ភ្នំពេញ ថ្ងៃទី២១ ខែមករា ឆ្នាំ២០១៩ — ក្នុងឱកាសស្នាក់អាស្រ័យ និងបំពេញទស្សនកិច្ចផ្លូវការនៅសាធារណរដ្ឋប្រជាមានិតចិន នាព្រឹកថ្ងៃទី២១ ខែមករា ឆ្នាំ២០១៩ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យក្រុមហ៊ុនវិស្វកម្ម និងដែកថែបចិន ដឹកនាំដោយ លោក ស៊ូ ស៊ីវេ (Xu Siwei) ប្រធានក្រុមប្រឹក្សាភិបាលនៃក្រុមហ៊ុនវិស្វកម្មនិងដែកថែបចិនចូលជួបសម្តែងការគួរសម និងពិភាក្សាការងារ នៅ Diaoyutai State Guesthouse ទីក្រុងប៉េកាំង។
ប្រភពពីទូរទស្សន៍ជាតិកម្ពុជាបានឱ្យដឹងថា លោក ស៊ូ ស៊ីវេ (Xu Siwei) បានជម្រាបជូន សម្តេចតេជោ អំពីគម្រោងដែលក្រុមហ៊ុនរបស់លោក កំពុងអនុវត្តន៍នៅក្នុងប្រទេសកម្ពុជាក្នុងការផលិតវារីអគ្គិសនីដើរដោយធ្យូងថ្ម រួមទាំងការចាប់អារម្មណ៍បន្ថែមពាក់ព័ន្ធទៅនិង គម្រោងសាងសង់ហេដ្ឋារចនាសម្ព័ន្ធក្នុងប្រទេសកម្ពុជាផងដែរ ដោយឈរលើ នយោបាយបើកចំហរបស់ សម្តេចតេជោ និងរាជរដ្ឋាភិបាលកម្ពុជា ដែលស្វាគមន៍ អ្នកវិនិយោគបរទេសទាំងអស់ក្នុងការមកបណ្តាក់ទុនកសាងនិងអភិវឌ្ឍន៍ប្រទេស។ ក្រុមហ៊ុន មានទំនុកចិត្តយ៉ាងខ្លាំងលើការដឹកនាំរបស់សម្តេចតេជោ ដែលធ្វើឱ្យប្រទេស មានសុខ សន្តិភាព ស្ថិរភាព និងមានកំណើនសេដ្ឋកិច្ចខ្ពស់ ហើយទន្ទឹមនឹងនេះដែរ គឺប្រទេសចិននិងកម្ពុជាមានទំនាក់ទំនងទ្វេភាគីល្អដូចជាបងប្អូនទៀតផង។
លោកបានបញ្ជាក់ថា ក្រុមហ៊ុនលោកក៏មានគម្រោងសាងសង់ខ្សែកាបអុបទិកក្រោមបាតសមុទ្រ ពីភ្នំពេញទៅហុងកុង ដើម្បីជំរុញនិងលើកកម្ពស់ប្រព័ន្ធអ៊ីនធឺណិតរបស់កម្ពុជាឱ្យកាន់តែមានគុណភាព និងល្បឿនលឿនជាងមុន។
សម្តេចតេជោ ហ៊ុន សែន សប្បាយរីករាយចំពោះក្រុមហ៊ុនចិនដែលមានជំនឿទុកចិត្តលើកម្ពុជា ហើយបានសម្រេចទៅវិនិយោគនៅទីនោះ។ សម្តេចតេជោ ក៏បានឯកភាពទៅនិងការស្នើសុំខាងលើ ព្រោះថាកម្ពុជាទើបតែមានប្រព័ន្ធខ្សែកាបអុបទិកក្រោមបាតសមុទ្រតែមួយខ្សែតែប៉ុណ្ណោះ។ កម្ពុជាត្រូវការក្រុមហ៊ុនវិនិយោគច្រើនថែមទៀតលើវិស័យបច្ចេកវិទ្យា៕
ដោយ ជឹម ណារី
