ភ្នំពេញ ថ្ងៃទី១៤ ខែមករា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ថា ប្រធានបទស្ដីពីទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ និងការជំរុញនិងទំនាក់ទំនងពាក់ព័ន្ធជាមួយនិងការអភិវឌ្ឍ គឺជាចំណុចស្នូលនៃកិច្ចពិភាក្សា ក្នុងដំណើរទស្សនកិច្ចទៅកាន់ប្រទេសចិននាពេលខាងមុខ។
ក្នុងពិធីបើកការដ្ឋានសាងសង់ គម្រោងសាងសង់ផ្លូវក្រវាត់ខ្សែទី៣ មានប្រវែងសរុប ៥២,៩៨៣គីឡូម៉ែត្រ ដែលចំណាយថវិកាសរុបប្រមាណ ២៧៣លានដុល្លារសហរដ្ឋអាមេរិក ក្រោមហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន នាព្រឹកថ្ងៃចន្ទ ៩កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៤ ខែមករា ឆ្នាំ២០១៩ នៅសង្កាត់រលួស ខណ្ឌដង្កោ រាជធានីភ្នំពេញ សម្ដេចតេជោ ថ្លែងថា ខ្ញុំពិតជាមានការរីករាយជាមួយនឹងការរីកលូតលាស់នៃសេដ្ឋកិច្ចរបស់យើង ហើយសេដ្ឋកិច្ចរបស់កម្ពុជា និងហេដ្ឋារចនាសម្ព័ន្ធដែលយើងធ្វើនៅថ្ងៃនេះ ក៏ដូចជាហេដ្ឋារចនាសម្ព័ន្ធដែលយើងបានធ្វើនាពេលកន្លងទៅ ភាគច្រើនយើងបានទុនមកពីសាធារណរដ្ឋប្រជាមានិតចិន។
សម្ដេចបន្តថា សូមជម្រាបជូនបងប្អូនប្រជាពលរដ្ឋនៅក្នុងក្របខ័ណ្ឌទូទាំងប្រទេសថា ថ្ងៃទី២០ ខែមករា ឆ្នាំ២០១៩នេះ ខ្ញុំនឹងធ្វើដំណើរចាកចេញពីទីក្រុងភ្នំពេញ ទៅកាន់ទីក្រុង ប៉េកាំង ដើម្បីបំពេញទស្សនកិច្ចផ្លូវការពីថ្ងៃទី២១ រហូតដល់ថ្ងៃទី២៣ ខែមករា ទើបត្រឡប់មកវិញ។ ដែលក្នុងអំឡុងនៃទស្សនកិច្ចនេះបញ្ហាជាច្រើន ពិសេសគឺ ទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ និងការជំរុញទំនាក់ទំនងពាក់ព័ន្ធជាមួយនិងការអភិវឌ្ឍ គឺជាចំណុចស្នូលនៃកិច្ចពិភាក្សា រវាងខ្ញុំជាមួយនិងប្រធានាធិបតី ស៊ី ជិនពីង និងរវាងខ្ញុំជាមួយនិងនាយករដ្ឋមន្ត្រី លី ខឺឈាំង ក៏ដូចជាថ្នាក់ដឹកនៃដទៃទៀត ដែលកិច្ចព្រមព្រៀងមួយចំនួនកំពុងតែត្រូវបានរៀបចំ ដើម្បីការចុះហត្ថលេខានៅក្នុងដំណើរទស្សនកិច្ចនេះ។ ឆ្នាំ២០១៨ កន្លងមកនេះ ភ្ញៀវទេសចរមានកើនឡើងរហូតដល់ ៦លាន២សែននាក់ ដែលឆ្នាំ២០១៧ មានត្រឹមតែចំនួន៥លាន៧សែននាក់។ ឆ្នាំនេះកើនគឺដោយសារទេសចរណ៍ចិន គឺបានកើនពី ១លាន២សែន ដល់១លាន៦សែននាក់។ ដូច្នេះយើងខិតខំទាញទេសចរណ៍ឱ្យបានពី ៣ ទៅ៤លាននាក់មកកាន់កម្ពុជានាពេលខាងមុខ។
