឆ្នាំ២០១៩ -ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរា ជាណាចក្រកម្ពុជា ព្រះអង្គបានសព្វព្រះរាជហឫទ័យស្ដេចយាងចាកចេញពីកម្ពុជាហើយ តាមព្រះទីនាំងយន្តហោះពិសេស នាព្រឹក ព្រហស្បតិ៍ ៥រោច ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៣ ខែឧសភា ឆ្នាំ២០១៩នេះ ដើម្បីចូលរួមក្នុងពិធីប្រារព្ធខួប ២៥ឆ្នាំ នៃ សកម្មភាពគណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សតំបន់អង្គរ( ICC-Angkor )នៅសាធារណរដ្ឋបារាំង។
យាងនិងអញ្ជើញថ្វាយព្រះរាជដំណើរព្រះករុណា ព្រះមហាក្សត្រ នៅឯព្រលានយន្តហោះអន្តរជាតិភ្នំពេញ មានវត្តមាន សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងឥស្សរជនជាន់ខ្ពស់មួយចំនួនទៀត។
នៅក្នុងព្រះរាជសាររបស់ព្រះករុណាព្រះមហាក្សត្រ ចុះថ្ងៃទី២២ ខែឧសភា ឆ្នាំ២០១៩ ផ្ញើជូនជនរួមជាតិ បានគូសបញ្ជាក់ថា ទូលព្រះបង្គំ ខ្ញុំព្រះករុណា ខ្ញុំសូមព្រះអនុញ្ញាត និង អនុញ្ញាតពីសម្ដេចព្រះសង្ឃរាជទាំងពីរគណៈ និងព្រះថេរានុត្ថេរៈគ្រប់ព្រះអង្គ សម្ដេច ឯកឧត្ដម លោកជំទាវ អស់លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់ អវត្តមានពីមាតុប្រទេស ចាប់ពីថ្ងៃទី២៣ ដល់ថ្ងៃទី២៦ ខែឧសភា ឆ្នាំ ២០១៩ ដើម្បីចូលរួមក្នុងពិធីប្រារព្ធខួប ២៥ឆ្នាំ នៃសកម្មភាពគណៈកម្មាធិការអន្តរជាតិ សម្រប សម្រួលកិច្ចគាំពារ និងអភិរក្សតំបន់អង្គរ នៅសាធារណរដ្ឋបារាំង។ នៅក្នុងឱកាសអវត្តមាន របស់ទូលព្រះបង្គំ ខ្ញុំព្រះករុណា ខ្ញុំ ខាងលើនេះ សម្ដេចវិបុលសេនាភក្កី សាយ ឈុំ ប្រធាន ព្រឹទ្ធសភា នឹងទទួលជួយទូលព្រះបង្គំ ខ្ញុំព្រះករុណា ខ្ញុំ ក្នុងឋានៈជាប្រមុខរដ្ឋស្ដីទី នៃព្រះរាជា ណាចក្រកម្ពុជា។
សូមរម្លឹកថា គណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្ត្រអង្គរ ហៅកាត់ថា អាយ ស៊ី ស៊ី អង្គរ ( ICC-Angkor ) បានរៀបចំកិច្ចប្រជុំបច្ចេកទេស លើកទី៣១ និងកិច្ចប្រជុំពេញអង្គលើកទី២៥ ព្រមទាំងប្រារព្ធពិធីអបអរសាទរខួប ២៥ឆ្នាំ នៃការបង្កើត អាយ ស៊ី ស៊ី អង្គរ កាលពីថ្ងៃទី៤ និងថ្ងៃទី៥ ខែធ្នូ ឆ្នាំ២០១៨ នៅទីរួមខេត្តសៀមរាប។ ការរៀបចំពិធីអបអរសាទរខួប ២៥ឆ្នាំនៃការបង្កើត ICC-Angkorនេះ មានគោលបំណងសាទរភាពជោគជ័យ ដែលកើតចេញមកពីយន្តការរបស់ស្ថាប័នមួយនេះ ក្នុងការជួយកិច្ចការអភិរក្ស និងអភិវឌ្ឍន៍សម្បត្តិវប្បធម៌បុរាណរបស់បណ្ដាប្រទេសជាសមាជិក ដែលបច្ចុប្បន្ន ICC-Angkor ក៏កំពុងក្លាយជាគំរូមួយបង្ហាញទៅបណ្តាប្រទេសនានាលើសកលលោក ទៀតផង។ គណៈកម្មាធិការអាយស៊ី ស៊ី អង្គរ ( ICC-Angkor ) បានបង្កើតឡើងនៅឆ្នាំ១៩៩៣ ក្រោយសនិ្នសីទអន្តរជាតិលើកទី១ស្តីពីអង្គរនៅទីក្រុងតូក្យូប្រទេសជប៉ុន តាមសំណូមពររបស់គណៈកម្មាធិការបេតិកភណ្ឌពិភពលោក ហើយការបង្កើត ICC-Angkorនេះ ធ្វើឡើងក្រោយពេលដែលប្រាសាទអង្គរវត្ត បានដាក់បញ្ចូលជាសម្បត្តិបេតិកភណ្ឌមនុស្សជាតិរបស់អង្គការយូណេស្កូ នៅថ្ងៃទី១៤ ខែធ្នូ ឆ្នាំ១៩៩២ ។ សកម្មភាព និងសមិទ្ធផល ដែលICC-Angkor បានអនុវត្តន៍កន្លងមកនោះ គឺការជួសជុលប្រាសាទ និងអភិរក្សបេតិកភណ្ឌ គម្រោងបណ្តុះ បណ្តាល ថែទាំប្រាសាទ ស្រាវជ្រាវ និងអភិវឌ្ឍន៍ លើកតម្លៃរមណីយដ្ឋានអង្គរតាមរយៈក្រមប្រតិបត្តិអង្គរ សាងសង់សារមន្ទីរព្រះនរោត្តមសីហនុ-អង្គរ និង សារមន្ទីរកុលាលភាជន៍អង្គរនៅភូមិតានី និងសាងសង់សារមន្ទីរវាយនភ័ណ្ឌប្រពៃណីអាស៊ីអាគ្នេយ៍ជាដើម។ សមាជិកនៃអាយ ស៊ី ស៊ី-អង្គរ មានចំនួន៣៧ប្រទេសមកពីទ្វីប៥ និងមានអង្គការអន្តរជាតិចំនួន១៣ទៀតចូលរួមជាសមាជិកដែរ។ បណ្តាប្រទេសទាំងនោះរួមមាន៖ ប្រទេសបារាំង អាល្លឺម៉ង់ អូស្ត្រាលី បែលហ៊្សិក ព្រុយណេ កម្ពុជា កាណាដា ដាណឺម៉ាក អេហ្ស៊ីប អេស្ប៉ាញ អាម៉េរិក រុស្ស៊ី ក្រិក ហុងគ្រី ឥណ្ឌា ឥណ្ឌូណេស៊ី អ៊ីតាលី ជប៉ុន ឡាវ លុចសំបួ ម៉ាឡេស៊ី ម៉ិកស៊ិក ន័រវែស នូវែលសេឡង់ ហូឡង់ ហ៊្វីលីពីន ប៉ូឡូញ ចក្រភពអង់គ្លេស អៀរឡង់ខាងជើង សាធារណរដ្ឋកូរ៉េ ចិន សិង្ហបុរី ស្រីលង្កា ស៊ុយអែត ស្វីស ថៃ ទុយនីស៊ី និងវៀតណាម ៕
ដោយ ជឹម ណារី
