ភ្នំពេញ ថ្ងៃទី០៦ ខែឧសភា ឆ្នាំ២០១៩ — ប្រតិភូក្រុមភ្នាក់ងារអង្គការសហប្រជាជាតិ បានកត់សម្កាល់ និងសម្ដែងនូវការអបអរសាទរចំពោះការងារដែលរាជរដ្ឋាភិបាលកម្ពុជាបានអនុវត្តន៍នាឆ្នាំកន្លងមក ប្រកបដោយផ្លែផ្កានោះ។
ឯកឧត្ដម អ៊ាង សុផល្លែត ជំនួយការសម្ដេចតេជោ បានថ្លែងដូច្នេះប្រាប់អ្នកយកព័ត៌ មាន បន្ទាប់ពីជំនួបជាង៤ម៉ោង បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងប្រតិភូក្រុមភ្នាក់ងារអង្គការសហប្រជាជាតិ ដឹកនាំដោយលោជំទាវ Pauline Tamesis ចូលជួបពិភាក្សាការងារនាព្រឹកថ្ងៃទី០៦ ខែឧសភា ឆ្នាំ២០១៩ នៅវិមានសន្តិភាព។ នៅក្នុងកិច្ចប្រជុំនោះ ភ្នាក់ងារអង្គការសហប្រជាជាតិ បានលើកឡើងពីចំណុចសំខាន់ៗចំនួន៣ ដែល្នុងនោះមាន ទី១ ចំណុចដែលពាក់ព័ន្ធទៅនឹងកិច្ចគាំពារសង្គម ទី២ ទិន្នន័យសម្រាប់ការអភិវឌ្ឍ ដោយចីរភាព និងទី៣ ការចូលរួមពិនិត្យរបាយការណ៍ថ្នាក់ជាតិ លើគោលដៅអភិវឌ្ឍន៍ដោយចីរភាព នៅទីក្រុងញូវយ៉ក ក្នុងខែកក្កដាខាងមុខនេះ។ ពាក់ព័ន្ធនឹងចំណុចទីមួយក្នុងកិច្ចគាំពាររសង្គម ក្នុងករណីនេះ ប្រព័ន្ធអង្គការសហប្រជាជាតិបានលើកឡើងនូវចំណុច ៣ ដែល ក្នុងនោះមានទី១- គឺការសម្របសម្រួលរវាងស្ថាប័ន និងហេដ្ឋារចនាសម្ព័ន្ធ ក្នុងការកសាងសមត្ថភាព, ទី២- ការគាំពារសង្គម និងហិរញ្ញវត្ថុ, និងទី៣- ការងារគាំពារសង្គម ជាមួយនឹងការអនុវត្តប្រកបដោយសមភាព។
ចំពោះការងារនេះ សម្ដេចតេជោនាយករដ្ឋមន្ត្រី ហ៊ុន សែន បានអនុញ្ញាតឱ្យក្រសួងចំនួន៧ធ្វើការបកស្រាយ រួមមានក្រសួងសេដ្ឋកិច្ច និងហិរញ្ញវត្ថុ ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងសុខាភិបាល ក្រសួងផែនការ ក្រសួងកិច្ចការនារី ក្រសួងសង្គមកិច្ច និងក្រុមប្រឹក្សាស្ដារវិស័យកសិកម្ម និងជនបទ។ សម្ដេចតេជោក៏បានជម្រាបជូនប្រព័ន្ធភ្នាក់ងារអង្គការសហប្រជាជាតិថា កម្ពុជាកាលពីដើមឡើយមានភាពក្រីក្ររហូតទៅដល់១០០ភាគរយ ឯណ្ណោះ ហើយក៏មានការចាប់ផ្ដើមឡើងក្នុងការផ្ដល់កិច្ចគាំពារសង្គមទៅដល់ស្ត្រីដែលមានផ្ទៃពោះ បន្ទាប់មកទៅដល់ស្ត្រីដែលធ្វើការនៅតាមរោងចក្រ។ បន្ទាប់មកទៀតទៅដល់ស្ត្រីដែលមានភាពក្រីក្រ ហើយក៏បានធ្វើការងារមួយចំនួនបន្ថែមទៀតផង រួមទាំងការកាត់បន្ថយតម្លៃអគ្គិសនី ការកសាងហេដ្ឋារចនាសម្ព័ន្ធ ការជីកស្រះទឹក អណ្ដូងទឹក ជាដើម ដែលនេះសុទ្ធសឹងតែជាការងារកិច្ចគាំពារសង្គមតែម្ដង។ ចំណុចទីពីរ ដែលពាក់ព័ន្ធទៅនឹងទិន្នន័យសម្រាប់ការអភិវឌ្ឍន៍ សម្ដេចតេជោនាយករដ្ឋមន្ត្រីបានអនុញ្ញាតឱ្យក្រសួងចំនួន ៤ ធ្វើការបករស្រាយ រួម មាន ក្រសួងផែនការ ក្រសួងសេដ្ឋកិច្ច និងហិរញ្ញវត្ថុ ក្រសួងកិច្ចការនារី និងក្រសួងអប់រំយុវជន និងកីឡា។ ជាមួយនេះដែរ សម្ដេចតេជោក៏បានជម្រាបជូនករណីនេះ ដែលប្រព័ន្ធអង្គការសហប្រជាជាតិស្នើដើម្បីឱ្យធ្វើយ៉ាងណាបង្កើននូវថវិការជាតិ និងពង្រឹងសមត្ថភាព ទិន្នន័យសម្រាប់ការអភិវឌ្ឍនេះ។ សម្ដេចតេជោនាយករដ្ឋមន្ត្រីបានធ្វើការបកស្រាយថា កន្លងមករាជរដ្ឋាភិ បាលកម្ពុជាបានជំរុញការផ្ដល់ និងបង្កើនថវិកាជាតិជាប្រចាំ ហើយសង្ឃឹមថា នឹងឯកភាពធ្វើការបង្កើនថវិកាថែមទៀតសម្រាប់ការងារទិន្នន័យសម្រាប់ការអភិវឌ្ឍនេះ។ ដោយឡែកពាក់ព័ន្ធនឹងការពង្រឹងសមត្ថភាព សម្ដេចតេជោនាយករដ្ឋមន្ត្រីក៏បានធ្វើការណែនាំ ដោយធ្វើយ៉ាងណាជំរុញឱ្យមានការសិក្សានូវថ្នាក់បរិញ្ញាបត្រ ក៏ដូចជាបរិញ្ញាបត្រជាន់ខ្ពស់ដែរ ដែលពាក់ព័ន្ធនិងវិស័យនេះ ហើយឯកឧត្ដម រដ្ឋមន្ត្រីក្រសួងអប់រំយុវជន និងកីឡា ក៏បានធ្វើការណែនាំផងដែរ ទៅដល់ស្ថាប័នពាក់ព័ន្ធ ដូចជាសកលវិទ្យាធិការ ដើម្បីជំរុញអប់រំរហូតទៅដល់ថ្នាក់បរិញ្ញាបត្រ ក៏ដូចជាបរិញ្ញាបត្រជាន់ខ្ពស់ ពាក់ព័ន្ធនឹងកម្មវិធីទិន្នន័យសម្រាប់ការអភិវឌ្ឍនេះ។ ចំពោះការចូលរួមកិច្ចប្រជុំរាយការណ៍ពីរបាយការណ៍ថ្នាក់ជាតិ ស្ម័គ្រចិត្តលើការអនុវត្តគោលដៅអភិវឌ្ឍប្រកបដោយចីរភាព ដែលប្រព័ន្ធអង្គការសហប្រជាជាតិបានស្នើឱ្យកម្ពុជាចូលរួមនៅក្នុងកិច្ចប្រជុំនៅទីក្រុងញូវយ៉ក នៅខែកក្កដាខាងមុខនេះ ហើយឱ្យមានការគាំទ្រពីការចូលរួមអំពីស្ថាប័នពាក់ព័ន្ធទាំងអស់នោះ ជាការឆ្លើយតបសម្ដេចតេជោបានអនុញ្ញាតឱ្យឯកឧត្ដរដ្ឋមន្ត្រីក្រសួងផែនការធ្វើការបកស្រាយ ហើយសម្ដេចតេជោបានបន្ថែមថា កម្ពុជាបានត្រៀមខ្លួនជាស្រេចដើម្បីចូលរួមកិច្ចប្រជុំនៅខែកក្កដាខាងមុខនេះ។ ដោយឡែកចំពោះការសុំការគាំទ្រឱ្យមានការចូលរួមពីស្ថាប័នពាក់ព័ន្ធនោះ សម្ដេចតេជោនាយករដ្ឋមន្ត្រីបានឆ្លើយតបថា សព្វថ្ងៃនេះរាល់ការងារទាំងអស់គឺមានការសម្របសម្រួលគ្នា ហើយក៏មានការចូលរួមជាពិសេសអំពី ឧត្ដមក្រុមប្រឹក្សាជាន់ខ្ពស់សម្រាប់ការអភិវឌ្ឍ និងគណៈកម្មកាធិការគោលនយោបាយសេដ្ឋកិច្ចជាតិផងដែរ។
ឯកឧត្ដម អ៊ាង សុផល្លែត ជំនួយការសម្ដេចតេជោ បានឱ្យដឹងដែរថា ជំនួបរបស់រវាងប្រតិភូក្រុមភ្នាក់ងារអង្គការសហប្រជាជាតិ និងរាជរដ្ឋាភិបាល គឺមានការជួបគ្នាក្នុងមួយឆ្នាំម្ដង ហើយនេះជាលើកទី៥ ដែលក្រុមភ្នាក់ងារអង្គការសហប្រជាជាតិ ចូលជួបប្រជុំជាមួយរាជរដ្ឋាភិបាល៕
ដោយ ជឹម ណារី
