ខណៈចូលរួមកិច្ចប្រជុំថ្នាក់រដ្ឋមន្រ្តីលើកទី៧ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់នោះ នាព្រឹកថ្ងៃទី ២ ខែមីនា ឆ្នាំ២០១៩ នៅសណ្ឋាគារសុខាខេត្តសៀមរាប សម្ដេចអគ្គមហាសេនាបតីតេជោហ៊ុនសែននាយករដ្ឋមន្រ្តីនៃព្រះរាជាណាចក្រកម្ពុជាបានអនុញ្ញាតឱ្យ ឯកឧត្តម ចាន់ គឹមស៊ីង រដ្ឋមន្រ្តីក្រសួងពាណិជ្ជកម្មនិងឧស្សាហកម្មនៃប្រទេសសិង្ហបុរី ចូលជួបសម្ដែងការគួរសម។
ឯកឧត្ដម អ៊ាង សុផល្លែត ជំនួយការសម្ដេចតេជោបានឱ្យដឹងថា នៅក្នុងជំនួបនោះ ឯកឧត្តម រដ្ឋមន្រ្តីក្រសួងពាណិជ្ជកម្ម និងឧស្សាហកម្មសិង្ហបុរី បានពាំនាំនូវការផ្តាំផ្ញើសាកសួរពីនាយករដ្ឋមន្ត្រីសិង្ហបុរី ជូនសម្តេចតេជោ ហើយក៏បានគោរពជម្រាបជូនសម្ដេសតេជោ អំពីទស្សនៈរបស់ឯកឧត្ដមផ្ទាល់ពាក់ព័ន្ធនឹងបញ្ហាពាណិជ្ជកម្ម ព្រោះថា ការធ្វើពាណិជ្ជកម្ម គឺចាំបាច់ត្រូវធ្វើតាមរយៈផ្លូវគោក ផ្លូវទឹក ផ្លូវអាកាស ហើយជាពិសេសទៅទៀត ក្នុងយុគសម័យនេះ គប្បីណាត្រូវយកចិត្តទុកដាក់ខ្លាំងតាមរយៈប្រព័ន្ធអេឡិចត្រូនិកតែម្ដង។ ឯកឧត្ដមក៏បានគោរពអនុញ្ញាតសុំអនុសាសន៍ពីសម្ដេចតេជោនាយករដ្ឋមន្ត្រី ពាក់ព័ន្ធជុំវិញករណីពាណិជ្ជកម្មនេះ។
ជាការឆ្លើយតប សម្តេចតេជោបានថ្លែងអំណរគុណចំពោះការផ្តាំផ្ញើសួរសុខទុក្ខពីថ្នាក់ដឹកនាំសិង្ហបុរី ហើយក៏បានឯកភាពជាមួយឯកឧត្តមចាន់ គឹមស៊ីងដែរថា ក្នុងយុគសម័យនេះការធ្វើពាណិជ្ជកម្មតាមប្រព័ន្ធអេឡិចត្រូនិកនេះ គឺមានសារៈសំខាន់បំផុត ទោះយ៉ាងណាក៏ដោយ គឺមិនអាចកាត់ផ្ដាច់បានពីការធ្វើពាណិជ្ជកម្មតាមផ្លូវគោក ផ្លូវអាកាស និងតាមផ្លូវទឹកផងដែរ ដោយធ្វើយ៉ាងណា ឱ្យមានការតភ្ជាប់គ្នារវាងប្រព័ន្ធជំនួយដល់ការធ្វើពាណិជ្ជកម្ម ទាំងអស់នេះ។ជាងនេះទៀត សម្ដេចតេជោ បានលើកទឹកចិត្ត និងថ្លែងអំណរគុណ ឯកឧត្ដម ចាន់ គឹមស៊ីង ដែលបានមកចូលរួមក្នុងកិច្ចប្រជុំអាស៊ីនេះ ហើយក៏បានលើកទឹកចិត្តសូមឱ្យធ្វើយ៉ាងណា ជំរុញកិច្ចប្រជុំអាស៊ីនេះឱ្យទទួលបានជោគជ័យតាមដែលបានគ្រោងទុកកន្លងមក។ សម្ដេចតេជោ ក៏បានមានប្រសាសន៍ផងដែរថា ជោគជ័យនៃកិច្ចប្រជុំនេះ នឹងអាចជួយជំរុញសេដ្ឋកិច្ចអាស៊ានផងដែរ។ ពាក់ព័ន្ធនឹងជំនួបទ្វេភាគី សម្ដេចតេជោ ហ៊ុន សែន ក៏បានលើកឡើងជូន ឯកឧត្ដម ចាន់ គឹមសេង ផងដែរថា នៅពេលនេះ យើងបានធ្វើការសម្រួលនៃការយកពន្ធត្រួតគ្នារវាងសិង្ហបុរីហើយ។ ក្នុងន័យនេះ គប្បីណាពិចារណា ជំរុញឱ្យសិង្ហបុរី មកវិនិយោគ មកទទួលទិញនូវផលិតផលកសិផលពីកម្ពុជាផងដែរ ព្រោះថាប្រទេសទាំងពីរ កម្ពុជា-សិង្ហុបុរី បានសម្រួលជាមួយគ្នារួចហើយ ៕
ដោយ ជឹម ណារី
