ភ្នំពេញ ថ្ងៃទី០៧ ខែឧសភា ឆ្នាំ២០១៩ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញចូលរួមពិធីស្រាយបួស«ខែរ៉ាម៉ាឌន» ជាមួយសាសនិកខ្មែរ-ឥស្លាម ដែលមកពីបណ្ដារាជធានី-ខេត្តចំនួន៤.៧៥០នាក់ នាល្ងាចថ្ងៃអង្គារ ៤កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០៧ ខែឧសភា ឆ្នាំ២០១៩ នៅមជ្ឈមណ្ឌលកោះពេជ្រ។
ក្នុងពិធីនេះក៏មានការអញ្ជើញចូលរួមឯកឧត្ដម Dato’ Sri Dr. Haji Wan Junaidi Bin Tuanku Jaafar សមាជិកសភាជាតិម៉ាឡេស៊ី និង ឯកឧត្ដម Dato’ Aidit សមាជិកក្រុមប្រឹក្សាសាសនាឥស្លាមនៅរដ្ឋសឺឡាង័រ ប្រទេសម៉ាឡេស៊ី និងសាសនិកឥស្លាមមកពីបរទេសចំនួន ៣២០រូប ដែលមាន ៣២ជាតិសាសន៍ រួមទាំងតំណាងរបស់លោកអគ្គលេខាធិការអង្គការសហប្រតិបត្តិការឥស្លាម OIC ចំនួន ៣នាក់ផងដែរ។ នេះជាឆ្នាំទី៦ហើយដែលប្រមុខរាជរដ្ឋាភិបាលកម្ពុជាប្រកាសចូលរួមជាអធិបតីភាពជួបជុំពិសារអាហារស្រាយបួសក្នុងខែរ៉ាម៉ាឌនជាមួយសាសនិកឥស្លាមកម្ពុជា ដែលឆ្នាំទី១ ពិធីនេះត្រូវបានរៀបចំនៅថ្ងៃទី ១៨ ខែកក្កដាឆ្នាំ២០១៤ដែលមានអ្នកចូលរួមប្រមាណ១.៤០០នាក់។ ជាងនេះទៀត កាលពីថ្ងៃទី០៥ខែឧសភាឆ្នាំ២០១៩កន្លងមកនេះ សម្ដេចតេជោនាយករដ្ឋមន្ត្រី បានផ្ញើរសារលិខិតមួយច្បាប់ជូនដល់បងប្អូនសាសនិកឥស្លាម កម្ពុជាដោយ សម្តេចមានប្រសាសន៍ថា “ក្នុងនាមខ្ញុំជានាយករដ្ឋមន្ត្រីនៃព្រះរាជាណាចក្រ កម្ពុជានិងភរិយាខ្ញុំសូមអបអរសាទរនិងសូមជូននូវពរជ័យសិរីសួស្ដី សុភមង្គល បវរមហា ប្រសើរ ជូនដល់បងប្អូនសាសនិកឥស្លាមកម្ពុជាក្នុង និងក្រៅប្រទេសរួមទាំងបងប្អូនសាសនិកឥស្លាមនៅទូទាំងពិភពលោកផងដែរដែលបានចូលបួសខែរ៉ាម៉ាឌនដែលកម្ពុជានឹងចាប់ផ្ដើមនៅថ្ងៃចន្ទទី១ ខែរ៉ាម៉ាឌន ឆ្នាំ១៤៤០ម៉ូហាំម៉ាត់សករាជត្រូវនឹងថ្ងៃទី៣កើត ខែពិសាខ ឆ្នាំកុរ ឯកស័ក ព.ស ២៥៦២ ដែលត្រូវនឹងថ្ងៃទី០៦ខែឧសភាឆ្នាំ២០១៩។
សម្ដេចតេជោ បានផ្ញើនូវក្តីនឹករលឹកនិងអរគុណយ៉ាងជ្រាលជ្រៅបំផុតចំពោះបងប្អូនឥស្លាមកម្ពុជាដែលបានចូលរួមថែរក្សាសុខសន្តិភាព ហើយមានជំនឿជឿជាក់លើការដឹកនាំរបស់សម្ដេច និងរបស់គណបក្សប្រជាជនកម្ពុជាតាំងពីដើមរៀងមក។ សម្ដេចតេជោក៏សូមបួងសួង សុំឱ្យបងប្អូនទាំងអស់ទទួលបាននូវសេចក្កីសុខសប្បាយក្ដីមេត្តា ករុណាពីអល់ឡោះគ្រប់ៗគ្នា និង សុំឱ្យអល់ឡោះ ទទួលយកនូវកុសលផលបុណ្យខែបួស រ៉ាម៉ាឌនទាំងអស់ដែលបងប្អូនបានប្រតិបត្តិសាងឡើងកុំបីអាក់ខានឡើយ។ ជាមួយគ្នានេះ វត្តមានរបស់សម្តេចតេជោ ហ៊ុន សែន ក្នុងពិធីដ៏សំខាន់របស់សាសនិកខ្មែរ-ឥស្លាម បានបង្ហាញពីការយកចិត្តទុកដាក់ខ្ពស់របស់សម្តេចតេជោចំពោះបងប្អូនខ្មែរ-ឥស្លាម ទោះបីសម្តេចជាព្រះពុទ្ធសាសនិកក៏ដោយ និង ក៏ដូចជាយកចិត្តទុកដាក់លើកកម្ពស់ផ្តល់សិទ្ធិសេរីភាពនៃជំនឿសាសនាដោយពេញលេញ ដោយឥតមានការប្រកាន់ពូជសាសន៍ ពណ៌សម្បុរ បង្កើតបាននូវសុខដុមនីយកម្មជាតិសាសន៍ និងសាសនា។ សម្រាប់ប្រទេសកម្ពុជាក្នុងរដ្ឋធម្មនុញ្ញបានចែងថា ព្រះពុទ្ធសាសនាជាសាសនារបស់រដ្ឋ តែក៏មិនបានហាមឃាត់លើសេរីភាពនៃជំនឿ និងការគោរពប្រណិបត្តិសាសនានោះដែរ។ នៅកម្ពុជានាពេលបច្ចុប្បន្នមានពុទ្ធសាសនិកប្រមាណ ៩៥ភាគរយ ឥស្លាមមានជិត ២ភាគរយ និងគ្រិស្ទសាសនិកប្រមាណ ១.២៥ភាគរយ ព្រមទាំងសាសនាផ្សេងៗមួយចំនួនទៀត។
គួរបញ្ជាក់ដែរថា ចាប់ពីថ្ងៃទី០៧ ខែឧសភា ឆ្នាំ ២០១៩ ត្រូវនឹងថ្ងៃទី ២ ខែ រ៉ាម៉ាឌន ឆ្នាំ១៤៤០ មូហាំម៉ាត់សករាជ សាសនិកឥស្លាមកម្ពុជា ក៏ដូចជាសាសនិកឥស្លាមនៅក្នុងពិភពលោកកំពុងបួសតមអាហារពីព្រលឹមរហូតដល់ថ្ងៃលិច ប្រមាណជាង ១៤ម៉ោង ដោយមានការប្រែប្រួលតាមតំបន់ខ្លះរយៈពេលមួយខែក្នុងមួយឆ្នាំ ដែលជាកាតព្វកិច្ចទី៤ ក្នុងចំណោមកាតព្វកិច្ចទាំង៥ នៃអ្នកកាន់សាសនាឥស្លាមទាំងអស់នៅលើសកលលោក៕
ដោយ ជឹម ណារី
