ភ្នំពេញ ថ្ងៃទី០៨ ខែឧសភា ឆ្នាំ២០១៩ -ក្នុងឱកាសប្រារព្ធពិធីអបអរសាទរខួប១៥៦ឆ្នាំ នៃទិវាកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៩នេះ សប្បុរសជនទាំងក្នុង និងក្រៅប្រទេសបានផ្ដល់នូវការឧបត្ថម្ភថវិកាចំនួន២០.៧៥៧.៥១០ដុល្លារអាម៉េរិក ក្នុងខណៈដែលឆ្នាំ២០១៨ ទទួលបានចំនួនជាង១៨លានដុល្លារអាម៉េរិក សម្រាប់ទ្រទ្រង់សកម្មភាពមនុស្សធម៌នៅក្នុងព្រះរាជាណាចក្រកម្ពុជា។
ក្នុងពិធីអបអរសាទរខួប ១៥៦ឆ្នាំ នៃទិវាកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៩ ក្រោមប្រធានបទ “ខ្ញុំស្រលាញ់កាកបាទក្រហមកម្ពុជា I Love Cambodian Red Cross” ត្រូវបានប្រារព្ធធ្វើឡើងនាព្រឹកថ្ងៃពុធ ៥កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០៨ ខែឧសភា ឆ្នាំ២០១៩ នៅទីស្នាក់ការកណ្តាលកាកបាទក្រហមកម្ពុជា ក្នុងរាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុន សែន ប្រធានកាកបាទក្រហមកម្ពុជា និងមានការចូលរួមពីវត្តមានឥស្សរជនជាន់ខ្ពស់ជាតិ-អន្តរជាតិ សប្បុរសជនទាំងក្នុងនិងក្រៅប្រទេស ព្រមទាំងសិស្ស និស្សិតប្រមាណជាង៤.០០០នាក់។
សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាបានថ្លែងថា ក្នុងឆ្នាំ២០១៨ និង៤ខែដើមឆ្នាំ២០១៩នេះ កាកបាទក្រហមកម្ពុជាដែលមានសាខានៅតាមរាជ ធានីខេត្តទាំង ២៥ អាចសម្រេចបាននូវសមិទ្ធផលធំៗគួរឱ្យកត់សម្គាល់ ជារួមមានប្រជាពល រដ្ឋតាមជនបទដាច់ស្រយាលជិត៣ម៉ឺនគ្រួសារ បានទទួលអណ្ដូងទឹកស្អាតចំនួន១៣៩ ចាស់ៗ គ្មានទីពឹងគ្រួសារពិការភាព ស្ត្រីមេម៉ាយ ទុរគតចំនួន១៦៧គ្រួសារទទួលបានផ្ទះថ្មី ប្រជាពលរដ្ឋតាមជនបទ៤៥៣គ្រួសារទទួលបានបង្គន់អនាម័យ គ្រួសាររងគ្រោះដោយគ្រោះធម្មជាតិនិងចាស់ឥតទីពឹងកុមារកំព្រាគ្រួសារមានជំងឺរ៉ាំរ៉ៃ ស្ត្រីមេម៉ាយចំនួនជាង១៤ម៉ឺនគ្រួសារ ទទួលបានអំណោយជាស្បៀង សម្ភារជួយសម្រាលជីវភាពរស់នៅប្រជាពលរដ្ឋរស់នៅតំបន់ប្រឈម ជំងឺគ្រុនចាញ់គ្រុនឈាមចំនួន ២ម៉ឺនគ្រួសារ បានទទួលអំណោយជាមុងសុវត្ថិភាព។ អ្នកពិការ ជើងចំនួន៩៥៦នាក់ ទទួលបានរទេះពិការ ប្រជាពលរដ្ឋរស់នៅតាមតំបន់ព្រំដែនរាប់រយគ្រួសារទទួលបានប្រាក់កម្ចីធ្វើដើមទុនប្រកបរបរចិញ្ចឹមជីវិត អ្នកស្ម័គ្រចិត្តនិងបុគ្គលិកក្នុង វិស័យឯកជនជាង៤.