ភ្នំពេញ ថ្ងៃទី២៨ ខែធ្នូ ឆ្នាំ២០១៨ — ក្នុងខណៈដឹកនាំគណៈប្រតិភូមកបំពេញទស្សនកិច្ចនៅកម្ពុជា ឯកឧត្ដម ង៉ូ ស៊ុនលិច្ស (Ngo Xuanlich) រដ្ឋមន្រ្តីការពារជាតិ នៃសាធារណរដ្ឋសង្គមនិយមវៀតណាម បានផ្ដល់នូវថវិកាចំនួន ១០លានដុល្លារសហរដ្ឋអាមេរិក ដើម្បីជួយកសាងអគារទីស្ដីការក្រសួងការពារជាតិរបស់ព្រះរាជាណាចក្រកម្ពុជា។
នេះបើតាមការឱ្យដឹងរបស់ ឯកឧត្ដម អ៊ាង សុផល្លែត ជំនួយការសម្ដេចតេជោ បន្ទាប់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្ដម Ngo Xuanlich រដ្ឋមន្រ្តីការពារជាតិ នៃសាធារណរដ្ឋសង្គមនិយមវៀតណាម និងគណៈប្រតិភូចូលជួបសម្ដែងការគួសម នាព្រឹកថ្ងៃសុក្រ ៦រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែធ្នូ ឆ្នាំ២០១៨នេះ នៅវិមានសន្តិភាព។ ក្នុងជំនួបនោះ ឯកឧត្ដម Ngo Xuanlich សម្ដែងនូវការអបអរសាទរ ជូនចំពោះសម្ដេចតេជោដែលបានទទួលជោគជ័យពីការបោះឆ្នោតនាពេលកន្លងមក និងជោគ ជ័យនៃសន្និបាតគណៈកម្មាធិការកណ្តាលរបស់គណបក្សប្រជាជនកម្ពុជា និងសមិទ្ធផល ដទៃទៀតដែលកម្ពុជាទទួលបានក្រោមការដឹកនាំរបស់សម្ដេចតេជោនាយករដ្ឋមន្ត្រី។
ឯកឧត្ដមក៏បាន គោរពជម្រាបជូនសម្ដេចតេជោពីជំនួប និងកិច្ចព្រមព្រៀងជាមួយ សម្ដេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ដែលជំនួបនោះ ភាគីទាំងពីរបានពិភាក្សា និងវាយតម្លៃខ្ពស់ចំពោះជោគជ័យដែលទទួលបានពីកិច្ចសហប្រតិបត្តិការឆ្នាំ២០១៨ កន្លងមក និងដាក់ទិសដៅសហប្រតិបត្តិការឆ្នាំ២០១៩ ដែលរួមមាន កិច្ចការពង្រឹងសមត្ថភាពកងទ័ព និងកងទ័ព កិច្ចសហប្រតិបត្តិការក្នុងការសង្គ្រោះនៅពេលមានគ្រោះមហន្តរាយ ដោយបញ្ហាទឹកជំនន់ ភ្លើងឆេះព្រៃជាដើម រួមជាមួយនឹងកិច្ចសហប្រតិបត្តិការផ្សេងទៀត។
ឯកឧត្ដម Ngo Xuanlich ក៏បានបញ្ជាក់ឱ្យដឹងថា ប្រទេសវៀតណាមបានផ្តល់ថវិកា ចំនួន១០លានដុល្លារសហរដ្ឋអាមេរិក ដើម្បីជួយធ្វើការសាងសង់នូវអគារទីស្តីការក្រសួង ការពារជាតិកម្ពុជាផងដែរ។
ការឆ្លើយតប សម្តេចតេជោនាយករដ្ឋមន្រ្តីសម្ដែងនូវការអបអរសាទរចំពោះកិច្ចពិភាក្សា និងការចុះកិច្ចព្រមព្រៀងរវាងភាគីទាំងពីរ កម្ពុជា-វៀតណាម ហើយក៏បានលើកទឹកចិត្តឱ្យស្ថាប័នទាំងពីរបន្តពង្រឹងកិច្ចសហប្រតិបត្តិការថែមទៀត។ សម្ដេចក៏បានផ្តល់អនុសាសន៍ ដល់ឯកឧត្ដម Ngo Xuanlich ផងដែរថា ពាក់ព័ន្ធទៅនឹងកិច្ចសហប្រតិបត្តិការសង្គ្រោះគ្រោះមហន្តរាយនោះ គួរគប្បីណាកំណត់ទីតាំងភូមិសាស្រ្តជាក់ស្តែងថាទីតាំងណាដែលអាចរងគ្រោះដោយសារទឹកជំនន់ និងទីតាំងណារងគ្រោះដោយសារភ្លើងឆេះព្រៃ និងទីតាំងណាដែលរងគ្រោះដោយសារជំងឺរាតត្បាត ដើម្បីងាយស្រួលក្នុងការឆ្លើយតបទៅនឹងគ្រោះមហន្តរាយដែលកើតឡើងទាំងនោះ ជាពិសេសអាចដោះស្រាយបានភ្លាមៗ។ សម្តេចតេជោនាយករដ្ឋមន្ត្រី ក៏បានអរគុណដល់ភាគីវៀតណាមដែលបានផ្តល់ ថវិកាជួយកសាងអគារក្រសួងការពារជាតិផងដែរ៕
ដោយ ជឹម ណារី
