កណ្ដាល ថ្ងៃទី០១ ខែឧសភា ឆ្នាំ២០១៩ — ក្នុងឱកាសអបអរសាទរខួប១៣៣ឆ្នាំ នៃទិវាពលកម្មអន្តរជាតិ០១ឧសភា នាព្រឹកថ្ងៃទី០១ ខែ ឧសភា ឆ្នាំ២០១៩ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន ដែលអមដំណើរដោយមន្ត្រីជាន់ខ្ពស់ជាច្រើនរូបទៀត បានអញ្ជើញចុះជួបសំណេះសំណាល ស្រស់ស្រូបអាហារសាមគ្គី និងរាំលេងកម្សាន្តជាមួយកម្មករ និយោជិតនៅរោងចក្រយីដា ប្រមាណជាង៣.៧០០នាក់ ស្ថិតនៅភូមិឫស្សីស្រុក ឃុំឈើទាល ស្រុកកៀនស្វាយ ខេត្តកណ្តាល។
គួរបញ្ជាក់ថា រោងចក្រយីដា បានចាប់ផ្តើមដំណើរការនៅក្នុងឆ្នាំ២០១៥ និងមានកម្ម ករ និយោជិតសរុបប្រមាណជាង ៣.៧០០នាក់ ក្នុងនោះស្រី ២.៨០៣នាក់។ ផលិតផលដែលផលិតនៅរោងចក្រយីដា ត្រូវបាននាំចេញទៅលក់នៅអឺរ៉ុប និងសហរដ្ឋអាមេរិក។ រោងចក្រនេះ បានផ្តល់ប្រាក់ឈ្នួល និងប្រាក់បន្ទាប់បន្សំជូនកម្មករ និយោជិតប្រមាណជិត៨៧ម៉ឺន( ៨៦៦.៥៧០)ដុល្លារសហរដ្ឋអាមេរិកក្នុងមួយខែ។ ប្រាក់ឈ្នួលជាមធ្យមសម្រាប់កម្មករ និយោជិតម្នាក់ៗមានចន្លោះពី ២២០ដុល្លារអាម៉េរិក ដល់ ២៨០ដុល្លារអាម៉េរិកក្នុងមួយខែ។ ក្រៅពីអត្ថប្រយោជន៍ដែលកំណត់ដោយច្បាប់ហើយនោះ រោងចក្រក៏បានផ្តល់នូវអត្ថប្រយោជន៍ផ្សេងៗមួយចំនួនទៀតផងដែរ។ ក្រៅពីការស្រស់ស្រូបអាហារ និងរាំលេងកម្សាន្ត សម្តេចតេជោ ហ៊ុន សែន ក៏មានការឧបត្ថម្ភថវិកាដល់កម្មការិនីដែលមានផ្ទៃពោះផងដែរ។
សូមបញ្ជាក់ថា ទិវាពលកម្មអន្ដរជាតិ គឺជាទិវាថ្ងៃឈប់សម្រាកមួយ ដែលបណ្ដាប្រទេស ច្រើនជាង៨០ប្រទេស នៅលើពិភពលោកប្រារព្ធឡើងក្នុងគោលបំណងរម្លឹក និងឧទ្ទិសដឹង គុណដល់វីរភាពដ៏អង់អាចក្លាហាន នៃកម្មករ កម្មការិនី ដែលបានប្រឹងប្រែងតស៊ូពុះពារ និងប្ដូរជីវិត ដើម្បីការងារសិទ្ធិកម្មករទាំងមូល។ ជាមួយគ្នានេះ ដើម្បីជាការលើកទឹកចិត្តដល់កម្មករ កម្មការិនី ដែលជាកម្លាំងចលករដ៏សំខាន់ក្នុងការជំរុញវិស័យឧស្សាហកម្មរបស់កម្ពុជានោះ សម្តេចតេជោ ហ៊ុន សែន ក្នុងរយៈពេលជិតពីរឆ្នាំចុងក្រោយនេះ ពោលចាប់ពីថ្ងៃទី២០ ខែសីហា ឆ្នាំ ២០១៧ ដល់ថ្ងៃទី២៨ ខែមីនា ឆ្នាំ២០១៩ បានចុះជួបសំណេះសំណាលជាមួយកម្មករ និយោជិតចំនួន ៦៦លើក មានកម្មករ និយោជិតសរុបជិត៩៥ម៉ឺននាក់។ តាមរយៈដំណើរចុះជួបសំណេះសំណាលជាមួយកម្មករ និយោជិតជាបន្តបន្ទាប់នេះ សម្តេចតេជោ ហ៊ុន សែន ក៏បានដោះស្រាយបញ្ហាប្រឈមជាច្រើនរបស់កម្មករ និយោជិត ហើយបាននាំមកនូវអត្ថប្រយោជន៍ជាច្រើនទៀត ដើម្បីធានាដល់សិទ្ធិពលកម្ម និងលើក កម្ពស់ជីវភាពរបស់ពួកគេឱ្យកាន់តែប្រសើរ៕
ដោយ ជឹម ណារី
