ភ្នំពេញ ថ្ងៃទី២១ ខែឧសភា ឆ្នាំ២០១៩ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានបង្ហាញរូបថតមួយសន្លឹក ដែលរម្លឹកពីដំណើរផ្សងព្រេងដ៏មានគ្រោះថ្នាក់ទៅកាន់ប្រទេសថៃ ក្នុងដំណើរស្វែងរកសន្តិភាពជូនប្រជាជនកម្ពុជា កាលពីចុងទសវត្សរ៍៨០។
នៅលើបណ្ដាញទំនាក់ទំនងសង្គមហ្វេសប៊ុក នាថ្ងៃទី ២១ ខែឧសភា ឆ្នាំ២០១៩ សម្ដេចតេជោបានសរសេរថា រូបថតមួយសន្លឹកនេះ បើពិនិត្យឡើងវិញវាហាក់ដូចជាការផ្សងព្រេងដ៏មានគ្រោះថ្នាក់ តែសម្រាប់សម្ដេច និងសហការីគិតថា វាជាមោទនភាពដែលយើងបានយកជីវិតទៅដូរយកសន្តិភាពសម្រាប់ប្រជាជនកម្ពុជា។ សម្ដេចតេជោបានបន្ដថា មានមនុស្សមិន ច្រើនទេដែលដឹងរឿងនេះ សូម្បីតែសម្ដេចក៏ទើបរកឃើញរូបថតមួយសន្លឹក ដែលអតីតអ្នកកាសែតជនជាតិបែលហ្ស៊ិកបានប្រគល់ឱ្យសម្ដេចកាលពីថ្ងៃអាទិត្យនេះដែរ។
សម្ដេចតេជោបានរម្លឹកថា “ថ្ងៃ១៩ ខែកញ្ញា ឆ្នាំ១៩៨៩ ខ្ញុំនិងប្រតិភូបានធ្វើដំណើរជា សម្ងាត់ទៅកាន់ប្រទេសថៃដោយឆ្លងកាត់ស្ពានតាមផ្លូវរថភ្លើងនៅប៉ោយប៉ែត ដែលពេលនោះ សងខាងផ្លូវ ទាំងខាងកម្ពុជា ទាំងខាងថៃសុទ្ធតែជាចំការមីន។ ជាងនេះទៅទៀតនៅសង ខាងផ្លូវប្រមាណ១គីឡូម៉ែត្រ គឺមានកងទ័ពត្រីភាគីចាំវាយប្រហារគ្រប់ពេលមកលើកងទ័ពរដ្ឋ កម្ពុជាដែលនៅឈរជើងតាមផ្លូវជាតិលេខ៥។” សម្ដេចបានបញ្ជាក់ថា ប៉ោយប៉ែតពេលនោះមានផ្ទះបែកបាក់តែមួយខ្នងនៅក្បាលស្ពានខាងកម្ពុជា ក្រៅពីនោះគឺសុទ្ធតែព្រៃត្រែង ហើយយើងឆ្លងព្រំដែននៅម៉ោងប្រមាណ២រសៀល ដោយមិនទាន់ទទួលទានអាហារថ្ងៃត្រង់នៅឡើយ។ សម្ដេចតេជោបានលើកឡើងថា អ្នករួមដំណើរជាមួយសម្ដេចឆ្លងកាត់ស្ពាននេះមាន សម្តេចវិជ័យសេនា ទៀ បាញ់ ឯកឧត្តម ចម ប្រសិទ្ធ ឯកឧត្តម ចាន់ អ៊ាន ឯកឧត្តម ខាំពូន កែវមុនី និងឧត្តមសេនីយ៍ ឡុង សុភាព ដែលពេលនោះកាន់មុខតំណែងជាមេបញ្ជាការយោធភូមិភាគទី៤ ដឹកនាំកម្លាំងការពារដំណើររបស់សម្ដេច (ឡុង សុភាព បានមរណភាពទៅហើយ)។ ក្រៅពីខាងកម្ពុជា មានឧត្តមសេនីយ៍កងទ័ពថៃម្នាក់ឈ្មោះ ប៊ុនឡត រួមដំណើរដើម្បីសម្រួលដំណើរយើងឆ្លងកាត់ព្រំដែននិងទំនាក់ទំនងជាមួយខាងភាគីថៃ។ សម្ដេចតេជោនាយករដ្ឋមន្ត្រីបានគូសបញ្ជាក់ទៀតថា តើជាបេសកម្មអ្វីទើបសម្ងាត់បែបនេះ សម្ដេចបានដាក់ចេញនូវនយោបាយមួយគឺ (អព្យាក្រឹតូបនីយកម្មកម្លាំងប្រដាប់អាវុធ និងរដ្ឋបាលថៃ)សំដៅទប់ស្កាត់នឹងកាត់បន្ថយការជួយរបស់ថៃចំពោះខ្មែរក្រហម និងត្រីភាគី។ ដូចនេះហើយទើបមានការជួប គ្នាជាសម្ងាត់រវាងសម្ដេចជាមួយ ឯកឧត្តម ឆាវវ៉ាលិត យង់ឆៃយុទ្ធ ដែលជាមេទ័ពជើងគោកដ៏មានឥទ្ធិពលរបស់ថៃនៅថ្ងៃ២៧ ខែតុលា ១៩៨៨ នៅទីក្រុងវៀងចន្ទន៍ ប្រទេសឡាវ។ សម្ដេច តេជោបានបន្ថែមថា ឆ្លងកាត់ជំនួបនេះទើបមានទស្សនកិច្ចរបស់សម្ដេចតេជោ ដោយបើកចំហនាទីក្រុងបាងកក ប្រទេសថៃ នាខែមករា ១៩៨៩។ “ខ្ញុំធ្វើដំណើរទៅបាងកកជាសម្ងាត់ នៅថ្ងៃទី១៩ ខែកញ្ញា ១៩៨៩ ពេលនោះទាក់ទងរវាងសង្រ្គាម និងសន្តិភាពនៅកម្ពុជា ដែលអាចចាត់ទុកថាជាផ្នែកមួយនៃការស្វែងរកសន្តិភាពសម្រាប់កម្ពុជា។ ខ្ញុំនិងប្រតិភូឆ្លងដែននៅម៉ោងប្រហែល២រសៀលទៅបាយនៅអារញ្ញប្រាថេតជាមួយអគ្គបញ្ជាការរងកងទ័ពថៃ រួច ហើយបន្តដំណើរតាមឧទ្ធម្ភាគចក្រទៅទីក្រុងបាងកក ចរចាជាសម្ងាត់ជាមួយនាយករដ្ឋមន្ត្រី ថៃ ឆាតឆៃ ឈុនហាវ៉ាន់ និងមេទ័ពជើងគោកថៃ ឆាវវ៉ាលិត យង់ឆៃយុទ្ធ នាល្ងាចថ្ងៃទី១៩ ខែតុលា ១៩៨៩។” នេះជាការបញ្ជាក់បន្ថែមរបស់សម្ដេចតេជោ។ សម្ដេចតេជោនាយករដ្ឋមន្រ្ដី បានឱ្យដឹងទៀតថា ទំនាក់ទំនងរវាងសម្ដេចជាមួយមេដឹកនាំថៃកាន់តែប្រសើរ ដែលនាំដល់ជោគជ័យនៃនយោបាយឈ្នះ-ឈ្នះ របស់សម្ដេចនាពេលក្រោយមកទៀត៕
ដោយ ជឹម ណារី
