ប្រធានសភាប្រឹក្សានយោបាយប្រជាជនចិនថ្លែងថា ទស្សនកិច្ចករបស់សម្ដេចតេជោ ហ៊ុន សែន នៅប្រទេសចិននឹងជំរុញឱ្យទំនាក់ទំនងប្រទេសទាំងពីរកាន់តែប្រសើរឡើង

50

ភ្នំពេញ ថ្ងៃទី២៣ ខែមករា ឆ្នាំ២០១៩ -ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានឱ្យដឹងថា នៅក្នុងជំនួប​រ​វាង​សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង   ​ឯ​កឧត្ដម វ៉ាង យ៉ាង ប្រធានសភា​ប្រឹក្សា​នយោបាយ​ប្រជាជន​ចិន កាលពី​​រសៀលថ្ងៃអង្គារ ២ រោច ខែបុស្ស ​ឆ្នាំច សំរឹទ្ធិស័ក ព.ស​២៥៦២ ​ត្រូវនឹងថ្ងៃ​ទី២២ ខែ​មក​រា ​ឆ្នាំ២០១៩ ក្នុងដំណើរ ទស្សនកិច្ចទៅកាន់សាធារណរដ្ឋប្រជាមានិតចិននោះ ឯកឧត្ដម វ៉ាង យ៉ាង បាន​មានប្រសាស ន៍​ស្វាគមន៍​សម្ដេច​តេ​ជោ​នាយក​រដ្ឋមន្ត្រី​ដោយ​គួសបញ្ជាក់​ថា ​ដំ​ណើរ​​​ទស្សនកិច្ច​របស់​សម្ដេច​តេ​ជោ​មក​ប្រទេស​ចិន​នៅពេលនេះ នឹងជំរុញឱ្យទំនាក់ទំនង​មិត្ត​ភា​ព​​កិច្ចហប្រតិបត្តិការលើ គ្រប់វិស័យរវាងប្រទេសទាំងពីរកាន់តែប្រសើរឡើង។

​ឯកឧត្ដមប្រធានសភា​ប្រឹក្សា​នយោបាយ​ប្រជាជន​ចិន ​បាន​មានប្រសាសន៍ថា ​សម្តេច​តេ​ជោ​គឺជា​មេដឹកនាំ​នយោបាយ​មួយរូប​ដែលមាន​បទពិសោធន៍​ច្រើន ​ហើយក៏បាន​អបអរសា ទរចំពោះ​លទ្ធផល​នៃការបោះឆ្នោត​របស់​ប្រទេស​កម្ពុជា​នៅ​ឆ្នាំ២០១៨កន្លងទៅនេះ ​ដែល​គណ​បក្ស​​​ប្រជាជន​កម្ពុជា​បានឈ្នះ​ភ្លូកទឹកភ្លូកដី និង បាន​អបអរសាទរ​សម្ដេច​តេជោ​ដែល​ត្រូវបាន​ជា​ប់​ឆ្នោ​ត​សារជាថ្មី​ទៀត​ជា​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ​។

​ជាការ​ឆ្លើ​យ​ត​​ប​សម្ដេច​តេ​ជោ​នាយករដ្ឋមន្ត្រី​បាន​​អរគុណ​ចំពោះ​ពាក្យពេចន៍​ និង​ការ ស្វាគមន៍​របស់​ភាគី​ចិន​ក្នុង​ទស្សនកិច្ច​របស់​សម្តេច និងគណៈប្រតិភូ​។ ​សម្តេច​តេ​ជោ​នាយក​មន្ត្រី​បាន​មានប្រ​សាស​ន៍​ថា ​ដំណើរ​ទស្សនកិច្ច​ផ្លូវការ​របស់​សម្ដេច​ គឺមាន​សារៈសំខាន់​មិន​ត្រឹមតែ​សម្ដេច​នោះទេ​ គឺ​រួមទាំង​សម្រាប់​បម្រើ​ផលប្រយោជន៍​នៃ​ប្រទេស​ទាំងពីរ ​ដើម្បី​ចូល រួមចំណែក​លើ​កម្រិត​ទំនាក់​ទំន​ង​​​កិច្ចសហប្រតិបត្តិការ​រ​វាង​ប្រទេស​ទាំងពីរ​ផងដែរ​។ ​សម្ដេច​តេ​ជោ​បាន​គូសបញ្ជាក់ថា ​យើង​ពិតជា​បានទទួល​ផលប្រយោជន៍​ច្រើន​ពី​ប្រទេស​ចិន ​ហើយ​ការ រីកចម្រើន​នេះ​មិន​ត្រឹមតែ​ខ្លួន​ឯ​ង​ទេ ​គឺ​សម្រាប់​ប្រទេស​ដទៃ​ផ្សេងទៀត​ផងដែរ ។ ចំពោះ​គំនិត​ផ្ដួចផ្ដើម​ខ្សែក្រវាត់​មួយ ផ្លូវ​មួយ ​វិញ​សម្តេច​បាន​មានប្រសាសន៍ថា ​ពិតជា​បាន​ផ្ដល់នូវ​អត្ថ ប្រយោជន៍​សម្រាប់ភាគី​ទាំងអស់​ ដែ​ល​​​​ចូលរួម​នៅក្នុង​គំនិត​នេះ ហើយ​ផ្អែកទៅលើ​ស្ថានភាព​នេះ​កម្ពុជា​ក៏​ផ្សាភ្ជាប់​ជាមួយនឹង​យុទ្ធ​សា​ស្ត្រ​ចតុកោណ​របស់​រាជរដ្ឋាភិបាល​កម្ពុជា​ផងដែរ​។

