ភ្នំពេញ ថ្ងៃទី១៥ ខែមករា ឆ្នាំ២០១៩ -សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោកជំទាវ ង្វៀន ធិគឹមងិន ប្រធានរដ្ឋសភានៃសាធារណរដ្ឋសង្គមនិយមវៀតណាម ចូលជួបសម្ដែងការគួរសមនាព្រឹក ថ្ងៃអង្គារ ១០កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៥ ខែមករា ឆ្នាំ២០១៩ នៅសណ្ឋាគារសុខា ខេត្តសៀមរាប ក្នុងខណៈ ដែលលោកជំទាវដឹកនាំគណៈប្រតិភូមកចូលរួមក្នុងវេទិកាសភាអាស៊ី-ប៉ាស៊ីហ្វិក (APPF)លើក ទី២៧ ដែលកម្ពុជាធ្វើជាម្ចាស់ផ្ទះនៃវេទិកានេះ។
ឯកឧត្តម អ៊ាង សុផល្លែត ជំនួយការសម្តេចតេជោ បានប្រាប់អ្នកយកព័ត៌មានក្រោយជំនួបនោះថា ក្នុងជំនួបនេះ លោកជំទាវ ប្រធានរដ្ឋសភាវៀតណាម បានសម្ដែងនូវការអបអរសាទរ ជូនចំពោះសម្តេចតេជោ ហ៊ុន សែន អំពីលទ្ធផលនៃសន្និបាតកន្លងមក ក៏ដូចជាខួបលើកទី៤០ ជ័យជម្នះ ៧មករា នៃការផ្តួលរំលំរបបប្រល័យពូជសាសន៍ ដែលបានប្រព្រឹត្តទៅ យ៉ាងត្រចះត្រចង់និងជោគជ័យនាពេលកន្លងមក។ ក្រៅពីនោះទៅទៀត លោកជំទាវ ក៏បានសម្ដែង នូវការអបអរសាទរ ជូនចំពោះសម្តេចតេជោផងដែរ ដែលក្នុងរយៈពេល២ឆ្នាំកន្លងទៅ លោក ជំទាវ បានមកកម្ពុជា រហូតដល់ពេលនេះ លោកជំទាវបានសង្កេតឃើញថា កម្ពុជាមានការអភិវឌ្ឍយ៉ាងឆាប់រហ័ស។ ក្នុងន័យនេះលោកជំទាវ បានមានប្រសាសន៍ថា ក្រោមការដឹកនាំរបស់សម្ដេចតេជោ កម្ពុជានឹងមានការអភិវឌ្ឍកាន់តែខ្លាំងឡើងថែមទៀត។ ជាមួយគ្នានេះដែរលោកជំទាវ ក៏បានជម្រាបជូនសម្តេចតេជោថា លោកជំទាវមកកាន់ព្រះរាជាណាចក្រកម្ពុជានៅពេលនេះ គឺដឹកនាំគណៈប្រតិភូ ដែលមានគណៈប្រតិភូជាន់ខ្ពស់ រដ្ឋសភាវៀតណាម ដែលមានទាំងប្រធាន អនុប្រធាន និងប្រតិភូផ្សេងៗទៀតផងដែរ ដើម្បីចូលរួម និងសម្ដែងនូវការគាំទ្រដល់កិច្ចប្រជុំសមាជិកសភាស្រី្ត នៃវេទិកាសភាអាស៊ី-ប៉ាស៊ីហ្វិក (APPF) នៅកម្ពុជា នេះឱ្យបានទទួលជោគជ័យ និងជូនពរឱ្យកិច្ចប្រជុំនេះ ដំណើរការបានជោគជ័យ។
ជាការឆ្លើយតប សម្តេចតេជោនាយករដ្ឋមន្ត្រី បានថ្លែងអំណរគុណ ជូនចំពោះលោកជំទាវប្រធានរដ្ឋសភាវៀតណាម និងបានជម្រាបជូនលោកជំទាវផងដែរថា ប្រទេសកម្ពុជាមានការអភិវឌ្ឍ រហូតមកដល់ពេលនេះ មិនអាចកាត់ផ្ដាច់បានពីការចូលរួមចំណែករបស់វៀតណាមបានឡើយ។ ក្នុងន័យនេះដែរ សម្តេចក៏បានសម្ដែងនូវអំណរគុណ ហើយក៏បានជូនពរឱ្យគណៈប្រតិភូរបស់លោកជំទាវ ទទួលបានជោគជ័យ ក្នុងបេសកកម្មនៅកម្ពុជា៕
ដោយជឹម ណារី
