ភ្នំពេញ ថ្ងៃទី០៨ ខែមីនា ឆ្នាំ២០១៩ — ឯកឧត្ដម Pierre Baillet លេខាធិការអចិន្ត្រៃយ៍ នៃសមាគមអភិបាលក្រុងនិយាយភាសាបារាំង បានចាត់ទុកកម្ពុជា ជាប្រទេសជាគំរូ ក្នុងការអភិវឌ្ឍគម្រោងរបស់ខ្លួន សម្រាប់យកទៅអនុវត្តន៍បន្តនៅបណ្ដាប្រទេសជិតខាងមួយចំនួនទៀត ហើយកម្ពុជានឹងធ្វើជាម្ចាស់ផ្ទះរៀបចំមហាសន្និបាតរបស់អភិបាលក្រុងនិយាយភាសាបារាំងដែលនឹងប្រព្រឹត្តទៅ នៅដើមខែធ្នូ ឆ្នាំ២០១៩ នៅរាជធានីភ្នំពេញ។
ឯកឧត្ដម ស្រ៊ី ថារុង្គ រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងដូច្នេះប្រាប់ក្រុមអ្នកយកព័ត៌មាន បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្ដម ឯកឧត្ដម Pierre Baillet លេខាធិការអចិន្ត្រៃយ៍ នៃសមាគមអភិបាលក្រុងនិយាយភាសាបារាំង និងគណៈប្រតិភូ ចូលជួបសម្ដែងការគួរសម កាលពីព្រឹកថ្ងៃទី០៨ ខែមីនា ឆ្នាំ២០១៩ នៅវិមានសន្តិភាព ក្នុងខណៈដែលឯកឧត្ដមអញ្ជើញមកបំពេញទស្សនកិច្ចនៅកម្ពុជា ដើម្បីរៀបចំមហាសន្និបាតរបស់អភិបាលក្រុង និយាយភាសាបារាំង ដែលនឹងប្រព្រឹត្តទៅ នៅដើមខែធ្នូ ឆ្នាំ២០១៩។
នៅក្នុងជំនួបនេះឯកឧត្តម Pierre Baillet បានសម្ដែងនូវការអរគុណយ៉ាងខ្លាំង និងជាកិត្តិយស ដែលសម្ដេចតេជោ បានអនុញ្ញាតឱ្យគណៈប្រតិភូរបស់ឯកឧត្ដម ចូលជួបសម្ដែងការគួរសម បើទោះបីជាសម្ដេចមានកម្មវិធី មមាញឹកយ៉ាងណាក៏ដោយ ហើយឯកឧត្ដម រីករាយណាស់ ដោយបានឃើញទីក្រុងភ្នំពេញ គឺជាទីក្រុងមួយ ជាសមាជិក នៃទីក្រុងដែលនិយាយភាសាបារាំង។ ឯកឧត្តមក៏បានពាំនាំនូវការផ្តាំផ្ញើសួរសុខទុក្ខ ក៏ដូចជាពិនិត្យមើលនូវគម្រោងអភិវឌ្ឍន៍នានា ដែលបានអនុវត្តន៍កន្លងមក និងគម្រោងដែលត្រូវអភិវឌ្ឍន៍ នៅពេលខាងមុខជាមួយនឹងជំនួយ ដែលបានមកពីសហគមន៍ និយាយភាសាបារាំង ក្នុងនោះក៏មានមូលនិធិ Bill Gate ផងដែរ ក្នុងការស្ដារប្រព័ន្ធកែលម្អបរិស្ថាន ទីក្រុងកាកសំណល់ ទឹកស្អុយ ឬក៏ទឹកដក់ នៅតាមផ្លូវជាដើម។ ឯកឧត្តមបានបន្ដទៀតថា កម្ពុជាជាគំរូ ជាពិសេសទីក្រុងភ្នំពេញ និងទីក្រុងសៀមរាប អាចជាគំរូនៅក្នុងការអភិវឌ្ឍនូវគម្រោងទាំងនេះ សម្រាប់បណ្ដាប្រទេសជិតខាង មានដូចជាទីក្រុងវៀងចន្ទន៍ ប្រទេសឡាវ និងទីក្រុង នៃប្រទេសវៀតណាមជាដើម។ ឯកឧត្តមក៏បានជម្រាបជូនសម្ដេចតេជោនាយករដ្ឋមន្ត្រី ផងដែរថា សមាគមអភិបាលក្រុងនិយាយភាសាបារាំង នឹងត្រៀមរៀបចំធ្វើសន្និបាត ដែលមានការចូលរួមពី អភិបាលក្រុងអភិបាលប៉ារីស នាដើមខែធ្នូ ឆ្នាំ២០១៩នេះ នៅទីក្រុងភ្នំពេញ និងខេត្តសៀមរាប ដែលក្នុងឱកាសនោះ នឹងរំលេចនូវភាពជោគជ័យ នៃការអនុវត្តគម្រោងនានា នៅកម្ពុជា ជាពិសេសនៅរាជធានីភ្នំពេញ និងនៅទីក្រុងសៀមរាប ហើយឱកាសនោះ ក៏នឹងបង្ហាញឱ្យសមាជិកមកពីទ្វីបទាំង៥ និងមានអភិបាលក្រុង ពីទ្វីបទាំងប្រាំ នៃពិភពលោកនេះ នឹងមកចូលរួមសន្និបាតនេះ។
