ភ្នំពេញ ថ្ងៃទី២៥ ខែមេសា ឆ្នាំ២០១៩ – សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញធ្វើដំណើរទៅដល់ទីក្រុងប៉េកាំង ប្រទេសចិន ប្រកបដោយសុវត្ថិភាពហើយ កាលពីវេលាម៉ោង១៣ និង៥០នាទី ម៉ោងនៅទីក្រុងប៉េកាំង ប្រទេសចិន ត្រូវនឹងម៉ោង១២ និង៥០នាទី ម៉ោងនៅរាជធានីភ្នំពេញ ប្រទេសកម្ពុជា ដើម្បីចូលរួមវេទិកាខ្សែក្រវាត់ និងផ្លូវ លើកទី២ សម្រាប់កិច្ចសហប្រតិបត្តិការអន្តរជាតិ ដែលនឹងប្រព្រឹត្តទៅនៅថ្ងៃទី២៦-២៧ ខែមេសា។
ប្រភពពីទូរទស្សន៍ជាតិកម្ពុជាបានឱ្យដឹងថា យន្តហោះពិសេសរបស់ព្រះរាជាណាចក្រកម្ពុជា ជើងហោះហើរលេខ ០០១ បានធ្វើការចុះចតប្រកបដោយសុវត្ថិភាព នៅអាកាសយានអន្តរជាតិប៉េកាំង ក្រោមវត្តមាននៃការទទួលបដិសណ្ឋារកិច្ច ស្វាគមន៍យ៉ាងស្និទ្ធស្នាល រាក់ទាក់បំផុត របស់លោកជំទាវ ជាឥស្សរជនជាន់ខ្ពស់រដ្ឋាភិបាលចិន និងឥស្សរជនការទូតរបស់ព្រះរាជាណាចក្រកម្ពុជា ប្រចាំសាធារណរដ្ឋប្រជាមានិតចិនជាច្រើនរូប។
តាមកម្មវិធីដែលបានគ្រោងទុក ក្រៅពីការអញ្ជើញចូលរួមវេទិកាខ្សែក្រវាត់ និងផ្លូវ លើកទី២ សម្រាប់កិច្ចសហប្រតិបត្តិការអន្តរជាតិ សម្តេចតេជោនាយករដ្ឋមន្រ្តី នឹងជួបពិភាក្សា ជាមួយឯកឧត្តម ស៊ី ជីនពីង ប្រធានាធិបតីចិន ឯកឧត្តម លី ខឺឈាង នាយករដ្ឋមន្រ្តីចិន ថ្នាក់ ដឹកនាំជាន់ខ្ពស់រដ្ឋាភិបាលចិន និងបណ្តាក្រុមហ៊ុនវិនិយោគចិនជាច្រើនទៀត ពិសេសទៅ ទៀតនោះ សម្តេចតេជោនាយករដ្ឋមន្រ្តី នឹងទទួលបាននូវជូនគោរមងារ សាស្រ្តាចារ្យកិត្តិយស ផ្នែកទំនាក់ទំនងអន្តរជាតិ ពីសាកលវិទ្យាល័យប៉េកាំង ដែលគ្រោងធ្វើឡើងនៅរសៀល ថ្ងៃទី២៥ ខែមេសា ឆ្នាំ២០១៩៕
ដោយ ជឹម ណារី
