ភ្នំពេញ ថ្ងៃទី២២ ខែមករា ឆ្នាំ២០១៩ -ក្នុងជំនួបពិភាក្សាកាងារនិងសម្ដែងការគួរសមជាមួយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នារសៀលថ្ងៃចន្ទ ១រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២១ ខែមករា ឆ្នាំ២០១៩ ក្នុងដំណើរទស្សនកិច្ចផ្លូវការ រយៈពេលបីថ្ងៃទៅកាន់សាធារណរដ្ឋប្រជាមានិតចិននោះ ឯកឧត្តម សុង តាវ (Song Tao) រដ្ឋមន្រ្តីក្រសួងទំនាក់ទំនងអន្តរជាតិ នៃគណៈកម្មាធិការមជ្ឈិមបក្សកុម្មុយនីស្តចិន ថ្លែងថា ចិននឹងបន្តគាំទ្រសម្តេចតេជោនាយករដ្ឋមន្រ្តីសម្រាប់រយៈពេលវែង និងចូលរួមចំណែកដល់ ការអភិវឌ្ឍសេដ្ឋកិច្ចរបស់ប្រទេសកម្ពុជា ពិសេសគាំទ្រដល់កម្ពុជាក្នុងការការពារអធិបតេយ្យ ភាព និងឯករាជ្យភាពរបស់ខ្លួនឱ្យកាន់តែរឹងមាំថែមទៀត។
ប្រភពពីទូរទស្សន៍ជាតិកម្ពុជា(TVK)បានឱ្យដឹងថា នៅក្នុងជំនួបនោះ សម្តេចតេជោនាយករដ្ឋមន្រ្តី មានប្រសាសន៍ថ្លែងនូវអំណរគុណជូន ចំពោះឯកឧត្តម សុង តាវ ដែលបាន ឆ្លៀតពេលវេលាដ៏មមាញឹក អញ្ជើញមកជួបសួរសុខទុក្ខ ដោយផ្ទាល់ចំពោះរូបសម្តេចនៅទី ក្រុងប៉េកាំងនាពេលនេះ បន្ទាប់ពីការជួបនៅរាជធានីភ្នំពេញ កាលពីពេលថ្មីៗកន្លងទៅ។ សម្តេចតេជោនាយករដ្ឋមន្រ្តី និងឯកឧត្តម សុង តាវ ក៏បានធ្វើការពិភាក្សាគ្នាយ៉ាងស៊ីជម្រៅ ទៅលើការពង្រឹង និងពង្រីកទំនាក់ទំនងកិច្ចសហប្រតិបត្តិការ រវាងប្រទេសទាំងពីរកម្ពុជា-ចិន ទាំងផ្នែករដ្ឋ គណបក្ស និងផ្នែកឯកជន ពិសេសការតភ្ជាប់រវាងប្រជាជន និងប្រជាជនរវាង ប្រទេសទាំងពីរ។
ឯកឧត្តម សុង តាវ មានប្រសាសន៍ថា សម្តេចតេជោនាយករដ្ឋមន្រ្តី គឺជាអ្នកដែល បានយកចិត្តទុកដាក់ពីទំនាក់ទំនងរវាងចិន និងកម្ពុជា តាមរយៈទស្សនកិច្ច និងការងារផ្សេង ៗទៀត ពិសេសទំនាក់ទំនងរវាងរដ្ឋ និងរដ្ឋ។ ឯកឧត្តមមានប្រសាសន៍ថា ឯកឧត្តមប្រធានា ធិបតីចិន ស៊ី ជីងពីង ចាត់ទុកសម្តេចតេជោគឺជាមិត្តដែកថែប សម្រាប់ប្រទេសនិងប្រជាជន ចិន។ តាមរយៈនេះចិននឹងបន្តគាំទ្រសម្តេចតេជោនាយករដ្ឋមន្រ្តីសម្រាប់រយៈពេលវែង និង ចូលរួមចំណែកដល់ការអភិវឌ្ឍសេដ្ឋកិច្ចរបស់ប្រទេសកម្ពុជា ពិសេសគាំទ្រដល់កម្ពុជាក្នុងការ ការពារអធិបតេយ្យភាព និងឯករាជ្យភាពរបស់ខ្លួនឱ្យកាន់តែរឹងមាំថែមទៀត។ ឯកឧត្តមក៏បាន គូសបញ្ជាក់ជូនសម្តេចតេជោ ពីកម្មវិធីជាច្រើនទៀត ក្នុងការជួយដល់កម្ពុជាក្នុងនោះរួមទាំង វិស័យអាទិភាពរបស់កម្ពុជា គឺការបណ្តុះបណ្តាលធនធានមនុស្ស ពិសេសមន្រ្តីកម្ពុជា។
សម្តេចតេជោ មានប្រសាសន៍ថា សម្តេចពិតជាមានមោទនភាពចំពោះទំនាក់ទំនង នៃប្រទេសទាំងពីរ ពិសេសបានថ្លែងអរគុណដល់ប្រទេសចិន ដែលបានជួយគាំទ្រដល់កម្ពុជាលើគ្រប់វិស័យ។ សម្តេចតេជោនាយករដ្ឋមន្ត្រីបន្តថា នយោបាយខ្សែក្រវាត់មួយ ផ្លូវមួយ គឺផ្សាភ្ជាប់ទៅនឹងយុទ្ធសាស្រ្តចតុកោណរបស់កម្ពុជា ដែលនោះគឺជាវិថីដ៏ល្អក្នុងការជំរុញទំនាក់ទំនងរវាងប្រទេសទាំងពីរកាន់តែរឹងមាំបន្ថែមទៀត៕
ដោយ ជឹម ណារី
