សម្តេចតេជោនាយករដ្ឋមន្ត្រីបានរម្លឹកថា ឥណ្ឌូណេស៊ីបានដើរតួនាទីយ៉ាងសំខាន់ ក្នុងការចូលរួមស្វែងរកសន្តិភាពរបស់កម្ពុជា

35

សៀមរាប ថ្ងៃទី១៦ ខែមករា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បាន​មា​ន​ប្រ​សា​សន៍រម្លឹកថា កន្លងមកប្រទេសឥណ្ឌូណេស៊ី បានដើរតួនាទីយ៉ាងសំខាន់ ក្នុង​ការចូលរួម​ស្វែង​រកសន្តិភាពរបស់កម្ពុជា ដែលនៅពេលនោះឥណ្ឌូណេស៊ី បានដឹកនាំកិច្ចប្រជុំទាំងលើកទី ១ និងលើកទី២ នៅប្រទេសឥណ្ឌូណេស៊ី ក៏ដូចជាធ្វើជាសហប្រធាន នៃសន្និសីទក្រុង​ប៉ារី​ស​ផង​ដែរ។

ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រី​បានថ្លែងដូច្នេះ​ប្រាប់​អ្ន​ក​​យកព័ត៌មាន បន្ទាប់ពីជំនួបរបស់ សម្តេចអគ្គមហាសេនាបតីតេជោ ហ៊ុន សែន នាយក​រដ្ឋ​មន្ត្រី​នៃព្រះរាជាណាចក្រកម្ពុជា និងឯកឧត្ដម Jusuf Kalla អនុប្រធានាធិបតីឥណ្ឌូណេស៊ី និងសហប្រធានកិត្តិយសនៃក្រុមប្រឹក្សាវប្បធម៌អាស៊ី (Asia Cultural Council) នាព្រឹកថ្ងៃពុធ ១១​កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៦ ខែមករា ឆ្នាំ២០១៩  នៅស​ណ្ឋា​​គារ Lotus Blanc ខេត្តសៀមរាប។ នៅក្នុងជំនួបនោះដែរ ឯកឧត្ដម Jusuf Kalla បាន​ស​ម្ដែង​នូវសេចក្តីរីករាយអបអរសាទរ ចំពោះកម្ពុជា ដែលបានរៀបចំវេទិកា សភាអាស៊ី-ប៉ាស៊ី​ហ្វិ​ក​ លើកទី២៧ (APPF-27) និងការប្រកាសជាផ្លូវការនៃ ក្រុមប្រឹក្សាវប្បធម៌អាស៊ី (ACC) ដែល​បាន​ទទួលជោគជ័យយ៉ាងត្រចះត្រចង់ កាលពីល្ងាចម្សិលមិញនេះ។

ឯកឧត្ដម Jusuf បាន​ថ្លែ​ង​​អំណរគុណចំពោះ សម្តេចតេជោនាយករដ្ឋមន្ត្រី ដែលបាន ទទួលស្វាគមន៍យ៉ាងរាក់​ទាក់​កក់​ក្តៅ​​ចំពោះប្រតិភូជាន់ខ្ពស់របស់ឯកឧត្ដម។ ឯកឧត្ដម បានបន្តថា ការដឹកនាំគណៈប្រតិភូមក​កា​ន់​​ព្រះរាជាណាចក្រម្ពុជានាពេលេនះ គឺដើម្បីចូលរួមក្នុងកម្មវិធីវេទិកា APPF-២៧ និងអប​អរ​សា​​ទរ ការប្រកាសជាផ្លូវការកម្ពុជាជាសមាជិក ក្រុមប្រឹក្សា ACC ពិសេសដើម្បីមក​សិក្សា​ឈ្វេ​ង​យល់ និងពង្រឹងបន្ថែមទៀតនូវកិច្ចសហប្រតិបត្តិការឱ្យកាន់តែល្អរវាងប្រទេសទាំងពីរ។ នេះ​គឺ​ជាសកម្មភាពមួយដែលបានឆ្លុះបញ្ចាំងពីការចូលរួមធ្វើយ៉ាងណា រក្សា និងពង្រឹងទំនាក់ទំនង​ឱ្យ​​កាន់​តែជិតស្និទ្ធរវាងប្រទេសទាំងពីរ ជាពិសេសនៅក្នុងខួបអនុស្សាវរីយ៍នៃ​ទំនាក់ទំនង​ការ​ទូត​៦០ឆ្នាំ រវាងប្រទេសកម្ពុជានិងឥណ្ឌូណេស៊ី។

