ភ្នំពេញ ថ្ងៃទី២៨ ខែធ្នូ ឆ្នាំ២០១៨ — សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ រួមជា មួយនាយទាហានជាន់ខ្ពស់ បានទទួលស្វាគមន៍ដំណើរទស្សកិច្ចរបស់គណៈប្រតិភូ ក្រសួងការពារប្រទេសឡាវ ដែលដឹកនាំដោយឯកឧត្តម នាយឧត្តមសេនីយ៍ ចាន់សាម៉ន ចាន់យ៉ានឡាត រដ្ឋមន្ត្រីក្រសួងការពារប្រទេសនៃសាធារណររដ្ឋប្រជាធិបតេយ្យ ប្រជាមានិតឡាវ កាលពីរសៀលថ្ងៃព្រហស្បតិ៍ ៥រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែធ្នូ ឆ្នាំ២០១៨ នៅវិមានមិត្តភាព ទីស្តីការគណៈរដ្ឋមន្ត្រី។
តាមប្រភពពីក្រសួងការពារជាតិបានឱ្យដឹងថា សម្តេចពិជ័យសេនា ទៀ បាញ់ បានថ្លែងនូវក្តីរីករាយចំពោះ ឯកឧត្តមរដ្ឋមន្ត្រី ដែលបានឆ្លៀតឱកាស ដ៏មមាញឹក ដឹកនាំគណៈប្រតិភូយោធាជាន់ខ្ពស់ក្រសួងការពារប្រទេស នៃសាធារណរដ្ឋប្រជាធិបតេយ្យ ប្រជាមានិតឡាវ មកបំពេញទស្សនកិច្ចនៅកម្ពុជានាពេលនេះ ដោយតបតាមការអញ្ជើញ ដើម្បីមកចូលរួមជាកិតិ្តយសក្នុងពិធីសម្ពោធវិមានអនុស្សាវរីយ៍នយោបាយ ឈ្នះឈ្នះនិងអបអរសាទរខួបលើកទី២០ នៃការបញ្ចប់សង្រ្គាមស៊ីវិលនៅកម្ពុជា (១៩៩៨-២០១៨) ដែលប្រព្រឹត្តទៅនៅព្រឹកថ្ងៃទី២៩ ខែធ្នូ ឆ្នាំ២០១៨ នាពេលខាងមុខផងដែរ។
សម្តេចពិជ័យសេនាបានថ្លែងឱ្យដឹងទៀថា រាល់កិច្ចសហប្រតិបត្តិការរវាង កងទ័ពយើងទាំងពីរ កម្ពុជា-ឡាវ កន្លងមក គឺយើងបានរួមគ្នាបង្កើនទំនាក់ទំនង ឱ្យបានកាន់តែស្អិតរមួតថែមទៀតកាន់តែប្រសើរ។
ឯកឧត្តម នាយឧត្តមសេនីយ៍ ចាន់សាម៉ន ចាន់យ៉ានឡាត ក៏បានថ្លែងអំណរគុណដល់ សម្តេចពិជ័យ និងថ្នាក់ដឹកនាំកងយោធពលខេមរភូមិន្ទ ទាំងអស់ដែលបានយក ចិត្តទុកដាក់ស្វាគមន៍ចំពោះគណៈប្រតិភូរបស់ឯកឧត្តមនាពេលនេះ។ ឯកឧត្តម ក៏បានវាយតម្លៃខ្ពស់ចំពោះការរីកចម្រើនរបស់កងយោធពលខេមរភូមិន្ទ ស្របពេលដែលប្រទេសកម្ពុជាក៏មានការអភិវឌ្ឍខ្លួនយ៉ាងឆាប់រហ័សផងដែរ។
ឯកឧត្តម ចាន់សាម៉ន ចាន់យ៉ានឡាត ថ្លែងថា ជំនួសមុខឱ្យបក្ស រដ្ឋ និងកងទ័ពប្រជាជនឡាវ សូមថ្លែងអំណរគុណចំពោះរាជរដ្ឋាភិបាល និងកងទ័ពកម្ពុជា ដែលបានផ្តល់ជំនួយសង្គ្រោះជាបន្ទាន់ដល់ប្រជាជនឡាវជាបងប្អូនដែលទទួលរងគ្រោះដោយគ្រោះធម្មជាតិ ពិសេសការបាក់ទំនប់វ៉ារីអគ្គិសនី នៅខេត្តអាតាពើ កាលពីកន្លងទៅ បណ្តាលឱ្យប្រជាជន ៦ ភូមិមានការលិចលង់។
ចំពោះកិច្ចសហប្រតិបត្តិការរវាងកងទ័ពនៃប្រទេសទាំងពីរ ឯកឧត្តម បានសំណូមពរ ជំរុញឱ្យមានការផ្លាស់ប្តូរដំណើរទស្សនកិច្ចគណៈប្រតិភូកងទ័ពឱ្យបានច្រើន ដើម្បីធ្វើការផ្លាស់ប្តូរបទពិសោធន៍ពីគ្នា ទៅវិញទៅមក ដើម្បីបង្កើនការផ្លាស់ប្តូរគណៈប្រតិភូសម្រាកបំប៉នសុខភាពឱ្យបានច្រើនថែមទៀត។
ចំពោះកិច្ចការទំនាក់ទំនងព្រំដែននៃប្រទេសទាំងពីរ២ ឯកឧត្តម ក៏បានសំណូមពរឱ្យមានការបង្កើតគណៈកម្មាការព្រំដែនថ្នាក់ក្រសួងការពារជាតិ ដើម្បីឱ្យកិច្ចការនេះទទួលបានកិច្ចហសការគ្នាកាន់តែស្អឹតរមួតថែមទៀត ពិសេសទំនាក់ទំនងរវាងកងទ័ព ដែលឈរជើងនៅតាមបណ្តោយព្រំដែននៃប្រទេសទាំងពីរផងដែរ៕
ដោយ សាយ សុន (រូបថត៖ក្រសួងការពារជាតិ)
