ភ្នំពេញ ថ្ងៃទី២៤ ខែមករា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានថ្លែងនៅចំពោះមុខកងទ័ពរាប់ពាន់នាក់ថា ជាមួយនិងការប្រឆាំងភេរវកម្ម យើងត្រូវតែកម្ចាត់ចោលជាបន្ទាន់ដោយមិនចាំបាច់រង់ចាំបទបញ្ជា នូវទង្វើណាក៏ដោយដែលប៉ុនប៉ងដណ្ដើមអំណាចក្រៅប្រព័ន្ធប្រជាធិបតេយ្យ ក្រៅការបោះឆ្នោត ដែលផ្ទុយនឹងរដ្ឋធម្មនុញ្ញ ព្រោះថាការបង្កើតឡើងនូវកងកម្លាំងប្រដាប់អាវុធ ក៏ដូចជារដ្ឋបាលគ្រប់ថ្នាក់ គឺដើម្បីសំដៅការពាររដ្ឋ ដូច្នេះមិនត្រូវទុកឱ្យអ្នកណាមួយមកបំផ្លាញចោលរដ្ឋនោះទេ។
ក្នុងពិធីខួបអនុស្សាវរីយ៍២០ឆ្នាំ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ( ២៤ មករា ១៩៩៩-២៤ មករា ២០១៩ ) នាព្រឹកថ្ងៃព្រហស្បតិ៍ ៤រោច ខែបុស្ស ឆ្នាំច សំរឹទ្ធិស័ក ព ស ២៥៦២ ត្រូវនឹងថ្ងៃទី២៤ ខែមករា ឆ្នាំ២០១៩ នៅបញ្ជាការដ្ឋានកងទ័ពជើងគោក ស្ថិតក្នុង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ សម្ដេចតេជោនាយករដ្ឋមន្ត្រីបានរម្លឹកភារកិច្ច១០យ៉ាង ដល់កងយោធពលខេមរភូមិន្ទដែលត្រូវយកចិត្តទុកដាក់ ដែលក្នុងនោះមាន៖ ទី១. ត្រៀមខ្លួនជាស្រេចការពារឯករាជ្យអធិបតេយ្យជាតិ បន្តអនុវត្តន៍ឱ្យបានខ្ជាប់ខ្ជួននូវខឿនការពារជាតិរបស់ប្រជាជន។ ទី២. កងទ័ពត្រូវរួមជាមួយកម្លាំងផ្សេងទៀតរក្សា សន្តិភាព ស្ថិរភាពនយោបាយ សន្តិសុខ សណ្ដាប់ធ្នាប់សង្គម ចូលរួមអនុវត្តន៍នយោបាយ ភូមិឃុំមានសុវត្ថិភាព ប្រយុទ្ធប្រឆាំងជាមួយចោរកម្ម គ្រឿងញៀន ការជួញដូរមនុស្ស និងអំពើអសកម្មផ្សេងៗ។ ទី៣. ខិតខំប្រយុទ្ធប្រឆាំងនិងភេរវកម្ម និងវាយកម្ទេចចោលឱ្យបានទាន់ ពេលវេលានូវឧបាយកលបដិវត្តពណ៌ ដែលប៉ុនប៉ងផ្ដួលរំលំរដ្ឋាភិបាលស្របច្បាប់ តាមរយៈ មធ្យោបាយមិនប្រជាធិបតេយ្យ និងផ្ទុយជាមួយនឹងរដ្ឋធម្មនុញ្ញ។ កម្លាំងប្រដាប់ អាវុធមានភារកិច្ចការពាររដ្ឋ ដូចនេះមិនមានពាក្យអព្យាក្រឹត្យជាមួយពួកឧទ្ទាម ទាំងពួកឧន្ទាមក្នុងព្រៃ និងឧន្ទាមទីក្រុងនោះទេ។ ទី៤. ស្នើឱ្យកងទ័ពទាំងអស់ ចូលរួមជាមួយកម្លាំងផ្សេងទៀត ដើម្បីជួយដល់ប្រជាជន ពិសេសពេលដែលមានគ្រោះ មហន្តរាយកើតឡើង។ ទី៥. កងទ័ពត្រូវគាំទ្រដល់កម្លាំងអនុវត្តន៍ច្បាប់ ដើម្បីធានាទៅដល់ការ ការពារព្រៃឈើ ជលផល និងធនធានធម្មជាតិដទៃទៀត។ ទី៦. កងកម្លាំងប្រដាប់អាវុធគ្រប់ ប្រភេទទាំងអស់ត្រូវគាំទ្រដល់ការប្រមូលថវិកាជាតិ ទាំងថ្នាក់ជាតិ ទាំងថ្នាក់ក្រោមជាតិ។ ទី៧. ខិតខំពង្រឹងវិន័យកងទ័ព បង្កើនសមត្ថភាពលើគ្រប់ផ្នែក។ ទី៨. ត្រូវយកចិត្តទុកដាក់ថែទាំ សម្ភារយុទ្ធោបករណ៍គ្រប់ប្រភេទទាំងអស់ ដែលជាគ្រឿងបំពាក់សម្រាប់កងទ័ព ដោយត្រូវធ្វើការត្រួតពិនិត្យជាប់ជាប្រចាំ។ ទី៩. យកចិត្តទុកដាក់ដល់ជីវភាពកងទ័ព ដូចជាជម្រកស្នាក់នៅ ចំណីអាហារ សម្ភារ ត្រូវផ្គត់ផ្គង់សព្វបែបយ៉ាងសម្រាប់កងទ័ព ជាពិសេសត្រូវបង្កើនការសាងសង់ផ្ទះដល់កងទ័ពដែលកំពុងឈរជើងតាមព្រំដែន និងផ្តល់សេវាថែទាំសុខភាព និងបង្កើនការយកចិត្តទុកដាក់ចំពោះអតីតយុទ្ធជន និងទី១០. កងទ័ពត្រូវដើរតួនាទីជា អ្នកការទូតយ៉ាងសំខាន់ជាមួយប្រទេសជិតខាង គឺរក្សាទំនាក់ទំនងជាមួយមិត្តចាស់ និងបង្កើនទំនាក់ទំទងនិងសហប្រតិបត្តិការល្អជាមួយដៃគូថ្មីៗជាមួយអង្គភាពប្រទេសជិតខាង តាមរយៈការផ្លាស់ប្តូរទស្សនកិច្ចគ្នាទៅវិញទៅមក និងតាមរយៈការផ្លាស់ប្តូរចំណេះដឹង និងយុទ្ធវិធីផ្សេងៗជាមួយយកងទ័ពនៃបណ្តាប្រទេសនានា។
ឯកឧត្ដម ឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ថ្លែងថា បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ត្រូវបានបង្កើតឡើងនៅថ្ងៃទី២៤ ខែមករាឆ្នាំ១៩៩៩ តាមព្រះរាជក្រឹត្យលេខ នស/រកត/០១៩៩/២១ រួមជាមួយថ្ងៃបង្កើតអគ្គបញ្ជាការដ្ឋានកងយោធពលខេមរភូមិន្ទ ដោយនាពេលនោះ ឯកឧត្តម នាយឧត្តមសេនីយ៍ មាស សុភា ត្រូវបានព្រះមហាក្សត្រនៃព្រះរាជាណាចក្រកម្ពុជាត្រាស់បង្គាប់តែងតាំងជាអគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងឯកឧត្តម ឧត្តមសេនីយ៍ឯក ជា សារ៉ន ជាមេបញ្ជាការរងនិងជានាយសេនាធិការ រួមជាមួយមេបញ្ជាការរងកងទ័ពជើងគោកមួយចំនួនទៀត។ជាក់ស្តែង កងទ័ពជើងគោកមានកំណើត រួមជាមួយនឹងថ្ងៃបង្កើតកងយោធពលខេមរភូមិន្ទមកម្ល៉េះ គឺថ្ងៃទី០៩ ខែវិច្ឆិកា ឆ្នាំ១៩៥៣ តែមិនធ្លាប់មានបញ្ជាការដ្ឋានសម្រាប់ដឹកនាំគ្រប់គ្រងបញ្ហានោះទេ រហូតមកដល់ថ្ងៃទី២៤ ខែមករា ឆ្នាំ១៩៩៩ ទើបមានការបង្កើតឡើងនូវបញ្ជាការដ្ឋានកងទ័ពជើងគោកនេះ ដែលស្របទៅតាមគោលនយោបាយក្នុង និងក្រៅប្រទេសរបស់កម្ពុជា គឺការសមាហរណកម្មកម្ពុជាទៅក្នុងសហគមន៍ក្នុងតំបន់ និងពិភពលោក ជាពិសេសក្នុងឋានៈជាសមាជិកនៃសហគមន៍អាស៊ាន ក្រោយពេលដែលកម្ពុជាបានបញ្ចប់សង្គ្រាមដ៏រ៉ាំរៃរបស់ខ្លួន និងបានក្លាយទៅជាកោះសន្តិភាពនៅអាស៊ី។ ការបង្កើតឡើងបញ្ជាការដ្ឋានកងទ័ពជើងគោកនាគ្រានោះ គឺជាពេលវេលាមួយដ៏លំបាកស្មុគស្មាញជាទីបំផុត ដោយសារតែពេលនោះ កម្ពុជាទើបបានបញ្ចប់សង្គ្រាមស៊ីវិល ២៦ថ្ងៃ ក្រោយការអនុវត្តដោយជោគជ័យនូវនយោបាយឈ្នះឈ្នះ នាថ្ងៃទី២៩ ខែធ្នូ ឆ្នាំ១៩៩៨ ជាថ្ងៃដែលកម្លាំងជម្លោះគ្រប់ភាគីទាំងអស់ បានវិលមករួមរស់ជាមួយសង្គមជាតិវិញ៕ ដោយ ជឹម ណារី