ជាការឆ្លើយតប សម្តេចតេជោ ហ៊ុន សែន នាយករដ្ឋមន្រ្តី បានថ្លែងអំណរគុណ​យ៉ាង​ជ្រាល​ជ្រៅចំពោះគណៈប្រតិភូជាន់ខ្ពស់របស់ សាធារណរដ្ឋឥណ្ឌូណេស៊ី ដែលបាន​អញ្ជើញ​មក​ចូលរួមក្នុងកិច្ចប្រជុំក្នុងវេទិកា APPF-២៧ និងចូលរួមអបអរសាទរក្នុងការប្រកាសជា​ផ្លូវ​កា​រ​​នៃ ក្រុមប្រឹក្សាវប្បធម៌អាស៊ី (ACC)។ សម្ដេចតេជោនាយករដ្ឋមន្ត្រី បានមានប្រសាសន៍​បញ្ជា​ក់​​ថា រវាងប្រទេសយើងទាំងពីរ គឺមានទំនាក់ទំនងល្អជាយូរឆ្នាំមកហើយ។ កន្លងមកប្រទេស​ឥណ្ឌូ​ណេ​ស៊ី បានដើរតួនាទីយ៉ាងសំខាន់ក្នុងការចូលរួមស្វែងរកសន្តិភាពឱ្យកម្ពុជា ដែលពេល​នោះ​ឥណ្ឌូណេស៊ី បានធ្វើជាម្ចាស់ផ្ទះដឹកនាំកិច្ចប្រជុំលើកទី១ និងទី២ និងបានធ្វើជា​សហ​ប្រ​ធា​ន​ នៃសន្និសីទក្រុងប៉ារីសផងដែរ។ នៅក្នុងឱកាសនោះដែរ មេដឹកនាំ​នៃប្រទេស​ទាំង​ពីរ ​ក៏​បា​នពិ​ភាក្សាអំពីបញ្ហាក្នុងតំបន់មួយចំនួន រួមទាំងសន្តិភាព ដែលកម្ពុជានិងឥណ្ឌូណេស៊ីអាច​ចូល​រួម​ជួយបាន ព្រោះប្រទេសយើងទាំង២ក៏ធ្លាប់បានឆ្លងកាត់សង្រ្គាមនិងបញ្ហាជាច្រើន ដែលអាច​យក​បទពិសោធន៍ទាំងនោះទៅជួយប្រទេសដែលកំពុងមានបញ្ហាទាំងនេះផងដែរ។

សម្តេច​តេ​ជោនាយករដ្ឋមន្ត្រី ក៏បានស្នើឱ្យប្រទេសឥណ្ឌូណេស៊ីពង្រឹងនូវ ទំហំពាណិជ្ជកម្ម ​រវាង​ប្រទេស​ទាំង​ពីរ និងខិតខំជំរុញទេសចរណ៍ ពាណិជ្ជកម្ម សេដ្ឋកិច្ច និងការហោះ​ហើរត្រង់​ពីឥ​ណ្ឌូ​ណេ​ស៊ី​មកកម្ពុជា ស្របពេលនឹងប្រទេសយើង ដែលមានសក្តារនុពលខ្លាំង៕

ដោយ ជឹម ណារី