សម្ដេចតេជោតេជោនាយករដ្ឋមន្ត្រីស្នើធានាឱ្យមានវត្តមានជាអចិន្ត្រៃយ៍នៃសន្តិភាព ស្ថិរភាព នយោបាយសម្រាប់បម្រើឱ្យការអភវឌ្ឍ

28

ភ្នំពេញ ថ្ងៃទី១៦ ខែធ្នូ ឆ្នាំ២០១៨ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមាន​ប្រ​សា​សន៍ ស្នើឱ្យជនរួមជាតិចូលរួមធានាឱ្យមានជាអចិន្ត្រៃយ៍នៃសន្តិភាព ស្ថិរភាពនយោបាយ សម្រាប់​បម្រើឱ្យការអភិវឌ្ឍ នៅទូទាំងព្រះរាជាណាចក្រកម្ពុជា។

ក្នុងខណៈអញ្ជើញចូលរួមក្នុងពីធីបើកបុណ្យសមុទ្រលើកទី៧ ជុំទី២ ជាមួយសម្តេច​កិ​ត្តិ​ព្រឹ​ទ្ធ​បណ្ឌិត ប៊ុន រ៉ានី ហ៊ុនសែន នាល្ងាចថ្ងៃថ្ងៃសៅរ៍ ៨កើត ខែមិគសិរ ឆ្នាំច សំរឹទ្ធិស័ក​ព​.ស​២៥​៦២​ ត្រូវនឹងថ្ងៃទី១៥ ខែធ្នូ ឆ្នាំ២០១៨ នៅក្រុងខេមរភូមិន្ទ ខេត្តកោះកុង ដែលមានអ្នកចូល​រួម​រាប់​ម៉ឺន​នាក់នោះ សម្ដេចតេជោបានគូសបញ្ជាក់ថា ពិធីបុណ្យសមុទ្រលើកទី​៧ជុំទីពីរ​នៅ​ក្នុង​ខេត្ត​កោះកុងឆ្នាំនេះ ប្រារព្ធធ្វើឡើងក្រោមប្រធានបទ «ឆ្នេរស្អាត ពលរដ្ឋរមណីយ» អមដោយ​ពាក្យ​ស្លោក «អេកូទេសចរណ៍សម្រាប់កំណើនបៃតង និងការអភិវឌ្ឍប្រកបដោយនិរន្តរភាព»។​

ព្រឹត្តិការណ៍បុណ្យសមុទ្រនេះ បានក្លាយជាយន្តការ​ជាក់លាក់មួយរបស់ប្រទេសកម្ពុជា​មួយ​ក្នុ​ង​ការពង្រឹងគុណភាពឧស្សាហកម្មទេសចរណ៍ ជំរុញការបង្កើត និងអភិវឌ្ឍន៍ផលិតផល​ទេ​ស​ចរណ៍​ថ្មីៗ​ប្រកបដោយភាពច្នៃប្រឌិត និងការទទួលខុសត្រូវខ្ពស់ឱ្យស្របទៅនឹង​សក្តានុ ​ពល​ធន​ធានធម្មជាតិនៅតំបន់ឆ្នេរសមុទ្រកម្ពុជាដែលត្រូវបានប្រសិទ្ធនាមថាជា «តារារះនា​ទិស​​និរ​តី​​»។ សម្ដេចតេជោថ្លែងបន្តថា ដើម្បីអភិវឌ្ឍន៍តំបន់ឆ្នេរនេះឱ្យកាន់តែមាននិរន្តភាព ពិសេស​បណ្ដា​ខេត្តដែលជាប់មាត់សមុទ្រនោះ ត្រូវយកចិត្តទុកដាក់​ ទី១- ត្រូវធានាឱ្យមានវត្ត​មាន​​ជា​អ​ចិ​ន្ត្រៃ​យ៍នៃសន្តិភាព ស្ថិរភាពនយោបាយ គឺត្រូវខិតខំរក្សាសន្តិសុខ ស្ថានភាព​នយោបាយ កុំឱ្យមាន​ការវាយប្រហារដោយភេរវកម្ម ដែលនេះគឺជាចំណុចដែលប្រជាពល​រដ្ឋ​ត្រូវការ ដើម្បីភាព​រីក​ចម្រើន​របស់កម្ពុជានាពេលខាងមុខ។ ទី២- រក្សាឲ្យបាននូវសមុទ្របៃតង ឱ្យ​នៅតែជាជាតា​រារះ​នា​​ទិសនិរតី​នៃខេត្តទាំង៤ ដែលជាប់មាត់សមុទ្រដែលស្ថិតនៅក្នុង​ចំណោម​ឆ្នេរដ៏ស្អាត​បំផុត​លើ​​សាកលលោក និងលើកទឹកចិត្តឱ្យមានការអភិវឌ្ឍអេកូទេស​ចរណ៍​​ដូចជានៅតំបន់វិស្សម​កា​ល​ទេសចរណ៍តារាសាគរជាដើម។