០០០នាក់ ទទួលបានការបណ្ដុះបណ្ដាលវិជ្ជាជីវៈសង្គ្រោះបឋម ប្រជាពលរដ្ឋតាមសហគមន៍រាប់ម៉ឺនគ្រួសារបានចូលរួមក្នុងការផ្សព្វផ្សាយលើកកម្ពស់ការយល់ដឹង ពីគ្រោះថ្នាក់ដោយសារមីន និងគ្រាប់មិនទាន់ផ្ទុះ ការថែទាំសុខភាពការប្រើប្រាស់ទឹកស្អាត អនាម័យអាហារូបត្ថម្ភ។ ជាមួយគ្នានេះ សិស្ស និស្សិត មន្ត្រីរាជការ និងប្រជាពលរដ្ឋប្រមាណ ជាង៨ម៉ឺននាក់ ទទួលបានចំណេះដឹងតាមរយៈការផ្សព្វផ្សាយច្បាប់ស្តីពីចរាចរណ៍ផ្លូវគោក។ សម្ដេចកិត្តិព្រឹទ្ធបណ្ឌិតបានបន្តថា ក្នុងរយៈពេល៤ខែដើមឆ្នាំ ២០១៩នេះ សាខា២៥រាជធានី ខេត្តបានផ្ដល់អំណោយជូនអ្នករងគ្រោះដោយខ្យល់កន្ត្រាក់១១៦ដង ចំនួន ៣.០៣៥គ្រួសារ។ ជាមួយគ្នានេះដែរកាកបាទក្រហមកម្ពុជាបានចូលរួមឧបត្ថម្ភដល់មន្ទីរពេទ្យគន្ធបុប្ផា តាមរយៈ មូលនិធិគន្ធបុប្ផាកម្ពុជាចំនួន១លានដុល្លារក្នុងឆ្នាំ២០១៨ ហើយនៅឆ្នាំ២០១៩នេះនឹងបន្តជួយជាបន្តទៀតផងដែរ។
សម្តេចតេជោនាយករដ្ឋមន្ត្រី ហ៊ុន សែន បានសម្ដែងនូវការអបអរសាទរចំពោះ ខួប លើកទី១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០១៩ ដោយ សម្ដេចតេជោបានគូសបញ្ជាក់ថា តាមរយៈប្រធានបទ «ខ្ញុំស្រលាញ់កាកបទក្រហមកម្ពុជា» ឆ្នាំនេះ ពិជាមានន័យគ្រប់គ្រាន់ សម្រាប់សកម្មភាពដ៏ប្រពៃរបស់កាកបាទក្រហមកម្ពុជា ក្នុង វិស័យមនុស្សធម៌។ សម្តេចតេជោក៏បានអំពាវនាវឱ្យពាក្យស្លោក “ខ្ញុំស្រលាញ់កាកបាទក្រហមកម្ពុជា I Love Cambodian Red Cross “ ក្លាយទៅជាការអនុវត្តជាក់ស្តែង និងជាចលនា ជាតិទាំងមូល ចាប់ពីថ្នាក់ជាតិ រហូតដល់ប្រជាពលរដ្ឋ។ សម្តេចតេជោក៏បានលើកឡើង ពីសារៈសំខាន់របស់កាកបាទក្រហមកម្ពុជា ដែលបានចូលរួមចំណែកយ៉ាងសំខាន់ក្នុងការបម្រើដល់សកម្មភាពមនុស្សធម៌ ដែលបាននឹងកំពុងអនុវត្តន៍យ៉ាងសកម្មក្នុងពេលបច្ចុប្បន្ន ដើម្បីជួយដល់ប្រជាពលរដ្ឋដែលរងគ្រោះដោយសារគ្រោះធម្មជាតិ ដោយប្រកាសផ្សេងៗ។ ជាមួយគ្នានេះ សម្តេចតេជោនាយករដ្ឋមន្ត្រី បានថ្លែងអំណរគុណដល់កម្លាំងមនុស្សធម៌ ដែលមានអាជ្ញាធរគ្រប់លំដាប់ថ្នាក់ យុវជនស្ម័គ្រចិត្តតាមបណ្តារាជធានី ខេត្ត-ក្រុងទាំង២៥ ដែលបានចូលរួមឆ្លើយតបទាន់ពេលវេលាក្នុងកាជួយសង្គ្រោះប្រជាពលរដ្ឋដែលជួបរងគ្រោះ ដោយ គ្រោះធម្មជាតិ ឬដោយប្រការផ្សេងៗនាពេលកន្លងមក និងបានថ្លែងអំណរគុណ ដល់សប្បុរស ជនទាំងជាតិ អន្តរជាតិ ដែលបានផ្តល់ជំនួយតាមរយៈកាកបាទក្រហមកម្ពុជាក្នុងការទ្រទ្រង់សក្មភាពមនុស្សធម៌៕