សម្តេចពិជ័យសេនា ទៀ បាញ់ ទទួលជួបគណៈប្រតិភូយោធាជាន់ខ្ពស់ កងទ័ពជើងគោកថៃ

ថ្ងៃទី៣០ ខែមករា ឆ្នាំ២០១៩ — សម្តេចពិជ័យសេនា ទៀ  បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបាន អនុញ្ញាតឱ្យគណៈប្រតិភូយោធាជាន់ខ្ពស់កងទ័ពជើងគោកភូមិន្ទថៃដឹកនាំដោយ ឯកឧត្តម នាយឧត្តមសេនីយ៍ អាប់ភីរ៉ាត់ គង់ស៊ុមភុង (APIRAT KONGSOMPONG) អគ្គមេបញ្ជាការ កងទ័ពជើងគោកភូមិន្ទថៃ ចូលជួបសម្តែងការគួរសមនៅរសៀលថ្ងៃទី២៩ ខែមករា ឆ្នាំ២០១៩ នៅទីស្តីការគណៈរដ្ឋមន្ត្រី។

តាមប្រភពពីក្រសួងការពារជាតិបានឱ្យដឹងថា សម្តេចពិជ័យសេនា ទៀ  បាញ់ បាន សម្តែងនូវការស្វាគមន៍ និងអបអរសាទរចពោះឯកឧត្តម នាយឧត្តមសេនីយ៍ អាប់ភីរ៉ាត់ គង់ស៊ុមភុង (Apirat Kongsompong) ដែលត្រូវបានព្រះមហាក្សត្រនៃព្រះរាជាណាចក្រថៃ តែងតាំងជាមេបញ្ជាការកងទ័ពជើងគោកភូមិន្ទថៃ។ សម្តេចពិជ័យសេនាបានចាត់ទុកកងទ័ព ដែលជាប្រទេសមានភូមិផងរបងជាមួយគ្នាមានតួនាទីសំខាន់ណាស់ ក្នុងការធ្វើឱ្យប្រទេស ទាំងពីរទទួលបានសន្តិភាព និងកិច្ចសហប្រតិបត្តិការល្អនាំមកនូវផលប្រយោន៍ជូនដល់ ប្រជាជននៃប្រទេសទាំងពីរ។

សម្តេចពិជ័យសេនា ទៀ  បាញ់ បានបញ្ជាក់ថា  កងទ័ពនៃប្រទេសទាំងពីរ កម្ពុជា-ថៃ គឺជាអ្នកនាំមុខក្នុងការដោះស្រាយបញ្ហាផ្សេងៗ ដើម្បីនាំមកនូវភាពសុខសាន្តជូនប្រជាពលរដ្ឋ ក្នុងការប្រកបមុខរបរចិញ្ចឹមជីវិត និងការអភិវឌ្ឍនៅតាមបណ្តោយព្រំដែននៃ ប្រទេសទាំងពីរ កម្ពុជា-ថៃ។

នៅក្នុងជំនួបនោះ ឯកឧត្តម អាប់ភីរ៉ាត់ គង់ស៊ុមភុង (Apirat Kongsompong) បានបញ្ជាក់ថា  នេះជាលើកទីមួយហើយ ដែលឯកឧត្តមបានមកបំពេញទស្សនកិច្ចនៅ ព្រះរាជាណាចក្រកម្ពុជាចាប់តាំងពី ឯកឧត្តម ត្រូវបានតែងតាំងជាអគ្គមេបញ្ជាការកងទ័ពជើង គោកភូមិន្ទថៃ។

ជាមួយគ្នានោះ ឯកឧត្តមក៏បានជម្រាបជូនសម្តេចពិជ័យសេនា ទៀ  បាញ់ ពីសភាព ការណ៍ និងដំណើរការរៀបចំបោះឆ្នោតក្នុងប្រទេសថៃនាខែមីនាខាងមុខ ហើយឯកឧត្តមក៏ បានសម្តែងនូវការអបអរសាទរផងដែរ ចំពោះគណៈបក្សប្រជាជនកម្ពុជាដែល ទទួលបាន ជ័យជម្នះ ក្នុងការបោះឆ្នោតដោយមានគាំទ្រយ៉ាងច្រើនលើស លុបពីប្រជាជនកម្ពុជា។

ទន្ទឹមនឹងនោះ ឯកឧត្តមមេបញ្ជាការកងទ័ពជើងគោកភូមិន្ទថៃ បានវាយតម្លៃខ្ពស់ ពីសភាពការណ៍ ដែលកំពុងវិវត្តន៍យ៉ាងល្អប្រសើរតាមបណ្តោយព្រំដែននៃប្រទេសទាំងពីរ ដែលលទ្ធផល ទាំងនេះបានមកដោយសារថ្នាក់ដឹកនាំនៃមេបញ្ជការកងទ័ពទាំងពីរ សហការ គ្នាបានយ៉ាង ល្អតាមបណ្តោយព្រំដែន៕

ដោយ សាយ សុន (រូបថត៖ក្រសួងការពារជាតិ)

ពត៌មានទាក់ទង

ពត៌មានផ្សេងៗ