នៅក្នុងពិធីបើកការដ្ឋាននេះដែរ សម្តេចតេជោ ហ៊ុន សែន នាយករដ្ឋមន្ត្រី បានមានប្រសាសន៍អំពីសារៈសំខាន់នៃការសាងសង់ផ្លូវក្រវាត់ក្រុងទី៣ នៅពេលនេះដែលបានចូលរួមចំណែកយ៉ាងសំខាន់ក្នុងការបញ្ចៀស ការកកស្ទះចរាចរណ៍នៅក្នុងទីក្រុងភ្នំពេញ ដែលកំពុងតែមានកំណើនមនុស្ស និងយានយន្តយ៉ាងច្រើន និងជួយសម្រួលដល់ការដឹកទំនិញ និងផលិតផលផ្សេងៗ ដើម្បីជួយដល់ជីវភាពរស់នៅរបស់ប្រជាពលរដ្ឋឱ្យកាន់តែល្អប្រសើរឡើង ដែលផ្ទុយពីសម័យរបបប្រល័យពូជសាសន៍ប៉ុលពត ដែលផ្លូវមួយចំនួនធំត្រូវបានបំផ្លាញចោល។ សម្តេចតេជោ បានមានប្រសាសន៍បញ្ជាក់ផងដែរថា ការកសាង និងអភិវឌ្ឍន៍ប្រទេសកម្ពុជា គឺបានចាប់ផ្តើមពីការអនុវត្តនូវយុទ្ធសាស្ត្រចតុកោណតាំងពី ៣២ឆ្នាំមុន ដែលបានផ្តោតទៅលើ ផ្លូវ, ទឹក, ភ្លើង និង មនុស្ស ប៉ុន្តែចាប់ពីឆ្នាំ២០១៣ មក យើងបានប្តូរមកយក មនុស្ស, ផ្លូវ, ទឹក, និងភ្លើងវិញ ដោយយើងបានប្តូរយកធនធានមនុស្សជាវិស័យអាទិភាពមុខគេ។
សម្តេចតេជោក៏បានបញ្ជាក់ថា កម្ពុជាធ្វើសេដ្ឋកិច្ចមិនពឹងផ្អែកតែលើវិស័យតែមួយមុខនោះទេ គឺកម្ពុជាធ្វើសេដ្ឋកិច្ច ពឹកផ្អែកលើវិស័យជាច្រើនដូចជា វិស័យកសិកម្ម កសិឧស្សាហកម្ម ឧស្សាហកម្ម សេវាកម្ម និងសំណង់ជាដើម។ កម្ពុជាមិនអាចស្លាប់នោះទេប្រសិនបើបរទេសណាបិទវិស័យណាមួយនោះ ព្រោះកម្ពុជានៅតែមានវិស័យផ្សេងៗទៀតដើម្បីទ្រទ្រង់សេដ្ឋកិច្ចជាតិ។ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងអំណរគុណចំពោះលោកប្រធានាធិបតី Xi Jinping លោកនាយករដ្ឋមន្ត្រី Li Keqiang បងប្អូនប្រជាជន និងរដ្ឋាភិបាលចិន ដែលបានចូលរួមចំណែកក្នុងការងារអភិវឌ្ឍន៍ហេដ្ឋារចនាសម្ព័ន្ធប្រទេសកម្ពុជា។ ជាមួយគ្នានេះ សម្តេចតេជោ ក៏បានកោតសរសើរដល់ក្រសួងសារធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុដែលបានខិតខំដើម្បីឱ្យមានការសាងសង់ផ្លូវក្រវាត់ក្រុងទី៣នេះ៕
ដោយ ជឹម ណារី
