ភ្នំពេញ ថ្ងៃទី២០ ខែមករា ឆ្នាំ២០១៩ — សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់ចាកចេញពីកម្ពុជាហើយ នាព្រឹកថ្ងៃទី២០ ខែមករា ឆ្នាំ២០១៩ តាមជើងយន្តហោះពិសេស ដើម្បីបំពេញទស្សនកិច្ចផ្លូវការនៅសាធារណរដ្ឋប្រជាមានិតចិន ពីថ្ងៃទី ២០ ដល់ថ្ងៃទី ២៣ ខែមករា ឆ្នាំ២០១៩ តបតាមការអញ្ជើញរបស់ ឯកឧត្តម លី ខឺឈាង (Li Keqiang) នាយករដ្ឋមន្រ្តីនៃសាធារណរដ្ឋប្រជាមានិតចិន។
ក្នុងការអញ្ជើញជូនដំណើរគណៈប្រតិភូជាន់ខ្ពស់ដល់ព្រលានយន្តហោះអន្តរជាតិភ្នំពេញ មានវត្តមាន សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ព្រមទាំងឥស្សរជនសំខាន់ៗមួយចំនួនទៀត។ ដោយឡែកមន្ត្រីស្ថានទូតចិនប្រចាំនៅកម្ពុជាក៏មានវត្តមានក្នុងឱកាសនោះផងដែរ។
ឯកឧត្ដម ស្រ៊ី ថាមរង្គ រដ្ឋមន្ត្រីប្រតិភូអមនាយករដ្ឋមន្ត្រីបានប្រាប់អ្នកយកព័ត៌មាន នៅព្រលានយន្តហោះអន្ដរជាតិភ្នំពេញថា នេះគឺជាទស្សនកិច្ចសម្រាប់ឆ្នាំថ្មីរបស់ថ្នាក់ដឹកនាំជាន់ខ្ពស់នៃរាជរដ្ឋាភិបាលកម្ពុជា និងនាំមកនូវការចាប់ផ្ដើមដ៏ល្អមួយក្នុងទំនាក់ទំនង ពិសេសជាមួយសាធារណរដ្ឋប្រជាមានិតចិន។ អញ្ជើញអមដំណើរសម្តេចតេជោនាយករដ្ឋមន្រ្តី រួមមាន ឯកឧត្តម ហោ ណាំហុង ឧបនាយករដ្ឋមន្រ្តី ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ឯកឧត្តម ថោង ខុន រដ្ឋមន្រ្តីក្រសួងទេសចរណ៍ ព្រមទាំងឥស្សរជនជាន់ខ្ពស់នៃរាជរដ្ឋាភិបាល និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជាផងដែរ។
ក្នុងអំឡុងពេលទស្សនកិច្ច សម្តេចតេជោនាយករដ្ឋមន្រ្តី នឹងជួបសម្ដែងការគួរសមជាមួយ ឯកឧត្តម ស៊ី ជីនភីង (Xi Jinping) ប្រធានាធិបតីចិន ឯកឧត្តម លីចាន់ស៊ូ(LiZhanshu) ប្រធានគណៈកម្មាធិការអចិន្រ្តៃយ៍នៃសភាប្រជាជនចិន ឯកឧត្តម វ៉ាង យ៉ាង (Wang Yang) ប្រធានសភាប្រឹក្សានយោបាយចិន និងជួបពិភាក្សាទ្វេភាគីជាមួយឯកឧត្តម លី ខឺឈាង (Li Keqiang) នាយករដ្ឋមន្រ្តីចិន។ ការជួបពិភាក្សានឹងផ្តោតទៅលើការពង្រឹង និងពង្រីកបន្ថែមទៀតនូវកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ រវាងកម្ពុជានិងចិន ដើម្បីផលប្រយោជន៍នៃប្រជាជាតិទាំងពីរ។ ក្នុងអំឡុងពេលទស្សនកិច្ចនេះដែរ នឹងមានឯកសារកិច្ចព្រមព្រៀងកិច្ចសហប្រតិបត្តិការ មិនតិចជាង ៨ ដោយផ្ដោតជាសំខាន់ទៅលើការកសាងហេដ្ឋារចនាសម្ព័ន្ធ និងជំនួយអភិវឌ្ឍន៍លើវិស័យផ្សេងៗមួយចំនួនទៀត នឹងត្រូវបានចុះហត្ថលេខាក្នុងដំណើរទស្សនកិច្ចនេះផងដែរ។ សាធារណរដ្ឋប្រជាមានិតចិន គឺជាប្រទេសមួយដែលបានផ្ដល់ជំនួយឥតសំណងច្រើនជាងគេ ដល់ព្រះរាជាណាចក្រកម្ពុជា។ ឯកឧត្ដម ស្រ៊ី ថារង្គ បានឱ្យដឹងទៀថា ជាមួយនេះដែរ សម្តេចតេជោនាយករដ្ឋមន្រ្តី នឹងទទួលការចូលជួបសម្តែងការគួរសមដាច់ដោយឡែកពីគ្នាដោយ ឯកឧត្តមរដ្ឋមន្ត្រី សុង តាវ ប្រធានមន្ទីរទំនាក់ទំនងអន្តរជាតិរបស់គណៈកម្មាធិការមជ្ឈឹមបក្សកុម្មុយនិស្តចិន និងលោកជំទាវ គូ សៀវលៀន ប្រធានសមាគមមិត្តភាពចិន-កម្ពុជា និងថ្នាក់ដឹកនាំធុរៈកិច្ចចំនួន៣រូបទៀតពី ធនាគារចិន សាជីវកម្មស្ពានថ្នល់ចិន ក្រុមហ៊ុនវិស្វកម្ម។ល។ ក្នុងអំឡុងពេលស្នាក់នៅប្រទេសចិន សម្តេចតេជោនាយករដ្ឋមន្រ្តីនឹងអញ្ជើញទៅទស្សនាការតាំងពិព័រណ៌ខួបអនុស្សាវរីយ៍លើកទី៤០ នៃ «កំណែទម្រង់ និងការបើកទូលាយ» ប្រទេសចិន និងអញ្ជើញចូលរួមជាអធិបតី និងថ្លែងសន្ទរកថាក្នុងវេទិកា ធុរកិច្ច សេដ្ឋ កិច្ចនិងពាណិជ្ជកម្ម កម្ពុជា-ចិន ឆ្នាំ២០១៩ ព្រមទាំងជួបសំណេះសំណាលជាមួយនិស្សិត កម្ពុជា ដែលកំពុងសិក្សានៅប្រទេសចិនប្រមាណ៤៧០នាក់ផងដែរ៕
ដោយ ជឹម ណារី
