ប្រធានសភាវៀតណាមប្រកាសបន្តផ្ដល់ជំនួយជួយគំាទ្រ និងពង្រឹងកិច្ចសហ​ប្រតិបត្តិការជាមួយរដ្ឋសភាកម្ពុជា

63

សៀមរាប ថ្ងៃទី១៦ ខែមករា ឆ្នាំ២០១៩ — ប្រធានសភាវៀតណាមបានប្រកាសបន្តជួយគាំទ្រ និងពង្រឹងកិច្ចសហប្រតិបត្តិការជាមួយរដ្ឋ​សភាកម្ពុជា។ ការប្រកាសនេះធ្វើឡើក្នុងជំនួបទ្វេភាគីជាមួយ សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា កាលពីរសៀលថ្ងៃទី១៥ ខែមករា ឆ្នាំ២០១៩ នៅសណ្ឋាគារសុខា ខេត្ដសៀមរាប ខណៈលោកជំទាវបានដឹកនាំគណៈប្រតិភូមកចូលរួមកិច្ចប្រជុំ វេទិកាសភា​អាស៊ី-​ប៉ាស៊ីហ្វិក ដែលហៅកាត់ថា(APPF) លើកទី២៧ នៅខេត្ដសៀមរាប។

លោកជំ​ទាវ ង្វៀន ធី​គីមងិន បានកោតសរសើរចំពោះការរៀបចំកិច្ចប្រជុំAPPF ប្រ​កបដោយអត្ថន័យ និងមិត្តភាពដោយសារគ្រប់គណៈប្រតិភូដែលចូលរួម សុទ្ធតែបានវាយតម្លៃ​ខ្ពស់ពីការទទួលស្វាគមន៍យ៉ាងកក់ក្តៅពីសភាកម្ពុជា។ លោកជំទាវបានបន្ដថា សភាប្រទេស​វៀតណាមនឹងចូលរួមមានវត្តមាននៅគ្រប់កិច្ចប្រជុំAPPF ទំាងអស់ រហូតដល់កម្មវិធីតែម្តង។ លោកជំទាវប្រធានរដ្ឋសភាវៀតណាមបានប្រកាសពីការបន្តផ្តល់ជំនួយគំាទ្រ និងកិច្ចសហ​ប្រតិ​បត្តិការជាមួយរដ្ឋសភាកម្ពុជា ដូចជាការពន្លឿន ជំនួយដល់ការសាងសង់អគាររដ្ឋបាលរដ្ឋ សភាកម្ពុជា និងការបណ្តុះបណ្តាលជំនាញបច្ចេកទេស ដល់មន្រ្តីរដ្ឋសភាជាដើម។

សម្តេចអគ្គមហាពញាចក្រី ហេង សំរិន បានមានប្រសាសន៍ថា គណៈប្រតិភូជាន់ខ្ពស់ រដ្ឋសភា ​​នៃសាធារណរដ្ឋសង្គម​និយមវៀតណាមដែលបានអញ្ជើញចូលរួមក្នុងកិច្ចប្រជុំនេះ មិនត្រឹមតែផ្តល់កិត្តិយសដល់សភាកម្ពុជាប៉ុណ្ណោះទេ ក៏ប៉ុន្តែបានរួមចំណែកដ៏ធំធេង ក្នុងការ បន្ត​ពូនជ្រំលើកកម្ពស់ ទំនាក់ទំនងមិត្តភាព សាមគ្គីភាពជា ប្រពៃណី និងកិច្ចស​ហ​​ប្រតិបត្តិ ការលើគ្រប់វិស័យរវាងប្រទេសយើងទំាងពីរ កម្ពុជា-វៀតណាម ឱ្យកាន់តែរឹងមំាថែមទៀត។

សម្តេចអគ្គមហាពញាចក្រី ហេង សំរិន បានថ្លែងអំណរគុណយ៉ាង​ជ្រាល​ជ្រៅ​​​ចំពោះ បក្ស​​ រដ្ឋ រដ្ឋាភិបាល និង​ប្រជាជន​វៀត​ណាម ដែលតែងបាន​ជួយ​ឧបត្ថម្ភគាំទ្រដល់​កម្ពុជានៅ​គ្រប់​​ដំណាក់​កាល ជាពិសេសការ​រំដោះប្រជាជនចេញពីរបបប្រល័យពូជសាសន៍​ប៉ុលពត ការការពារការវិលត្រឡប់ នៃរបបកម្ពុជាប្រជាធិបតេយ្យ ការ​ស្វែងរក​សន្តិភាព ការ​បង្រួប​បង្រួម​ជាតិ ព្រមទាំង​ការ​ស្តារ កសាង និង​អភិវឌ្ឍន៍​ប្រទេស​ ឱ្យមានការរីកចម្រើនដូច បច្ចុប្បន្ន៕

ដោយ ប៊ុន រិទ្ធ