ជាការឆ្លើយតប សម្ដេចតេជោ ហ៊ុន សែន បានសម្ដែងនូវការរីករាយ ដោយបានទទួលគណៈប្រតិភូដែលបានមកបំពេញទស្សនកិច្ចនៅកម្ពុជា ដែលឱកាសនេះសម្តេចសង្ឃឹមថា គណៈប្រតិភូបានឃើញផ្ទាល់នឹងភ្នែកនូវការរីកចម្រើន ជាពិសេស នៅក្នុងការអនុវត្តគម្រោងនានា ដែលសមាគមនៃអភិបាលក្រុង និយាយភាសាបារាំង បានជួយមកដល់កម្ពុជា ដែលមានប្រវត្តិតាំងពីក្នុងទសវត្សរ៍៨០មកម្ល៉េះ គឺថ្វីត្បិតតែពេលនោះ បារាំងនិងកម្ពុជា មិនទាន់ភ្ជាប់ទំនាក់ទំនងការទូតនឹងគ្នានៅឡើយ ដោយសារបានកាត់ផ្ដាច់ក្រោយរបបខ្មែរក្រហម តែអភិបាលក្រុងប៉ារីសកាលនោះ ឯកឧត្តម ហ្សាក់ ហ៊្សីរ៉ាក់ បានបញ្ជូនរថយន្តដឹកសំរាម ផ្ដល់មកឱ្យកម្ពុជា តាំងពីពេលនោះ។ សម្ដេចតេជោបានមានប្រសាសន៍បន្តថា វាជាកិត្តិយសសម្រាប់កម្ពុជា ដែលរាជធានីភ្នំពេញ បានក្លាយទៅជាសមាជិកមួយ នៃសមាគមប្រទេសដែលប្រើប្រាស់ភាសាបារាំង។ សម្ដេចតេជោបានបញ្ជាក់ជូនភ្ញៀវអំពីការរីកលូតលាស់យ៉ាងលឿន របស់រាជធានីភ្នំពេញជាងការប៉ាន់ស្មាន ជាពិសេសកំណើនប្រជាជន ដែលធ្វើឱ្យជួបបញ្ហាលំបាកនៅក្នុងការដោះស្រាយ បញ្ហាលូបង្ហូរទឹកកខ្វក់ និងបញ្ហាសំរាមជាដើម ជាពិសេស កំណើនប្រជាជននៅក្នុងទីក្រុងកាន់តែច្រើន ដែលទាំងអស់នេះ បានធ្វើឱ្យប៉ះពាល់ដល់ បរិស្ថាន ប៉ុន្តែយើងកំពុងខិតខំរៀបចំដោះស្រាយ។ សម្ដេចតេជោក៏បានស្វាគមន៍ និងរីករាយជានិច្ច ជាមួយគម្រោងនានា និងការជួយរបស់សមាគមក៏ដូចជាមូលនិធិផ្សេងៗ ដែលរាជរដ្ឋាភិបាល ក៏បានត្រៀមថវិកាបដិភាគ សម្រាប់អនុវត្តន៍គម្រោងទាំងនោះ ឱ្យប្រកបដោយជោគជ័យ។ សម្ដេចតេជោបានលើកឡើងថា ប្រទេសនិយាយភាសាបារាំងភាគច្រើន ជា ប្រទេសក្រីក្រ មិនអភិវឌ្ឍន៍ដូចប្រទេស ដែលនិយាយភាសាអង់គ្លេសទេ តែយើងមានមោទនភាព ដោយសារថា សមាគមប្រទេស ដែលនិយាយភាសាបារាំង មានស្មារតីជាសហគមន៍ យើងជួយគ្នា ដូចជា ទោះបីជាកម្ពុជា ទើបនឹងរួចផុតពីសង្គ្រាម ប៉ុន្តែយើងបានបញ្ជូនកងកម្លាំង ទៅជួយរក្សាសន្តិភាព នៅប្រទេសដែលនិយាយភាសាបារាំងមួយចំនួន ដូច្នេះវាជាកិច្ចសហប្រតិបត្តិការមួយ នៅក្នុងក្រុមប្រទេស ដែលនិយាយភាសាបារាំង។ ជានេះទៀត នៅក្នុងការប្រើប្រាស់ភាសាបារាំងនេះ ថ្វីត្បិតតែវាមាននិន្នាការ ឆ្ពោះទៅការប្រើភាសាអង់គ្លេស ក៏ប៉ុន្តែយើងក៏នៅបង្ហាត់បង្រៀន គ្រូភាសាបារាំង សម្រាប់បង្រៀន នៅក្នុងសាលា ហើយនៅក្នុងវិទ្យាស្ថានបច្ចេកទេស ក៏យើងប្រើប្រាស់ភាសាបារាំង និងក្នុងផ្នែកវេជ្ជសាស្ត្រ នៅក្នុងមហាវិទ្យាល័យពេទ្យផងដែរ។ សម្ដេចតេជោនាយករដ្ឋមន្ត្រីបានសម្ដែងនូវសេចក្ដីរីករាយ ក្នុងការដែលទីក្រុងភ្នំពេញ នឹងរៀបចំធ្វើជាទីកន្លែងសន្និបាត របស់សមាគម អភិបាលក្រុងនិយាយភាសាបារាំង ដែលនឹងប្រព្រឹត្តទៅ នៅដើមខែធ្នូ ឆ្នាំ២០១៩ខាងមុខនេះ៕
ដោយ ជឹម ណារី