ថែរក្សាព្រៃឈើ ថែរក្សា​ឆ្នេរសមុទ្រ ជាពិសេស​នៅ​ខេត្ត​ព្រះ​សីហនុ សូមឱ្យរដ្ឋមន្ត្រីទេសចរណ៍ និងរដ្ឋមន្ត្រីក្រសួង​ដែនដី​ចាត់វិធានការជាក់លាក់​មិន​ឱ្យ​មាន​កាចាក់ដីលុបឆ្នេរដោយគ្មានការអនុញាត និងបង្ហូរ​ទឹកកង្វក់ចូលទឹកសមុទ្រជាដាច់ខាត។ ដើ​ម្បីធានាធ្វើយ៉ាងណាឲ្យសមុទ្ររបស់យើង​នៅតែ​ជាសមុទ្របៃតងជារៀងរហូត។ ទី៣- ត្រូវ​ខិត​ខំបន្តកសាង ហេដ្ឋារចនាសម្ព័ន្ធផ្សេងៗ​ដូចជា​ផ្លូវធ្វើដំណើរ បណ្តាញអគ្គិសនី និងព្រលានយន្ត​ហោះ ​ដើម្បីបម្រើវិស័យ​ទេសចរណ៍​ឱ្យបាន​ល្អប្រសើរ។ ទី៤- បន្តទប់ស្កាត់បទល្មើសផ្សេងៗ ដូចជា​ចោរកម្ម ការប្រើប្រាស់ និងជួញដូរ​គ្រឿងញៀនជាដើម។ ទី៥- បន្តជំរុញការបង្កើតផលិត​ផល​ទេ​សចរណ៍ថ្មីៗបន្ថែមទៀត ជាពិ​សេសបង្កើនការដាំដុះបន្លែ និងចិញ្ចឹមសត្វតាមបែបធម្មជាតិ ដើ​ម្បីផ្គត់ផ្គង់សេវាទេសចរណ៍ ធ្វើយ៉ាងណាជំរុញខ្សែសង្វាក់ផលិតផលបៃតង នៅតាម​សណ្ឋា​គារ​នានា។ ទី៦- ពង្រឹងការ​តភ្ជាប់ផ្លូវធ្វើដំណើរ ពង្រីកផ្លូវ៤៨ និងការតភ្ជាប់ពីផ្លូវពីខេត្ត​កោះកុង​ទៅ​ ពោធិ៍សាត់ បាត់ដំបង​ដែលនឹងត្រូវធ្វើក្នុងពេលឆាប់ខាងមុខ ជាពិសេសខិតខំកសាង​ផ្លូ​វ​ពី​តំ​បន់ផ្សេងៗមកកាន់តំបន់​មាត់សមុទ្រ។ ទី៧-ត្រូវបង្កើនការការពារនូវសុវត្ថិភាព​ភ្ញៀវទេស​ចរ​ណ៍​​​​​ដែលធ្វើដំណើរតាម​ផ្លូវ​ទឹក ជាពិសេសត្រូវរៀចំពោងសម្រាប់ការពារសុវត្ថិភាពដល់ភ្ញៀវ។

ស​ម្ដេ​ចតេជោនាយករដ្ឋមន្ត្រី បានថ្លែងសង្កត់ធ្ងន់ថា អាជ្ញាធរគ្រប់ថ្នាក់​ត្រូវតែ​បន្តចូល​រួម​ថែ​រក្សា​ព្រៃ​ធម្មជាតិ និងព្រៃកោងកាងនៅតាមតំបន់ឆ្នេរឱ្យបានល្អ និងចូលរួមថែរក្សា​ការពារ​បរិ​ស្ថា​ន​ឱ្យបានស្អាតជាប់ជានិច្ច។ ទន្ទឹមនឹងនេះដែរ គឺត្រូវកសាងហេដ្ឋារចនាសម្ព័ន្ឋឆ្លង​កាត់តំ​បន់​ឆ្នេរ​ឱ្យបានច្រើនថែមទៀត ដើម្បីសម្រួលដល់ការធ្វើដំណើរ និងទាក់ទាញទេសចរណ៍ទាំង​ក្នុង​និង​ក្រៅប្រទេស៕ ដោយ ជឹម ណារី