សម្ដេចតេជោនាយករដ្ឋមន្ត្រីអញ្ជើញជួបសំណេះសំណាល និងពិសាភោជនាហារ​ជាមួយសមាគមសម្ព័ន្ធខ្មែរ-ចិន ប្រចាំឆ្នាំជាលើកទី៣

29

ភ្នំពេញ ថ្ងៃទី០៩ ខែមេសា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន ដែលរួមជាមួយឯក​អ​គ្គ​រដ្ឋ​ទូតនៃសាធារណរដ្ឋប្រជាមានិត​ចិនប្រចាំកម្ពុជាផងនោះ បានអញ្ជើញជួប​សំណេះ​​សំណាល និងពិសាភោជនាហារជាមួយថ្នាក់ដឹកនាំ និងសមាជិក សមាជិកាសមាគម​សម្ព័ន្ធ​ខ្មែរ-ចិន ចំនួនប្រមាណជាង៥.០​០​០ នាក់ ដែលជាជំនួបប្រចាំឆ្នាំជាលើកទី៣ នា​ល្ងាច​ថ្ងៃអង្គារ ៥កើត ខែចេត្រ ឆ្នាំច សំរឹទ្ធិស័ក ព.​ស ២៥៦២ ត្រូវនឹងថ្ងៃទី០៩ ខែមេសា ឆ្នាំ២០១៩ នៅមជ្ឈ​មណ្ឌល​កោះពេជ្រ។

លោកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរ-ចិននៅកម្ពុជា បានឱ្យដឹងថា ស​មា​គមសម្ព័ន្ធខ្មែរ-ចិន ត្រូវបានបង្កើតឡើងតាំងពីឆ្នាំ១៩៩០ ដោយជនជាតិចិន និងសហគម​ ចិ​ន​​នៅកម្ពុជា ព្រមទាំងបានទទួលកាអនុញ្ញាតដោយរាជរដ្ឋាភិបាលកម្ពុជា។ លោកឧកញ៉ា​បានបន្ដថា សមាគមប្រមូល​ផ្តុំ​ទៅ​ដោយអ្នកវិនិយោគ ពាណិជ្ជករ និងធុរជនខ្មែរ-ចិន ដែល​កំពុងតែវិនិយោគ ធ្វើពាណិជ្ជកម្ម និងធ្វើធុរកិច្ចនៅក្នុងប្រទេសកម្ពុជា។

ក្នុងជំនួបពិសាភោជនាហាររវាងសម្តេចតេជោ ហ៊ុន សែន ជាមួយសមាគមសម្ព័ន្ធខ្មែរ-ចិននៅកម្ពុជា ​នៅល្ងាចថ្ងៃទី០៩ ខែមេសា ឆ្នាំ២០១៩ នៅមជ្ឈមណ្ឌលកោះពេជ្រ លោក​ឧកញ៉ា ពុង ឃាវសែ បានបញ្ជាក់ថា នេះគឺជា​ការ​ពិសាភោជនាហារលើកទី៣ហើយ ដែល​ការជួបនេះ ក៏ជា​ឱកា​ស​ទទួលបាននូវអនុសាសន៍​បន្ថែមទៀតពីសម្តេចតេជោ ហ៊ុន សែន សម្រាប់ការវិនិយោគ​នៅ​កម្ពុ​ជា។

លោកឧកញ៉ាបានបន្តថា សមាគមសម្ព័ន្ធខ្មែរ-ចិននៅកម្ពុជា បានរួមចំណែកធ្វើ​ស​កម្ម​ភាព​ជាច្រើននៅក្នុង​ឆ្នាំ២០១៨កន្លងទៅ ដើម្បីគាំទ្រដល់ការរកស៊ី​របស់​ខ្មែរ-ចិន​នៅកម្ពុ​ជា ហើយក៏បានធ្វើសកម្ម​ភាពមនុស្សធម៌ច្រើនផងដែរ ដែលក្នុងឆ្នាំ​២០១៨​កន្លងទៅ សមាគម​បា​នធ្វើសកម្មភាពជាច្រើន​មានដូចជា ជួបពិសាបាយមិត្តភាពជា​មួយអាជីវករលក់ដូរក្នុងផ្សារ​នៅ​រាជធានីភ្នំពេញ សន្និសីទ​ស្តីពីសេដ្ឋកិច្ចនៃសហព័ន្ធពាណិជ្ជករ​ចិនទាជីវស​កលលោក សន្និសី​ទ​ជំរុញការវិនិយោគទុន នៅកម្ពុជា ពិធីសម្ពោធអាគារ​ទីស្នាក់​ការកណ្តាលសមាគមសម្ព័ន្ធខ្មែរ-ចិន ការលើកទឹកចិត្ត​ដល់​បងប្អូនខ្មែរមានសែស្រឡាយចិន​ទាំងអស់នៅកម្ពុជា ដើម្បីឱ្យឆ្លើយតប​ទៅ​នឹង​ការអំពាវនាវ​របស់សម្តេចតេជោ ហ៊ុន សែន ដើម្បី​គាំទ្រដល់មូលនិធិមន្ទីរពេទ្យគន្ធបុប្ផា ពិ​ធី​បើ​កការដ្ឋាន​សាងសង់អគារសាកលវិទ្យាល័យ​ពហុបច្ចេកទេសកម្ពុជា-ចិន បានជីកអណ្តូងទឹក​ចំ​នួ​ន៤៧ នៅខេត្តក្រចេះ ដើម្បីដោះស្រាយ​បញ្ហាកង្វះទឹកស្អាតសម្រាប់ប្រជាជនប្រើប្រាស់ជា​ង២.១៥០​គ្រួ​សារ។ ទន្ទឹមនេះ សមាគមបាន​ឧបត្ថម្ភប្រាក់ខែ​ដល់គ្រូបង្រៀន​ក្រីក្រដែលបង្រៀន​នៅ​សា​លាចិន​ទូទាំងប្រទេស ផ្តល់មូលនិធិ​ដល់​មជ្ឈមណ្ឌលបណ្តុះបណ្តាលគ្រូបង្រៀន លើកកម្ព​ស់​​ការអប់រំ​ភាសាចិននៅតាមមូលដ្ឋាន និងបណ្តុះបណ្តាលអ្នកជំនាញភាសាចិនផងដែរ។ ក្រៅ​ពី​នេះ​ទៀត សមាគមបានទាក់ទង​យ៉ាង​​សកម្ម​ជាមួយសមាគមពាណិជ្ជកម្ម និងស្ថាប័នវិនិយោ​គ​​ផ្សេងៗ និងបានផ្តល់ការ​ស្វាគមន៍​យ៉ាងកក់ក្តៅចំពោះគណៈប្រតិភូមកពីទូទាំងពិភពលោក ដើម្បីបម្រើ និងដើរតួនាទីជា​ស្ពានតភ្ជាប់អ្នកមានសែស្រឡាយចិននៅកម្ពុជា ឱ្យមានទំនាក់ទំ​ ន​ង​ និងសហប្រតិបត្តិការ​ជាមួយ​ប្រទេសចិន និងទូទាំងពិភពលោក៕

ដោយ ជឹម ណារី