សម្ដេចតេជោនាយករដ្ឋមន្ត្រី អញ្ជើញប្រគល់ពានរង្វាន់វាយកូនហ្គោល(Golf Handicap) អបអរសាទរពិធីសម្ពោធវិមានអនុស្សាវរីយ៍ នយោបាយ ឈ្នះ ឈ្នះ

55

AKP ភ្នំពេញ ថ្ងៃទី៣១ ខែធ្នូ ឆ្នាំ២០១៨ -ពិធីប្រគល់ពានរង្វាន់វាយកូនហ្គោល(Golf Handicap) អបអរសាទរពិធីសម្ពោធ​វិមាន​អ​នុ​​ស្សាវរីយ៍ នយោបាយ ឈ្នះ ឈ្នះ និងខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា ត្រូវ​បានប្រារព្ធធ្វើឡើង នារាត្រីថ្ងៃអាទិត្យ ៨រោច ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹង​ថ្ងៃ​ទី​៣​០ ខែធ្នូ ឆ្នាំ២០១៨ នៅសណ្ឋាគារ ហ្គាឌិន ស៊ី ធី ស្ថិតក្នុងសង្គាត់ព្រែកតាសេក ខណ្ឌជ្រោយ​ច​ង្វារ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនា បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការចូលរួមពីសម្ដេច​អគ្គ​ម​ហា​​ពញាចក្រី ហេង សំរិន ប្រធានរដ្ឋសភា សម្ដេចវិបុលសេនាភក្ដី សាយ ឈុំ ប្រធាន ព្រឹទ្ធ​ស​ភា​ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេចពិ​ជ័យសេ​នា​ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងភ្ញៀវជាតិ និង អន្តរជាតិ​យ៉ាង​ច្រើនកុះករ។

ឯកឧត្ដម ជា បូរ៉ា រដ្ឋលេខាធិការក្រសួងទេសចរណ៍ និងជាអគ្គលេខាធិការសហព័ន្ធ​កី​ឡា​វាយ​កូនហ្គោ​លកម្ពុជា បានឱ្យដឹងថា ព្រឹត្តិការណ៍ប្រកួតកីឡាវាយកូនហ្គោល​អបអរសាទរ​ពិ​ធី​សម្ពោធវិមានអនុស្សាវរីយ៍នយោបាយឈ្នះ ឈ្នះ និងខួបលើកទី២០ នៃការបញ្ចប់​ស​ង្រ្គា​​ម​ស៊ីវិលនៅកម្ពុជា មានកីឡាករ-កីឡាការិនីជាតិ និងអន្តរជាតិចូលរួម ចំនួន ១៩៩នាក់ ក្នុងនោះ​មា​នកីឡាករបរទេសចំនួន ៦៧នាក់ ដែល ១១រូប ជាឯកអគ្គរាជទូត រដ្ឋទូត ប្រចាំនៅ​កម្ពុ​ជា​ដែ​ល​មកពី ១០ប្រទេស ដូចជា អាល្លឺម៉ង់, ប៉ាគីស្ថាន, ឡាវ, ព្រុយណេ, ម៉ាឡេស៊ី, ឥណ្ឌូណេស៊ី, ថៃ, វៀតណាម, ចិន, និងកូរ៉េ និង ៥៦នាក់ផ្សេងទៀត ជាធុរកិច្ចជនមកពីប្រទេស សិង្ហបុរី, អាល្លឺម៉ង់, ប៉ាគីស្ថាន, ឡាវ, ព្រុយណេ, ម៉ាឡេស៊ី, ឥណ្ឌូណេស៊ី, ថៃ, វៀតណាម, ចិន, និង កូរ៉េ។ ដោយឡែក​ការ​ប្រកួតជាក្រុមមានចំនួន ៦៩នាក់ និងឯកត្តជនចំនួន ១៣០នាក់ ក្នុង នោះកីឡាការិនីចំនួន ២០​នាក់។ បន្ទាប់ពីការប្រកួតពេញមួយថ្ងៃនេះ ជាលទ្ធផល ជ័យលាភី លេខ១បានទៅលើក្រុ​ម​កីឡាវាយកូនហ្គោលរបស់សម្តេចពិជ័យសេនា ទៀ បាញ់។ លេខ២ បានទៅលើក្រុមកីឡា​វា​យកូនហ្គោល របស់ឯកឧត្ដម ចម ប្រសិទ្ធ និង លេខ៣ បានទៅលើ ក្រុម​កីឡាវាយកូន​ហ្គោ​​លរបស់ ឯកឧត្ដម នាង ផាត។ ចំពោះលទ្ធផលជ័យលាភីដែលទទួល បានពានរង្វាន់​ក្នុង​ការ​ប្រ​កួតជាឯកត្តជនវិញមានកីឡាករ កីឡាការិនីដែលទទួលពានរង្វាន់ មានចំនួន ១៨នាក់។​ កា​រ​រៀ​បចំឱ្យមានការប្រកួតកីឡាវាយកូនហ្គោលនេះ គឺក្នុងគោលបំណង ដើម្បីអបអរសាទរ ​នៃការ​ស​​ម្ពោធវិមានអនុស្សាវរីយ៍ នយោបាយឈ្នះ ឈ្នះ និងអបអរសាទរ ខួបលើកទី២០ នៃការបញ្ចប់សង្គ្រាម​ស៊ីវិល​​នៅកម្ពុជា និងការអនុវត្តប្រកបដោយជោគជ័យនូវ គោលនយោបាយ ឈ្នះ ឈ្នះ របស់​ស​ម្ដេច​តេ​ជោ ហ៊ុន សែន ។ ជាពិសេសទៀតនោះ គឺដើម្បី រឹតចំណងសាមគ្គីភាព ស្របពេល​កីឡា​វាយ​កូន​ហ្គោ​លកំពុងមានការរីកចម្រើន ដែលមកដល់ បច្ចុប្បន្ននេះ កម្ពុជាមានទីលានវាយកូនហ្គោ​ល​ចំនួន ១០ទីតាំង ដូចជា នៅរាជធានីភ្នំពេញ, ខេត្តកំពង់ស្ពឺ, ខេត្តកោះកុង និងខេត្ត​សៀមរាប​ ៕