សម្ដេច​តេ​ជោ​បាន​គូសបញ្ជាក់​អំពី​គ​ម្រោ​ង​ជាច្រើន​ដែល​ស្ថិតនៅក្រោម​គំនិត​ផ្ដួចផ្ដើម​ខ្សែក្រវាត់​មួយ ផ្លូវ​មួយ និង យុទ្ធសាស្ត្រ​ចតុ​កោ​ណ​នៃរាជរដ្ឋាភិបាល​កម្ពុជា​ ដែល​កាលពី​ម្សិលមិញ​សម្ដេច​បាន​ជួបចរចា​ជាមួយ​ឯកឧត្ដម​ប្រធា​នា​ធិបតី ស៊ី ជីន​ពីង ក្នុងការ​ពិគ្រោះ​យោបល់​អំពី​ស្ថានភាព​នៅ​កម្ពុជា ​ជាពិសេស​ទៅលើ​សេដ្ឋ​កិ​ច្ច​នៅក្នុង​ប្រទេស​កម្ពុជា​កន្ល​ង​ទៅនេះ ​គឺមាន​ការរីកចម្រើន​ ជាពិសេស​កំណើនសេដ្ឋកិច្ច ៧,៣ភា​​គ​រយ ក្នុង​ឆ្នាំ២០១៨កន្លង ទៅ ហើយដែល​ភាព​រីកចម្រើន​នេះ​ក៏ដោយ​សារ​មាន​វិនិយោគ​រប​ស់​ចិន​មក​បណ្តាក់ទុន​នៅក្នុង​ប្រទេស​កម្ពុជា​ផងដែរ​។ សម្តេចតេជោនាយករដ្ឋមន្ត្រី​ក៏បាន​អញ្ជើ​ញ​លោក វ៉ាង យ៉ាង មក​ទស្សនកិច្ច​នៅ​ប្រទេស​កម្ពុជា​នៅពេលវេលា​សមស្រប​ខាងមុខ ហើយ​ឯកឧត្ដម​ប្រធាន​ក៏បាន​អរគុណ​សម្តេច ចំពោះ​ការអញ្ជើញ​របស់​សម្តេច​ហើយ​ឯកឧត្តម​នឹង​រក​ពេ​ល​វេលា​សមស្រប​ណាមួយ​នាពេលខាងមុខ​។

ឯកឧត្ដមប្រធានសភា​ប្រឹក្សា​នយោបាយ​ប្រ​ជា​ជ​ន​​ចិន​​បាន​គូសបញ្ជាក់ថា​ បច្ចុប្បន្ននេះ​ចិន​បានចាត់ទុក​ទំនាក់ទំនង​ជាមួយ​កម្ពុ​ជា​គឺ​ល្អ​បំផុត​នៅ​ក្នុង​ប្រវត្តិសាស្ត្រ​នៃ​ប្រទេស​ទាំងពីរ ហើយដោយ​សារមាន​កិច្ចសហប្រតិបត្តិការ​ជាច្រើន​គ្រ​ប់​លំ​ដាប់​លើ​គ្រប់​វិស័យ ​ជាពិសេស​ទៀត​គឺ​គេ​មាន​កិច្ចសហប្រតិបត្តិការ​និង​ការសម្របសម្រួល​រវាង​ប្រទេស​ទាំងពីរក្នុង​កម្រិត​អន្តរជាតិ​ផងដែរ​។ ​ឯកឧត្ដម​បន្តថា ​ចិន​នឹង​បន្ត​ធ្វើការ​ជាមួយគ្នា​ទៅ​លើ​​កិច្ចសហប្រតិបត្តិការ    ​រ​វាង​ប្រទេស​ទាំងពីរ ​ជាពិសេស​កិច្ច​សហ​ប្រត្តិ​បត្តិការ​ទៅលើ​ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​ផ្នែក​នយោបាយ សន្តិសុខ សេដ្ឋកិច្ច​ ​ប្រជាជន​និង​ប្រ​ជា​ជន​​ផងដែរ ។

ឯកឧត្ដមក៏បានមានប្រសាសន៍ផងដែរថា ឯកឧត្ដម​ពិតជា​គាំទ្រ​ចំពោះ​គ្រប់​ទិសដៅ​​របស់​សម្ដេចតេជោ​ដែល​បាន​បង្កើត​ឧ​ត្ត​ម​ក្រុមប្រឹក្សា​ពិគ្រោះ​និង​ផ្ដល់យោបល់​ ដែលនេះជា​យន្តការ​ថ្មី​មួយទៀត​ក្នុងប្រទេស​កម្ពុជា​នេះ ។ ​ឯកឧត្ដមបន្តថា​ ស្ថាប័ន​ទាំងសងខាង​និង​បន្ត​កសាង​​ទំនាក់ទំនង​កាន់តែ​ជិតស្និទ្ធ​បន្ថែម​ទៀត ហើយ​នឹងមាន​ការផ្លាស់ប្ដូរ​​ទស្ស​ន​កិច្ច​គ្នា​ទៅ​វិញទៅមក​ក្នុង​កម្រិត​ខ្ពស់​ជាបន្តបន្ទាប់​ទៀត​ ៕

ដោយ ជឹម ណារី