សៀមរាប ថ្ងៃទី១៥ ខែមករា ឆ្នាំ២០១៩ — ក្នុងនាមប្រធានលើកទី២៧ នៃវេទិកាសភាអាស៊ី-ប៉ាស៊ីហ្វិក សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជាបានចាត់ទុកវេទិការសភាអាស៊ី-ប៉ាស៊ីហ្វិកបានចូលរួមបង្កើតចក្ខុវិ ស័យច្បាស់លាស់មួយ ក្នុងការកសាងសន្តិភាព និងវិបុលភាព សម្រាប់មនុស្សជំនាន់ក្រោយ។
ការលើកឡើងនេះ ធ្វើឡើងក្នុងជំនួបសម្ដែងការគួរសម និងអនុញ្ញាតឱ្យប្រធានគណៈប្រតិភូ ប្រទេសសមាជិកវេទិកាសភាអាស៊ី-ប៉ាស៊ីហ្វិក ហៅកាត់ថា APPF ប្រទេសសង្កេតការណ៍ និងអង្គការដៃគូ ដែលអញ្ជើញមកចូលរួមកិច្ចប្រជុំប្រចំាឆ្នាំAPPF កាលពីព្រឹកថ្ងៃទី១៥ ខែមករា ឆ្នាំ២០១៩ នៅសណ្ឋាគារសុខា ខេត្តសៀមរាប។
សម្តេចអគ្គមហាពញាចក្រី ហេង សំរិន បានគូសបញ្ជាក់ថា រយៈពេល២៧ឆ្នាំមកនេះ APPF បាននាំមកនូវសមិទ្ធផលជាច្រើន ដែលជាមោទនភាពស្តែងចេញពីសកម្មភាព និងឧត្តមគតិ APPFទាំងអស់ ហើយសមិទ្ធផលទំាងនោះបានបង្ហាញឱ្យឃើញនូវសុខដុមនីយកម្ម នៃប្រជា ជាតិនៅអាស៊ី-ប៉ាស៊ីហ្វិកទាំងមូល។ សម្តេចពញាចក្រីបានបន្ដថាបេសកកម្មរបស់វេទិកាសភា អាស៊ី-ប៉ាស៊ីហ្វិក មិនត្រឹមតែបង្ហាញពីសាមគ្គីភាព មិត្តភាព ឯកភាព និងកិច្ចសហប្រតិបត្តិការនៅក្នុងរង្វង់គ្រួសារAPPFប៉ុណ្ណោះទេ តែជាកាតព្វកិច្ចរបស់ថ្នាក់ដឹកនាំស្ថាប័ននីតិប្បញ្ញត្តិ ដើម្បីបង្កើតចក្ខុវិស័យច្បាស់លាស់មួយ ក្នុងការកសាងសន្តិភាព និងវិបុលភាព សម្រាប់ មនុស្សជំនាន់ក្រោយ។
សម្តេចអគ្គមហាពញាចក្រី ហេង សំរិន បានសម្តែងសេចក្តីសោមនស្សរីករាយ និង ស្វាគមន៍យ៉ាងកក់ក្តៅចំពោះវត្តមានដ៏ថ្លៃថ្លារបស់សមាជិកAAPPF ដែលបានអញ្ជើញមកដល់ព្រះរាជាណាចក្រកម្ពុជានាពេលនេះ។ សម្តេចប្រធានរដ្ឋសភាបានលើកឡើងថា វត្តមានរបស់គ្រួសារ APPF នៅលើទឹកដីអង្គរនាឱកាសនេះ បានផ្តល់កិត្តិយស និងលើកទឹកចិត្តដល់សភាកម្ពុជា ក្នុងការរៀបចំកិច្ចប្រជុំប្រចាំឆ្នាំពេលនេះ ឱ្យប្រព្រឹត្តទៅប្រកបដោយភាពអធិកអធម និងការរួមវិភាគទានដ៏មានតម្លៃ ក្នុងការពង្រឹងប្រសិទ្ធភាព នៃការពិភាក្សាស្វែងរកដំណោះស្រាយរួមរបស់តំបន់ ជាពិសេសសន្តិភាព ស្ថិរភាព និងការអភិវឌ្ឍប្រកបដោយចីរភាពរបស់គ្រួសារAPPF៕
ដោយ ប៊ុន រិទ្ធ
