ភ្នំពេញ ថ្ងៃទី២៦ ខែកុម្ភៈ ឆ្នាំ២០១៩ – សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង ឯកឧត្តម ង្វៀង ហ៊្វូជុង (Nguyen Phu Trong) អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្ត និងជាប្រធានរដ្ឋនៃសាធារណរដ្ឋសង្គមនិយមវៀតណាម បានសម្ដែងនូវការស្វាគមន៍ និងអបអរសាទរ ចំពោះជំនួបកំពូលរវាងមេដឹកនាំសហរដ្ឋអាមេរិក ឯកឧត្តម ដូណាល់ ត្រាំ និងប្រធានាធិបតីកូរ៉េខាងជើង ឯកឧត្តម គីម ជុងអ៊ុន ដែលនឹងប្រព្រឹត្តទៅក្នុងប្រទេសវៀតណាមនោះ។
ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានថ្លែងដូច្នេះប្រាប់អ្នកយកព័ត៌មាន ក្រោយជំនួបពិភាក្សាការងាររបស់សម្ដេចតេជោ ហ៊ុន សែន និងឯកឧត្តម ង្វៀង ហ៊្វូជុង នៅព្រឹកថ្ងៃទី២៦ ខែកុម្ភៈ ឆ្នាំ២០១៩ នៅវិមានសន្តិភាព ក្នុងខណៈដែលឯកឧត្ដម ដឹកនាំគណៈប្រតិភូជាន់ខ្ពស់នៃសាធារណរដ្ឋសង្គមនិយមវៀតណាម មកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា។
នៅក្នុងជំនួបនោះដែរ ឯកឧត្ដម Nguyen Phu Trong បានមានប្រសាសន៍ថា នេះគឺជា លើកទី១ហើយ ដែលឯកឧត្តមបានមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា ក្នុងឋានៈជាអគ្គលេខាធិការមជ្ឈិមបក្ស និងជាប្រធានរដ្ឋរបស់វៀតណាម ហើយដំណើរ ទស្សនកិច្ចនេះ ស្របពេលជាមួយនឹងឆ្នាំថ្មីទើបឈានកន្លងផុតទៅជាមួយនឹងខួបទី៤០ឆ្នាំនៃ ការផ្តួលរំលំរបបប្រល័យពូជសាសន៍ ប៉ុល ពត របស់ប្រទេសកម្ពុជា ហើយក្នុងដំណើរទស្សនកិច្ចនេះ ឯកឧត្តមមានបំណងពង្រីក និងពង្រឹងនូវកិច្ចសហប្រតិបត្តិការរវាងប្រទេសទាំងពីរដែលមានស្រាប់ ហើយក៏ដើម្បីពិនិត្យមើលឡើងវិញនូវរាល់អ្វីដែលបានព្រមព្រៀងកន្លងផងដែរ ដែលឈរលើមូលដ្ឋាននេះ ដើម្បីដាក់ទិសដៅសម្រាប់ការអភិវឌ្ឍទំនាក់ទំនងនៃប្រទេសទាំងពីរ។
ឯកឧត្តមក៏បានមានប្រសាសន៍ផងដែរថា ក្នុងដំណើរទស្សនកិច្ចមកកាន់ប្រទេសកម្ពុជានាពេលនេះ ឯកឧត្តម បានសង្កេតឃើញថាព្រះរាជាណាចក្រកម្ពុជាគឺទទួលបានជោគជ័យលើវិស័យជាច្រើន រួមមានការអភិវឌ្ឍន៍ខាងហេដ្ឋារចនាសម្ព័ន្ធ សំណង់ សេដ្ឋកិច្ចកម្ពុជាគឺមានកំណើនកើនឡើងជាង៧ភាគរយ ហើយស្ថានភាពនៅកម្ពុជាគឺមានស្ថិរភាព និងទំនាក់ ទំនងការទូតរបស់កម្ពុជា ក៏មានការបើកទៅក្រៅជាមួយបណ្តាប្រទេសនានា ជាលំដាប់ ផងដែរ។ ក្នុងន័យនេះ ឯកឧត្តម ក៏សូមសម្ដែងនូវការអបអរសាទរចំពោះជោគជ័យដែលកម្ពុជាទទួលបានលើគ្រប់វិស័យកន្លងមកនេះ។ ឯកឧត្តម ក៏បានមានប្រសាសន៍ផងដែរថា ឯកឧត្តម បានចូលគាល់ព្រះករុណាព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះអគ្គមហា សង្ឃរាជផងដែរ ហើយឯកឧត្ដមពិតជាមានកិត្តិយសណាស់ដែលត្រូវបានទទួលបដិសណ្ឋារ កិច្ចដោយកក់ក្តៅជាទីបំផុត។
ជាការឆ្លើយតប សម្ដេចតេជោ នាយករដ្ឋមន្ត្រីបានឯកភាពទៅលើអ្វីដែលឯកឧត្តម Nguyen Phu Trong បានលើកឡើង ហើយសម្តេចបានមានប្រសាសន៍ថា កម្ពុជាទទួលបានការអភិវឌ្ឍរហូតមកដល់ពេលនេះ គឺមិនអាចកាត់ផ្ដាច់បានពីការចូលរួមរបស់ កងទ័ព ប្រជាជន បក្ស និងរដ្ឋាភិបាលវៀតណាមឡើយ ហើយសម្ដេចក៏បានឯកភាពផងដែរថា ឈរលើមូលដ្ឋានលើទំនាក់ទំនងនៃកិច្ចសហប្រតិបត្តិការកន្លងមក គឺធ្វើយ៉ាងណាជំរុញឱ្យទំនាក់ទំនងនេះកាន់តែរីកចម្រើនឡើងថែមទៀត តាមរយៈស្ថាប័នទាំងអស់របស់រាជរដ្ឋាភិបាលកម្ពុជា និងរដ្ឋាភិបាលវៀតណាម ដោយធ្វើការឱ្យកាន់តែសកម្មឡើងបន្ថែមទៀត។
សម្តេចតេជោនាយករដ្ឋ មន្ត្រីក៏បានសម្ដែងនូវការអបអរសាទរចំពោះវៀតណាម ដែលបាននឹងកំពុងទទួលការស្វាគមន៍ រៀបចំនូវជំនួបកំពូល រវាងមេដឹកនាំសហរដ្ឋអាមេរិក ឯកឧត្តម ដូណាល់ ត្រាំ និងប្រធានាធិបតីកូរ៉េខាងជើង ឯកឧត្តម គីម ជុងអ៊ុន ដែលនឹងប្រព្រឹត្តទៅក្នុងប្រទេសវៀតណាមផងដែរ៕